كەشە قانداسىمىز قاناتبەك «نوكاۋت» الدى

 استانا.قازاقپارات - كەشە، استانادا ەر جانىبەك باتىردىڭ 300 جىلدىعانا ارنالعان ايتىس بولدى. ايتىس، ارينە - ءسوز بارىمتاسى. بىلايشا ايتقاندا كۇرەستىڭ، اۋدارىسپاقتىڭ، بوكستىڭ ءسوز تۇرىندەگى فورماسى. ايتايىن دەگەنىم ءبىر عانا جاعداي.
None
None

قازاقتىڭ بايىرعى ايتىستارىندا سوزدەن ۇستاپ ايتىسۋ دەگەن بار ەدى. قاي جەردە ايتىس بولماسىن، سودان كەيىن «كىمدى كىم جەڭىپتى؟ » دەپ سۇراپ جاتاتىن ۇلكەندەر. وسى ساۋالدا كوپ ءمان بار. «پالەندى پالەن جەڭىپتى» دەپ ايتاتىن بولساڭ، «نە دەپ جەڭىپتى؟» دەيدى. مىنە، سوزگە ءسوز قايتارۋ دەگەن. وندا اقىن قارسىلاسىنىڭ سوزىنەن ۇستاپ تىرپ ەتكىزبەستەي، جاۋاپ قايىرا الماستاي ەتىپ اۋزىن بۋىپ تاستايدى. بۇرىنعى اقىندارىمىز سوزدەن جەڭىلگەنىن بىلگەندە ءوزى توقتاعان دەگەن اڭگىمەنى تالاي ەستىدىم. قازىر ايتىستان شىقساڭ وزگەلەر «باس جۇلدەنى كىم الدى؟» دەيدى. بولدى. سوندا ولاردىڭ نە ايتقانى، ءبىر- ءبىرىنىڭ وسال جەرىن قالاي تاۋىپ، وماقاستىرىپ كەتكەنى جايلى سۇراي قويمايدى.

مۇنىڭ ءبىر سەبەبى، اقىندار اراسىندا سوزدەن ۇستاپ ايتىسۋ، تارتىسۋ ازايىپ كەتكەنىن بىلدىرەدى. دايىندالعان شۋماقتاردى قارشا بوراتىپ، ەكەۋى ەكى جاققا شابادى. ءتىپتى جارىسىپ ەمەس، ەرسىلى- قارسىلى.

سونىمەن، ايتىستى شارتتى تۇردە "بوكس" دەپ الساق، كەشەگى ايتىستا قىتايدان كەلگەن قانداسىمىز قارىمدى اقىن قاناتبەك زايتوللانى جانسايا مۋسينا «نوكاۋت» - قا ءتۇسىردى. قالاي؟ بىلاي:

قاناتبەك ايتىستى باستاعاندا ءوزىن اش قاسقىرعا، جانسايانى قويعا تەڭەپ «جەي سالسام» دەگەن وي ايتتى. ايتىس ءارى قاراي ءوربىدى. قاناتبەكتىڭ ايتىس ماقامى وزگەشە ەكەن. داۋىسى قاتتى، اشى شىعادى ەكەن. سونى تىلگە تيەك ەتكەن جانسايا: «قاساپشىنىڭ قولىنان پىشاق كورگەن، ەشكى قۇساپ نەمەنە باقىراسىڭ» - دەدى. قاناتبەك ودان ءارى: «قانداسىم دەپ كەلگەندە قاناتبەكتى، حايۋانعا تەڭەيد دەپ كىم ويلاعان» دەگەن سيپاتتا شامىرقانا سويلەدى. سول كەزدە، ءدال سول كەزدە، (سپورتتاعى ءسوز تىركەسىمەن ايتساق) قارسىلاسىنىڭ يەك تۇسى اشىق قالعانىن قاپىسىز اڭداعان جانسايا «پەرىپ» كەپ جىبەردى:

«مەن ساعان ءسوز ايتقام جوق كەسىرلەنە،

ارقادا، استانانىڭ توسىندە دە،

ەشكى دەسەم نەسىنە شامداناسىڭ،

مەنى، قوي دەگەن ءسوزىڭ ەسىڭدە مە؟» - دەدى. ەل جاپىرىلىپ ءتۇستى. كۇلكىدەن. ريزاشىلىقتان. قاقپانعا ءدال تۇسىرگەندىكتەن. حارى قاراي قاناتبەك ايتتى، ايتپادى - ءبارىبىر. ويتكەنى، تورەشى ەسەپ اشتى. قالىڭ كورەرمەن - تورەشى. سوزدەن ۇستاۋ دەگەن وسى. "جۇيرىككە دە ءبىر تومار" دەگەن، ايتپەسە قاناتبەكتىڭ تارتىستى ايتىستارىنا ەل سۇيىنگەن اقىن ەكەنىن ءبىراز جۇرت بىلەدى. بۇل دا ءبىر ساباق بولسىن دەپ جازعانىم، قاناتبەككە عانا ەمەس، بارلىق اقىنعا.

 ەركىن ايداربەك،Kazaitys.kz 

سوڭعى جاڭالىقتار