اقتاۋدا بالاباقشا داۋى توبەلەسپەن اياقتالا جازدادى

قالالىق اكىمدىككە كەلگەن اتا-انالار جىلداپ كەزەككە جازىلعانىمەن اقىرعى تىزىمنەن ءوز بۇلدىرشىندەرىنىڭ ەسىمدەرىن تاپپاي قالعان.
جاڭادان ارىز جازايىن دەگەندەرىنە اكىمدىكتەگى بالاباقشا قىزمەتى ءۇشىن جاۋاپ بەرەتىن جالعىز تەرەزە جابىق بولدى.
بۇل قىزمەت تۇرىنە جاۋاپتى ماماندار وتىراتىن اتىشۋلى جالعىز تەرەزە اپتاسىنا تەك ءبىر كۇن 3 ساعات قانا قىزمەت ەتەدى ەكەن.
اقتاۋلىق انالار قالالىق اكىمدىكتىڭ الدىنا اپتا سايىن جەتەدى. جەتى كۇن ەمەس تەك سارسەنبىنىڭ ءساتسىز كۇنى. ويتكەنى اپتانىڭ وسى ءۇشىنشى تاۋلىگىندە 3 ساعاتقا اشىلاتىن بالاباقشاعا بالا قابىلداۋ ءۇشىن جاراقتالعان جالعىز تەرەزە ەلدىڭ قاجەتىن وتەپ بىتپەيدى. شەنەۋنىكتەردىڭ شىرىلداعان ەلمەن شاتاعى جوق.
ايتىلعان ۋاقىتتا ەسىنەپ وتىرىپ ىستەرىن ءبىردى-ەكىلى جاساپ، قالعان جۇرتتى وسى كۇيدە توبىمەن تاستاپ كەتەدى ەكەن. ءبىراق بۇگىن شىدام شەگىنە جەتىپ، جۇرت اقىرى ايقايعا باستى.
ەسى شىعىپ ەكىلەنگەن ەل ەرىككەننەن جۇرگەن جوق. بالالارى بالاباقشانىڭ تاربيەسىن السا دەپ تىزىمگە تەسىلەدى. ءبىراق 3-4 جىلداپ كەزەككە تۇرعان بوبەكتەر ءالى كۇن ايتۋلى بالاباقشالارعا ورنالاسا الار ەمەس.
سەبەبىن تۇسىندىرۋگە جالعىز تەرەزەدەگى جاندار قاۋقارسىز. بۇگىن اشۋلى جۇرتتىڭ كەيبىرى اكىمدىكتىڭ قاراۋىلىمەن قاراداي جاعا جىرتىسىپ ىشكە ەنىپ شەنەۋنىكتەردىڭ نەنى شاتىپ-بۇتىپ جۇرگەنىن سۇراماققا وقتالدى.
ەلەنا ەرنيازوۆا، اقتاۋ قالاسىنىڭ تۇرعىنى:
- ەكىنشى رەت كەلىپ تۇرمىن اكىمدىككە. ءومىرى وسىنداي كەزەك بولادى. ءبىر تەرەزە عانا جۇمىس ىستەيدى.
ال اعايىندى تەك سارسەنبىدە ءۇش ساعاتقا-اق قابىلدايتىن شارۋاقور شەنەۋنىكتەر بۇل اكىمدىكتىڭ ەمەس جوعارعى بيلىكتىڭ جاساعان قۇقايى ەكەنىن ايتادى. ويتكەنى ءبىر بالانى بالاباقشا كەزەگىنە قويۋ ءۇشىن ءۇش بىردەي جەرگە تىركەلىپ ساندالىپتى اتا-انالار.
سابيكا قۇرمانعازيەۆا، اقتاۋ قالاسى ءبىلىم باسقارماسى باسشىسىنىڭ ورىنباسارى:
- قازىرگى باعدارلامانى قولدانۋ وتە اۋىر سوعۋدا بىزگە. 2010 جانە 2011 - جىلى تىركەلگەن بالالار بالاباقشالار ارقىلى كەزەككە تۇرعان. ودان كەيىن حالىققا قىزمەت كورسەتۋ ورتالىقتارى قابىلدادى ءتىزىمدى. ال قازىر اكىمدىكتەگى جاڭا جۇيەگە كوشىپ وتىرمىز.
اقتاۋدا بيىل بالاباقشاعا جالپى سانى 2 مىڭ ءبۇلدىرشىن قابىلدانعان. كەزەكتە تاعى 14 مىڭى تۇر. ال نە ىستەپ نە قويعاندارىن وزدەرى دە ماڭدىتىپ تۇسىنبەگەن اقتاۋلىق شەنەۋنىكتەر ازىرگە سارسەنبى سايىن ەلدىڭ جۇيكەسىن جۇقارتا تۇسپەك. اشىنعان اتا-انالار بولسا ۇكىمەتكە ارىز حات جولداماق بوپ شەشتى.
«KTK» تەلەارناسى