دەپۋتات اتاقتى ونەر وردالارىنىڭ جەكەشەلەنۋىنە قارسىلىق ءبىلدىردى

استانا. قازاقپارات - جەكەشەلەندىرۋگە جول جوق!

بۇگىن ءماجىلىس «قازاقفيلم»، رەسپۋبليكا سارايى مەن مەملەكەتتىك سيركتى ساتۋعا تۇبەگەيلى قارسىلىق ءبىلدىردى.

ەگەر الماتىداعى بۇل نىسانداردى كاسىپكەرلەردىڭ قولىنا ۇستاتىپ جىبەرسەك، مادەنيەت قۇردىمعا كەتەدى دەيدى دەپۋتاتتار.

ويتكەنى، بۇعان دەيىن سيرك جەكە مەنشىككە بەرىلگەن.

ءسويتىپ ءۇش جىلدىڭ ىشىندە 50 ميلليون تەڭگە شىعىنعا باتىپ، ودان قالدى كورەرمەن جولاماي قاڭىراپ قالىپتى.

مۇرات احماديەۆ، ءماجىلىس دەپۋتاتى:

-5  جىلدىڭ ىشىندە 3 باعدارلاما جاساعان. سيركتىڭ ارتىستەرىنىڭ شتاتىنىڭ ءبارىن قۇرتقان، مۇلىكتەردىڭ ءبارىن ساتىپ تاستاعان. عيماراتتىڭ ىشىنە كافە، كەشكى كلۋب، ماگازيندەر تولىپ كەتتى. ادامدار كەلمەي قالدى سيرككە. ءبىر قاتەلىك جاسادىق پا، ونى نەگە ەندى قايتالايمىز؟

ونەردىڭ تۇيتكىلىن جاقسى تۇسىنەتىن دەپۋتات وڭتۇستىك استاناداعى رەسپۋبليكا سارايى مەن «قازاق فيلمنىڭ» تاعدىرىنا دا الاڭداۋلى. سوندىقتان «كاسىپكەرلەر الماتىنىڭ تاريحىمەن تىعىز بايلانىستى ونەر وردالارىنا تەك تابىس كوزى رەتىندە قاراپ، بار مۇلكىن تالان-تاراجعا سالۋى مۇمكىن» دەپ قاۋىپتەنىپ وتىر.

ءتىپتى «قازاق فيلمنىڭ» جاڭا قوجايىنىن ۇلتتىق كينونىڭ بولاشاعى قىزىقتىرا قويادى دەگەنگە سەنگىلەرى كەلمەيدى. ال، وسى كۇنگە دەيىن بيۋدجەتتەن ءبىر تيىن الماي، ءوزىن-ءوزى قارجىلاندىرىپ كەلگەن رەسپۋبليكا سارايىن مۇلدەم ساتىپ جىبەرگىسى كەلىپ وتىرعان ۇكىمەتتىڭ ارەكەتى دە تۇسىنىكسىز.

ونىڭ ۇستىنە ەلىمىزدە الداعى 2  جىلدا ءبىرقاتار مەملەكەتتىك مەكەمەلەر ساتىلماق. جەكە قولعا وتەتىن نىسانداردىڭ قاتارىندا «قازاق ەنتسيكلوپەدياسى»، «جاس وتاۋ»، «قايرات» فۋتبول كلۋبى جانە ۇكىمەتكە قاراستى ونداعان كاسىپورىندار مەن جەرگىلىكتى اكىمشىلىك عيماراتتارى بار.

«KTK» تەلەارناسى