قازاقستاندىقتاردىڭ تۇسكى اسقا قانشا تەڭگە جۇمسايتىنى انىقتالدى

باستى ماقسات: بوس ورىنعا ۇمىتكەر ازاماتتارعا جۇمىس ورىنىندا تەگىن تاماق بەرۋ قانشالىقتى ماڭىزدى جانە ادامدار تۇسكى اسقا قانشا اقشا جۇمسايتىندىعىن انىقتاۋ.
بەلگىلى بولعانداي، بوس ورىنعا ۇمىتكەردەردىڭ تەك 3 پايىزى عانا تۇستىك استى بەرمەيتىن كومپانيادا جۇمىس ىستەۋدەن باس تارتاتىن كورىنەدى.
«ساۋالعا جاۋاپ بەرگەن قازاقستاندىقتاردىڭ 55 پايىزى كەلىسىم شارتتا وسىنداي ءبولىمنىڭ جوقتىعىنا ونشا ءمان بەرمەيدى. ال ۇشتەن ءبىر بولىگى كومپانيا ۇناعان جاعدايدا، تاماقتانۋ تۋراسىندا قيىندىقتار بولمايتىندىعىنا سەنىمدى. قىزمەتكەرلەردىڭ 3 پايىزى تەگىن تاماقتىڭ مىندەتتى تۇردە بەرىلۋ كەرەكتىگىن اتاپ ءوتتى»، - دەلىنگەن حابارلامادا.
زەرتتەۋ ناتيجەسى بويىنشا جۇمىس بەرۋشىلەردىڭ 83 پايىزى قىزمەتكەرلەردىڭ تاماعىن قارجىلاندىرمايدى. ال 7 پايىزى ءىشىنارا تولەيتىن كورىنەدى.
وزدىگىنەن اقشا تاباتىن ازاماتتاردىڭ جارتىسى (44 پايىز) تۇسكى اسقا كۇندە 500 دەن 1000 تەڭگەگە دەيىن جۇمسايدى. ال قالعان 46 پايىزى 500 تەڭگەدەن ارتىق قارجى جۇمساماي، اقشانى ۇنەمدەگەندى قالايدى. سۇراققا جاۋاپ بەرگەندەردىڭ 1 پايىزى عانا تولىققاندى تۇستەنۋ ءۇشىن 2000 تەڭگە جۇمسايدى.
زەرتتەۋ جۇمىستارى 9 مەن 18 - ماۋسىم ارالىعىندا جۇرگىزىلدى. ساۋالعا 3334 قازاقستاندىق جاۋاپ بەردى.
«الماتى» تەلەارناسى