استانالىق اقىن «ەل قورعاعان ەر جانىبەك» اتتى حالىقارالىق اقىندار ايتىسىنىڭ باس جۇلدەسىن جەڭىپ الدى - فوتو

استانا. قازاقپارات - استاناداعى «بەيبىتشىلىك جانە كەلىسىم» سارايىندا ەر جانىبەك بەرداۋلەت ۇلىنىڭ 300 جىلدىق مەرەيتويىنا ارنالعان «ەل قورعاعان ەر جانىبەك» اتتى حالىقارالىق ايتىس ءوتتى.
None
None

ايتىستى «نۇر وتان» پارتياسىنىڭ قولداۋىمەن «ەر جانىبەك» حالىقارالىق قوعامدىق قورى جانە ايتىس اقىندارى مەن جىرشى- تەرمەشىلەردىڭ حالىقارالىق وداعى بىرلەسىپ ۇيىمداستىرعان.

سونداي-اق، بۇل جولعى ايتىسقا جەڭىس تۇركيا، جومارت وماروۆ، تولقىن اقان ۇلى، ءبىرجان تاجىعاليەۆ قاتارلى كاسىپكەر، جومارت ازاماتتار دەمەۋشىلىك جاسادى.

ايتىس الامانىندا اقىندار قازاقتىڭ نار تۇلعالى باتىرى ەر جانبەكتىڭ ونەگەلى ءومىرىن، ەرلىك جولىن جىرعا قوستى. تاۋەلسىز قازاق ەلىنىڭ بۇگىنگى جارقىن بەينەسىن ولەڭمەن ايشىقتادى.

جىر جامپوزدارىنىڭ ونەرىنە باس قازى بولىپ  اقىن، مەملەكەتتىك سيىلىقتىڭ يەگەرى نەسىبەك ايىت ۇلى، ال مۇشەلەرى رەتىندە جازۋشى ءشامىس قۇمار ۇلى، موڭعوليانىڭ ەڭبەك سىڭىرگەن قايراتكەرى، اقىن سۇراعان راحمەت ۇلى، جىرشى الماس الماتوۆ، ق ر پارلامەنتىنىڭ دەپۋتاتى باقىتبەك سماعۇلوۆ جانە ايتىسكەر اقىن سەرىك قاليەۆ پەن داۋلەتكەرەي كاپ ۇلى  تورەلىك ەتتى.

  بايراقتى بايگەدە ەشكىم دە جۇلدەسىز قالعان جوق، قاتىسقان ءار اقىنعا ارنايى ديپلوم مەن 100 مىڭ تەڭگە كولەمىندە سىيلىق تابىس ەتىلدى.

ايتىستىڭ باس جۇلدەسى - КІА اۆتوكولىگىن ەركەبۇلان قاينازاروۆ جەڭىپ الدى، ال 1- ورىندى يەلەنگەن پاۆلودارلىق اسپانبەك شۇعاتايەۆ 1 ميلليون تەڭگە السا، 2- ورىن جاس اقىن مەيىربەك سۇلتانحان مەن قىتايلىق قانداسىمىز انارگۇل بادەلحاننىڭ قانجىعاسىنا بايلانىپ، 500 مىڭ تەڭگەدەن بەرىلدى. جىر دوداسىندا 3- ورىندى ماقسات احانوۆ پەن قارلىعاش اۋباكىروۆا يەلەنىپ 300 مىڭ تەڭگە كولەمىندەگى سىيلىققا يە بولدى.

 ەستەرىڭىزگە سالا كەتەيىك، ايتىسقا قازاقستان، قىتاي، مونعوليا ەلدەرىنىڭ ايتىسكەرلەرى قاتىستى.  اتاپ ايتقاندا، قىتايدان قاناتبەك زايتوللا ۇلى، انارگۇل بادەلحان، موڭعوليادان ءساتجان ءتىلاشقان سەكىلدى قانداستارىمىز قاتىسسا، ماقسات اقانوۆ، ايبەك قاليەۆ، قارلىعاش اۋباكىروۆا، ەركەبۇلان قاينازار، اسەم ەرەجە قىزى، باۋىرجان حاليوللا، يرانعايىپ كۇزەمبايەۆ، ەرجەڭىس ءابدى، رينات زايىتوۆ، جاقسىلىق ورىنباسار، مەيىربەك سۇلتانحان سىندى اقىندار قازاق ەلىنىڭ اتىنان ءسوز سايىستىردى.

اۆتور: باقىتجول كاكەش ۇلى




ەركەبۇلان قاينازاروۆ

айтыс










سوڭعى جاڭالىقتار