ىستامبۇلدا قازاقتىڭ اتاقتى وپەراسى ساحنالاندى

بيىلعى سالتاناتتىڭ شىمىلدىعى قازاقتىڭ اتاقتى كومپوزيتورى مۇقان تولەبايەۆتىڭ «ءبىرجان- سارا» وپەراسىمەن اشىلدى.
بۇل قويىلىمدا تۇركى تىلدەس 6 ەلدىڭ تانىمال ونەر تارلاندارى وينايتىندىقتان، «ءبىرجان مەن سارانى» ىستامبۇلدىق ونەرسۇيەر قاۋىم ەرەكشە ىقىلاسپەن قابىل الدى.
بىلتىر قازاقتىڭ دارىندى كومپوزيتورى مۇقان تولەبايەۆتىڭ 100 جىلدىعىن بۇكىل تۇركى حالىقتارى تويلاعان. ال ونىڭ تىرناق الدى تۋىندىسى «ءبىرجان مەن سارا» تۇڭعىش مارتە تۇرىك تىلىندە ساحنالاندى.
سامسۋن قالاسىنىڭ مەملەكەتتىك وپەرا جانە بالەت تەاترى قويىلىمدى جەكە رەپەرتۋارىنا ەنگىزدى. كوپ ۋاقىت وتپەسە دە قويىلىم تەاتر سىنشىلارىنىڭ جانە قاراپايىم كورەرمەننىڭ كوڭىلىنەن شىقتى. وسى سەبەپپەن V حالىقارالىق ىستامبۇل فەستيۆالىنىڭ شىمىلدىعىن قازاقتىڭ «ءبىرجان- سارا» وپەراسى اشتى.
وتكەن جىلى مۇقان تولەبايەۆتىڭ مەرەي تويىنا وراي قويىلىم تۇركيانىڭ ءبىرقاتار قالالارىندا ساحنالانعانىمەن، ىستامبۇلدىڭ تالعامپاز ونەر سۇيەر قاۋىمى «ءبىرجان-سارانى» العاش رەت تاماشالاپ وتىر.
شىعارما تولىعىمەن تۇرىك تىلىنە اۋدارىلعاندىقتان، كوپشىلىككە وقيعا جەلىسى تۇسىنىكتى بولدى. وپەرانى كورۋگە ارنايى كەلگەن ىستامبۇلدىق تيۋلين سايىم: «قويىلىم ارقىلى قازاقتىڭ سال- سەرىلىك، انشىلىك ءداستۇرى مەن ايتىسى سەكىلدى ۇلتتىق ونەرىنەن مول ماعلۇمات الدىم»، - دەيدى.
تيۋلين سايىم، كورەرمەن: -
«ءبىرجان- سارا» وپەراسىندا قازاق حالقىنىڭ تاريحى، مادەنيەتى مەن بولمىسى كەرەمەت سۋرەتتەلگەن. قويىلىمدى تاماشالاي وتىرىپ ءتۇبىمىز ءبىر، تىنىس-تىرشىلىگىمىز ۇقساس ەكەندىگىن اڭعاردىم. بيىل حالىقارالىق فەستيۆال اياسىندا قويىلاتىن وپەرالار ىشىندە «ءبىرجان- سارا» كوركەمدىلىك ءارى تانىمدىق جاعىنان ەستە قالادى. وزىمە قاتتى ۇنادى. فەستيۆالدە «ءبىرجان- سارا» وپەراسى تۇركى حالىقتارى ونەرپازدارىنىڭ باسىن قوستى. باستى رولدەگى ءبىرجاندى تۇركيالىق وزەل وندەش ويناسا، سارانى «استانا وپەرانىڭ» ءانشىسى جۇپار عابدۋللينا سومدادى.
ال قويىلىم رەجيسسەرى - ءازىربايجاندىق ەفلاتۋن نيمەتزادە. ول بۇعان دەيىن «كەروعلى» مەن «الپامىس» وپەرالارىن ۇلكەن ساحناعا شىعارعان.
وزگيۋر اسلان، سامسۋن مەملەكەتتىك وپەرا جانە بالەت تەاترىنىڭ ءارتىسى:
- قويىلىم سامسۋن تەاترىنىڭ رەپەرتۋارىنا ەنگەننەن باستاپ جانبوتانىڭ ءرولىن سومداپ كەلەمىن. كەيىپكەرىمنىڭ مىنەز- قۇلقىن، بولمىسىن بارىنشا جەتكىزۋىم ءۇشىن كوپ ەڭبەك ەتكەنىمدى ايتقىم كەلەدى. ىستامبۇل فەستيۆالىنەن سوڭ «ءبىرجان- سارا» بۋرسا، ەسكيشەحير جانە انكارادا سەكىلدى تۇركيانىڭ ەڭ ءىرى 3 قالاسىندا وتكىزىلەتىن بولدى. شارانىڭ ۇيىمداستىرۋشىسى تۇركسوي حالىقارالىق ۇيىمى قازاق وپەراسىنداعى شوقتىعى بيىك تۋىندىنى كەڭىنەن ناسيحاتتاۋدى جوسپارلاپ وتىر.
اۆتورى: ەرجان ءجۇنىس
24.kz