قازاق ەلىندەگى قازاقشا وقۋدىڭ قيامەتى

نارازىلىق بىلدىرگەندەر، ءوز بالالارىن قازاقشا وقىتقىسى كەلەتىن اتا-انالار.
قازاق بالالارىنىڭ ءوز ەلىندە انا تىلىندە وقۋعا قۇقىعى جوق پا دەپ باس كوتەرگەندەر، مەملەكەتتىك ءتىلدى مەنسىنبەيتىن وقۋ ورداسىنىڭ اكىمشىلىگى بالالارىمىزدى ادەيى قابىلداماي جاتىر دەپ اشىنادى.
ايتۋلارىنشا، مەكتەپتە ارتىق ورىن جوق دەگەن سىلتاۋ عانا. ويتكەنى، قازاق بالالارىنا ءبىر سىنىپتى ارەڭ قيعان ديرەكتور، ەسەسىنە بيىل تاعى 10 ورىس سىنىبىن اشقان كورىنەدى.
تۇرىكسىب اۋدانىنداعى №83-ونەر گيمنازياسى دارىندى بالالاردىڭ باسىن قوسقان ىرگەلى ءبىلىم ورداسى.
شاھارداعى ەڭ ۇلگىلى مەكتەپتەردىڭ ءبىرى. الايدا، مۇندا قازاق ءتىلدى بالالارعا ورىن از. قازاق سىنىپتارىن اشۋ تۋرالى 4 جىل بۇرىن باستاما كوتەرىلىپ، 1 سىنىپ ارەڭ اشىلعان. ولار بيىل ءتورتىنشى سىنىپتا. مەكتەپتە باس-اياعى 5 اق قازاق سىنىبى بار ەكەن.
قۇرمانتاي مولداحمەت ۇلى، اتا-انا:
ءوز جەرىندە ءجۇرىپ، ءوز تىلىندە سويلەي الماسا، قازىر قىزىمىز ايتادى، نەگە جىل سايىن ورىس سىنىپتارى شىرىلدامايدى، قازاقتار شىرىلداپ ءجۇرمىز. ءوز ەلىمىزدە، ءوز جەرىمىزدە ءجۇرىپ، بۇل بەلگىلى نارسە.
التاي جەڭىس ۇلى، اتا-انا:
ءبىز 50 دە 50 گە تالاسىپ وتىرعان جوقپىز. ورىس سىنىپتارى قانشا اشىلسا دا اشىلا بەرسىن. بىزگە تەك 2 قازاق سىنىبى مەن ءبىر دايىندىق سىنىبى اشىلسا بولدى.
نەشە قازاق سىنىبىن اشۋ ديرەكتوردىڭ ءوز ەركى دەگەن اتا-انالار جاقسى مەكتەپتە ءبىزدىڭ دە بالالارىمىز ءبىلىم السىن دەيدى. ال 1600 شاكىرتى بار ءبىلىم ورداسىنىڭ باسشىلارى شامامىز كەلگەنشە قازاق ءبولىمىن اشىپ بەردىك، بىزدە باسقا ورىن جوق دەپ وتىر.
وسىنى ايتىپ بولىپ مەكتەپتىڭ جەتىستىگىن جىپكە تىزە جونەلگەن باسشى مەكەمە قالا اكىمىنىڭ تىكەلەي قامقورلىعىندا دەگەندى تىلگە تيەك ەتتى. ونەرگە دە باۋلىپ، ءبىلىم دە بەرەتىن مەكتەپتىڭ قازاق تىلدىلەرگە ەسىگىن تارس جاپقانىنا اتا-انالار نارازى. تىم بولماسا، ەكى-ءۇش سىنىپ اشىپ بەرسە دەپ ارمانداپ وتىر.
جاراس نيازبەك، ءتىلشى:
بۇل - ورىس مەكتەبى، قوسىمشا قازاق مەكتەبىن اشۋعا قاۋقارىمىز جەتپەيدى دەگەن مەكتەپ ديرەكتورىنىڭ ءسوزىن اتا-انالار جوققا شىعارىپ وتىر. ولار، ءتىپتى، باستاۋىشتان كەيىنگى بالالارىنىڭ تاعدىرىنا الاڭداۋلى.
«31-ارنا»