ءولتىرىپ-ءتىرىلتىپ جاتقان دودا

استانا. قازاقپارات - قىتايدا الەم چەمپيوناتىن ۇزدىكسىز كورىپ، تالىعىپ-تالىپ، اعزاسى شارشاپ ءولىپ كەتكەندەر ۇشەۋ بولدى.
None
None

بەلگيانىڭ جانكۇيەرى ءوز قۇراماسىنىڭ جەڭىسىن قاتتى تويلاپ جىبەرىپ، مۇنارادان قۇلاپ مەرت بولدى... فۋتبول تاعى دا ادامداردىڭ ەسىن الىپ جاتىر...

گوندۋراس قۇراماسى جاتقان قوناق ءۇي ماڭىندا بانكومات توناۋشىلار مەن پوليتسيا اتىستى. ەش شىعىن جوق. ءبىراق ءبارىبىر جاقسى ەمەس.

انگليا - يتاليا ماتچى وتكەن (ءالى دە ءۇش ماتچ وتەتىن) ماناۋس قالاسىندا امازونكانىڭ ءبىر سالاسى ريۋ-نەگري وزەنىنىڭ سۋى كوتەرىلۋىنە بايلانىستى توتەنشە جاعداي جاريالاندى. نوسەرلەتىپ تۇر تابيعات-انا. قانشا سۋ تاسىسا دا، ويىندار وتەتىن «امازونيا» ستاديونىنا قاۋىپ تونبەيدى دەيدى.

سان-پاۋلۋ، كۋريتيبا، ريو دە جانەيرو قالالارىندا الەم چەمپيوناتىنا قارسى شەرۋلەر ءوتتى.

ءبىراق مۇنىڭ ءبارى دوپ دوداسى دۇرمەگىنىڭ قاسىندا تۇك ەمەس.

ويپىرماي، گوللانديا يسپانيانى سونشا اياماعانى نەسى؟.. كەكتەنگەندە دە، سونشا كەكتەنۋگە بولا ما؟ 2010 - جىلعى الەم بىرىنشىلىگىنىڭ فينالىندا وسى ەكەۋى توقايلاسىپ، جەڭىس يسپانداردىڭ قانجىعاسىندا كەتپەپ پە ەدى؟ قانشا ايتساڭ دا، كاسيلياسقا جىل بويعى دەمالىس كەرى اسەر ەتتى.

«رەالدا» ول تەك چەمپيوندار ليگاسىنا قاتىسىپ، ۇلتتىق چەمپيوناتتا قوسالقى قۇرامدا وتىردى. ال الەمدىك دودا مۇنداي ولقىلىقتى كەشىرمەك ەمەس. اسىرەسە، ۆان پەرسيدىڭ قوس گولى ەنگەندەگى ارەكەتى كاسيلياستىڭ بابى كەم ەكەنىن ايعاقتايدى. بىرىندە - العا شىعىپ كەتتى، ەكىنشىسىندە - شابۋىلشىنىڭ اياعىنا دوپتى ءدال سالىپ بەردى، سىيلىق جاسادى. ەندى ەس جيماسا، يسپانيا ءتاجىن شەشىپ بەرۋى بەك مۇمكىن.

ءبىراق 2010 - جىلعى الەم چەمپيوناتىن دا ءساتسىز باستاپ، شۆەيتساريادان 0:1 ەسەبىمەن ۇتىلىپ، سودان كەيىنگى قارسىلاستارىنىڭ ءبارىن جەرگە قاراتقان وسى قۇراما ەمەس پە ەدى؟

كوستا-ريكاڭىز مىقتى شىقتى. بۇل كوماندا باسقا-باسقا ەمەس، فورلان باستاعان ۋرۋگۆاي قۇراماسىنىڭ جولىن كەشىپ كەتتى.

انگليا، يتالياسى جانە بار توپتا كاريب باسسەينىنىڭ ۇلاندارى تەوريا بويىنشا «ۇپاي تاراتۋشى» بولۋعا ءتيىس ەدى. ءبىراق بۇل دەگەنىڭىز فۋتبول عوي، ەڭ بىلگىش دەگەننىڭ ءوزىنىڭ جورامالىن تەرىس قىپ، «بۇيرەكتەن سيراق شىعارا» سالاتىن ونەر بۇل. اسىرەسە، ماركوس ۋرەنيا سوققان ءۇشىنشى گول قانداي! كادىمگى ينفوگرافيكامەن جاسالىپ، فۋتبول عاجاپتارىن كوز الدىڭىزعا كومپيۋتەر مونيتورىندا تۇسىندىرگەندەي كومبيناتسيا بولدى!

بۇل چەمپيونات جىگەرلى جەڭىسكە تولى بولىپ تۇر. «بالەنىڭ» ءبارىن برازيليا باستادى. بەتاشار ماتچتا سكولاري شاكىرتتەرى اۋەلى ءوز قاقپاسىنا گول سوعىپ الىپ، ارتىنشا حورۆاتياعا 3 دوپپەن جاۋاپ بەرۋگە «ءماجبۇر بولدى».

شۆەيتساريا دا ءسويتتى - ەكۆادوردى سولاي ۇتتى، بەلگيا دا كۇنى كەشە الجيردەن اۋەلى گول جىبەرىپ الىپ، ەكىنشى تايمداعى قوس دوپپەن ماسەلەنى ازەر شەشتى. يسپانيا - گوللانديا، جاپونيا - كوت د'يۆۋار، ۋرۋگۆاي -  كوستا-ريكا ماتچتارىندا دا جىگەرلى جەڭىستەر تىركەلدى. دەمەك، ءبىرىنشى بولىپ گول سوققان كوماندانى جەڭىمپاز دەپ تانۋعا اسىقپاعان ءجون. كوزدى اشىپ-جۇمعانشا «جەردىڭ استىن ۇستىنە كەلتىرەتىن» مىقتىلار جەتىپ-ارتىلادى بۇل جولى.

تاعى ءبىر ەرەكشەلىك - باپكەرلەردىڭ باتىل تۇيسىگى. ەكۆادوردان دوپ جىبەرىپ العان سوڭ، شۆەيتساريا قۇراماسىنىڭ باس باپكەرى وتتمار حيتتسفەلد ەكىنشى تايمدا الاڭعا قوس شابۋىلشىنى كەزەك جىبەردى -  سول ەكەۋى جەڭىس اكەلدى.

اۋەلى ا. مەحمەدي بۇرىشتان كوتەرىلگەن دوپتى ءدال باعىتتاسا، ويىن تۇگەسىلەر تۇستا ح. سەفەروۆيچ مەرگەندىك تانىتتى. جان بوسەجۋر دە (چيلي) الاڭعا ەكىنشى تايمدا شىعىپ، اۆستراليا قاقپاسىنا سوعىلعان ءۇشىنشى گول اۆتورى اتاندى. ۆەداد يبيشيەۆيچ (بوسنيا) ، دجون برۋكس (ا ق ش) ، ماركوس ۋرەنيا (كوستا-ريكا) ، مارۋان فەللايني مەن دريس مەرتەنس (بەلگيا) ، الەكساندر كەرجاكوۆ (رەسەي) - بۇل ويىنشىلاردىڭ ءبارى نەگىزگى قۇرامعا ىلىنبەگەنمەن، ەكىنشى تايمدا ماتچ تاعدىرىنا تىكەلەي اسەر ەتكەن مەرگەندەر. برۋكس، مەرتەنس، سەفەروۆيچ سوققان گولدار ا ق ش-قا، بەلگياعا جانە شۆەيتسارياعا جەڭىس اكەلدى، ۋرەنيا مەن بوسەجۋر كوستا-ريكا مەن چيليدىڭ جەڭىسىن نىقتاي ءتۇستى، فەللايني مەن كەرجاكوۆ ەسەپ تەڭەستىردى. سوندا يبيشەۆيچتىڭ گولى عانا پايداسىز بولعانى ما؟ كىم بىلەدى، توپتىق تۋرنيردىڭ سوڭعى تۋرىندا بوسنياعا ءدال وسى گول دوپ ايىرماشىلىعىن ەسەپتەگەندە كەرەك بولىپ قالار... ەڭ باستىسى، مۇندا جاتتىقتىرۋشىلاردىڭ تۇيسىگى الداماعانىن ايتىپ ءوتۋىمىز كەرەك.

كورشىمىز راۋشان يرماتوۆ تا جاراپ تۇر. وسىمەن ەكىنشى رەت الەم چەمپيوناتىندا قازىلىق جاساپ جاتقان وزبەك تورەشىسى تاعى دا جاقسى جاعىنان تانىلدى. ول شۆەيتساريا - ەكۆادور ماتچىنىڭ سوڭعى سەكۋندتارىندا ۆالون بەحراميدى ەكۆادورلىقتار قاتتى شالىپ شىقسا دا از-كەم ءۇزىلىس ۇستاپ، بەحراميدىڭ ورنىنان تۇرۋىن كۇتتى. قاس-قاعىمدا ەس جيىپ ۇلگەرگەن بەحرامي گولعا اينالعان تاماشا پاس شىعاردى.

يرماتوۆتىڭ وسى ارەكەتىنە الەمنىڭ اقپارات قۇرالدارى ءتانتى بولىپ جاتىر. ەگەر ول ىسقىرىقتى اۋزىنا الا جۇگىرىپ، شار ەتكىزگەندە، شۆەيتساريانىڭ تاماشا شابۋىلى ورتادان تۇيىقتالىپ، جەڭىس گولى سوعىلماس ەدى. يرماتوۆ باستاعان، قىرعىز قوشقاروۆ پەن وزبەك راسۋلوۆ قوشتاعان تورەشىلەر بريگاداسىنا ەل دە، ماماندار دا رازى.

ەڭ باستىسى، ءتۇرلى ولقىلىقتارىنا قاراماستان، الەم چەمپيوناتى وتە جاقسى ءوتىپ جاتىر. دامۋشى ەلگە ءتان كەمشىلىكتەر جەتەدى، ءبىراق داقپىرتى مەن داڭقى سۇمدىق بولىپ تۇر.

ەسەي جەڭىس ۇلى

«ايقىن»

سوڭعى جاڭالىقتار