قىرعىزستاندا قاۋىپ كوپ
بۇعان دەيىن الامەدين اۋداندىق ىشكى ىستەر ءبولىمىنىڭ كاپيتانى باقىت يسمايلوۆقا قاتىستى قىلمىستىق ءىس قوزعالعانى حابارلانعان.
ءىستى تەرگەۋمەن ىشكى ىستەر باسقارماسىنىڭ وزىندىك قاۋىپسىزدىك قىزمەتى اينالىستى، كەيىن ءىس ىشكى ىستەر مينيسترلىگىنە جانە پروكۋراتۋراعا بەرىلدى.
پروكۋراتۋرا بۇل ىستە قىلمىس بەلگىسى جوق ەكەنىن العا تارتىپ، ءوندىرىستى توقتاتقان.
ىشكى ىستەر قىزمەتكەرلەرىنىڭ مالىمەتىنشە، كاپيتانعا قاتىستى ەشقانداي شارا قولدانىلعان جوق، سونىڭ ىشىندە، تارتىپتىك جازا دا قاراستىرىلمادى. 2013 - جىلدىڭ قىركۇيەگىندە Tengrinews.kz رەداكسياسىنا الماتى قالاسىنىڭ تۇرعىنى ايگۇل راحماتۋللينا حابارلاسىپ، ءوزىنىڭ قىرعىز ميليتسياسىنان ءجابىر كورگەنىن ايتقان بولاتىن.
ول 15 - تامىزدا وتباسىمەن قىرعىزستانعا بارعان ساپارىندا كەدەن بەكەتىندە ءبىر اۆتوبۋس ارتقا قوزعالىپ، مۇنىڭ كولىگىمەن ارادا ءوتىپ بارا جاتقان قىزدى قىسىپ تاستايدى، ءبىراق ونى بايقاماي بەت العان جاعىنا ءجۇرىپ كەتەدى. وقيعا ورنىنا كەلگەن مەملەكەتتىك اۆتوينسپەكتسيا ماماندارى راحماتۋللينانىڭ كۇيەۋىنىڭ كولىك جۇرگىزۋ كۋالىگىن الىپ قويادى.
كولىكتەردىڭ اراسىنا قىسىلىپ قالعان قىز اياعىنان جارالانعان، ءبىراق قازاقستاندىق كولىككە ەشقانداي كىنا ارتپايتىنىن ايتىپ ارىز جازادى.
سوعان قاراماستان، ميليتسيونەرلەر الماتىلىقتىڭ قۇجاتىن قايتارمايدى. تۇنگى مەزگىلدە كاپيتان يسمايلوۆ راحماتۋللينانىڭ كۇيەۋىنەن تۇسىنىكتەمە جازۋدى تالاپ ەتەدى، ءبىراق الماتىلىق ونىڭ ورنىنا تالاپ ارىز جازىپ قالدىرادى.
وسى كەزدە كاپيتاننىڭ كابينەتىنە كىرمەك بولعان راحماتۋللينانى يسمايلوۆ دورەكى تۇردە يتەرىپ جىبەرىپ، ىشىنەن ۇرادى. بۇل كەزدە كەلىنشەك جۇكتىلىكتىڭ بەسىنشى ايىندا بولعان. الماتىعا كەلگەننەن كەيىن كلينيكالىق تەكسەرۋدىڭ ناتيجەسىندە دارىگەرلەر جۇكتىلىكتى توقتاتۋ قاۋپى بولعانى تۋرالى قورىتىندى شىعارادى. راحماتۋللينانىڭ ايتۋىنشا، قىرعىز ميليتسياسى كۇيەۋىنىڭ كولىك جۇرگىزۋ كۋالىگىن ءالى قايتارماعان.
Tengrinews.kz
