19:13, 16 - ماۋسىم 2014 | GMT +5
ەرتىس فۋتبول كلۋبىنىڭ باسشىلارىن سوققىعا جىققاندار ۇستالدى - تولىعىراق
استانا. قازاقپارات - پاۆلودارلىق پوليسيا «ەرتىس» فۋتبول كلۋبىنىڭ ديرەكتورى حالىمجان ەرجانوۆ پەن كلۋبتىڭ تەحنيكالىق ديرەكتورى بولات ىسقاقوۆتى سوققىعا جىققانداردى ۇستاعانى تۋرالى حاباردار ەتكەن بولاتىنبىز.

باستاپقى بەتتە تەرگەۋشىگە بەت باقتىرماعان كۇدىكتىلەر قازىر قىلمىسقا قاتىستى دەرەكتەردى وزدەرى اشكەرەلەۋدە.
ۇستالعانداردىڭ ەكەۋى - بۇرىن سوتتالعاندار. بىرەۋى - كىسى ولىمىنە قاتىستى، ال ەكىنشىسى - ۇرلىق جاساعانى ءۇشىن جازاسىن وتەپ شىققان. ولار بەتپەردە كيىپ، «ەرتىس» فۋتبول كلۋبىنىڭ باسشىلارىن ارماتۋرامەن سوققىعا جىققان. كەشە پوليسيا وسى ىسكە تاپسىرىس بەرۋشىنى ۇستادى.
ولار بىردەن تاجىريبەلى قورعاۋشىلاردىڭ قىزمەتىنە جۇگىنگەن.
سۇلتان كۇسەتوۆ، وبلىستىق ىشكى ىستەر دەپارتامەنتىنىڭ باستىعى:
- تورتەۋى دە ءبىزدىڭ قالانىڭ تۇرعىندارى. بىرەۋى قىلمىستى ۇيىمداستىرعان، قالعان ۇشەۋى - ورىنداۋشىلار. ولاردىڭ مىنگەن اۆتوكولىكتەرىن دە تاپتىق. ازىرگە تەرگەۋ قۇپيالىلىعىن ساقتاۋ قاجەت، سوندىقتان باسقا مالىمەتتەردى جاريا ەتە المايمىز.
«قازاقستان» تەلەارناسى