تويىما شاقىرامىن، قالاماقىڭىز قانشا؟

استانا.قازاقپارات - «مەن قايرات نۇرتاسقا عاشىقپىن، دالىرەك ايتقاندا ونىڭ ونەرىنە عاشىقپىن. ءوزى سونداي سۇيكىمدى، تارتىمدى، مەن ونىڭ بارلىق ءانىن جاتقا بىلەمىن. ارينە، قايرات اتاقتى ءانشى بولعان سوڭ وعان مەن سەكىلدى عاشىق قىزدار كوپ- اق. مەندە سولاردىڭ ءبىرىمىن.

 ەستۋىمشە قايراتتىڭ سۇيگەن جارى، بالالارى بار ەكەن. مەن ءوزىمنىڭ سۇيىكتى انشىمە شىن جۇرەگىممەن باقىت تىلەيمىن. مەنىڭ ءبىر عانا ارمانىم بار. قايرات نۇرتاس مەنىڭ ۇيلەنۋ تويىمدا ءان شىرقاعانىن قالايمىن. مەن قازىر ساباقتان بوس ۋاقىتىمدا الماتىداعى «كاۋسار» مەيرامحاناسىندا داياشى بولىپ قىزمەت ەتىپ ءجۇرمىن. قايرات مەنىڭ تويىمدا ءان سالۋ ءۇشىن وسى باستان اقشا جيناپ جاتىرمىن» ، دەيدى «الاش ايناسىنا» حات جولداعان 20 جاستاعى اياجان قالاۋوۆا.

 الماتى قالاسىنداعى «تۇران» كوللەدجىندە وقيتىن اياجان سەكىلدى جۇزدەگەن قىز وزدەرىنىڭ ۇزاتىلۋ، ۇيلەنۋ تويلارىندا قايرات نۇرتاستىڭ ءان سالعانىن قالايدى. سونداي- اق ءدال قايرات سەكىلدى قازاقتىڭ تويلارىندا «جىگىتتەر» توبى، بۇركىت، ايقىن، زاتتىبەك، اسان پەردەش سەكىلدى انشىلەر ۇلكەن سۇرانىسقا يە.

 ءدال قازىر ناعىز تويلاردىڭ مەزگىلى. قالا، اۋىلدارداعى مەيرامحانالار الداعى 3-4 ايداعى دەمالىس كۇندەرىنە تاپسىرىس الىپ قويعان. وسىندايدا تويدىڭ كورىگىن قىزدىراتىن شوۋ- بيزنەس وكىلدەرىنىڭ داۋرەنى ءجۇرىپ تۇر. وسى ورايدا Forbes.kz. سايتى وتاندىق شوۋ- بيزنەس پەن توي- بيزنەس نارىعىنداعى تابىستار تۋرالى دەرەكتەر كەلتىرىپ وتىر.

 Forbes.kz. سايتى جازعانىنداي، قازىرگى تاڭدا قازاقستاندىق شوۋ- بيزنەستەگى جۇلدىزداردىڭ رەيتينگى توي- بيزنەستەگى تابىستارىمەن ەسەپتەلەدى. Euro Event Agency مالىمەتتەرىنە سايكەس، وتاندىق شوۋ- بيزنەس نارىعى جىلىنا 10 ميلليون دوللار تابىس تۇسىرسە، ونىڭ %80 توي- بيزنەستەن تۇسەتىن تابىس ەكەن.

قالعان %20 "كورپوراتيۆتى" كەشتەر مەن كونتسەرتتەرگە تيەسىلى. سونىمەن شوۋ- بيزنەستەگى تابىستىلار وندىعىن ءانشى قايرات نۇرتاس باستاپ تۇر.

ەكىنشى ورىندا بۇكىل الەمدى ءتانتى ەتكەن بوكسشى گەننادي گولوۆكين، ءۇشىنشى ورىندا پروديۋسەر، تەلەجۇرگىزۋشى، اكتريسا بايان ەسەنتايەۆا تۇر.

 ودان كەيىنگى ورىندارعا LIDO -  ءانشى، مودەل، ديزاينەر؛ الەكسەي پۋچكوۆ -  پروديۋسەر؛ ديلناز احماديەۆا -  ءانشى، تۆ جۇرگىزۋشى؛ "FM" توبى -  پوپ مۋزىكا توبى؛ الۋا قوناروۆا -  پروديۋسەر؛ ايقىن -  ءانشى؛ «جىگىتتەر» -  پوپ مۋزىكا توبى جايعاسقان.

كونتسەرتتەن تۇسكەن تابىس 20 پايىز.. .

 ساراپشىلاردىڭ پىكىرىنشە ءبىزدىڭ ارتىستەر كونتسەرت وتكىزگەندە زال تولى كورەرمەن جيناۋى وتە سيرەك قۇبىلىس. كونتسەرت زالدارىنا كورەرمەندەردىڭ تولۋى شامامەن 30-50 پايىزدى قۇرايدى. سوندىقتان كونتسەرتتەردەن اسا پايدا تۇسپەيدى. البومدار مەن ءان جيناقتارىنىڭ ساتىلىمىنان دا انشىلەرگە ايتارلىقتاي تيىن تۇسپەيتىن كورىنەدى. ارتىستەر وزدەرىنىڭ ءان جيناقتارىن نەگىزىنەن يميدج ءۇشىن شىعارادى. سونىمەن ورتا ەسەپپەن شوۋ- بيزنەستەگى تابىستىڭ 80 پايىزى ۇيلەنۋ تويلارى، تۋعان كۇن، مەرەي تويلار جانە باسقا دا مەرەكەلەردەن تۇسەدى. الماتىدا قاتارداعى ۇيلەنۋ تويلارىنىڭ وزىنە ارتىستەردى شاقىرۋعا ورتا ەسەپپەن 10 مىڭ دوللار جۇمسالادى ەكەن.

تويدان تۇسكەن تابىس 80 پايىز.. .

 توي- بيزنەستىڭ 90 پايىزىن قازاق ءتىلدى ەسترادا قۇرايدى. ءقازاقتىلدى انشىلەردىڭ شىعارماشىلىعى تويشى قاۋىمعا جاقسى تانىس بولىپ كەلەدى. سوندىقتان قازاق ءتىلدى انشىلەردىڭ تويداعى تابىستارى ورىس ءتىلدى انشىلەردەن قاراعاندا ءبىرشاما جوعارى. ايتالىق قازاق ەستراداسى وكىلىنىڭ ءبىر تويداعى تابىسى 4-6 مىڭ دوللاردى قۇراسا، ورىس ءتىلدى انشىنىكى 3-5 مىڭدى قۇرايدى. ال كورپوراتيۆتى كەشتەردە كەرىسىنشە، ورىس ءتىلدى شوۋ- بيزنەس وكىلدەرى سۇرانىسقا يە بولادى. ەگەر سالىستىراتىن بولساق، ساراپشىلار كەلتىرگەن دەرەكتەرگە ساي، كورپوراتيۆتى كەشتەردە ورىس ءتىلدى انشىلەردىڭ تابىسى 60 پايىزدى، قازاق ءتىلدى انشىلەردىڭ تابىس 40 پايىزدى قۇرايدى.

 ارتىستەردىڭ تابىسىنىڭ كوبى توي- بيزنەستەن تۇسەتىن بولعاندىقتان ورىس ءتىلدى انشىلەر، مۋزىكانتتار قازاقشا ءان جازدىرىپ، بەينەبايان ءتۇسىرىپ، كوبىرەك «نان» تابۋعا تالىپىنىپ جۇرگەن كورىنەدى. سونداي- اق جاس انشىلەر وزدەرىنىڭ تانىمالدىعىن ارتتىرۋ ءۇشىن  TVراديوعا اندەرىن روتاتسيالاۋ ءۇشىن ءبىراز قارجى شىعىندايدى. شامامەن اندەردى روتاتسيالاۋعا ايىنا 20-30 مىڭ دوللار قارجى جۇمسالادى. قازاقستاندا الەمدىك ستاندارتقا ساي ساپالى بەينەبايان ءتۇسىرۋ ورتا ەسەپپەن 20 مىڭ دوللار.

سونىمەن تويدا قالتاسى تومپايۋ ءۇشىن ارتىستەر الدىمەن مىقتى پروديۋسەر ىزدەيدى، سازگەرلەردەن كەمىندە 3-5 مىڭ دوللارعا ءان ساتىپ الادى، ودان كەيىن بەينەبايان تۇسىرەدى. ابدەن تانىمال بولعاندا ولار تويعا شاقىرىلا باستايدى.

 ال ءالى ۇلكەن ساحنادان كورىنە قويماعان، كوپشىلىككە اسا تانىمال ەمەس انشىلەردىڭ تويداعى قالاماقىلارى 300-500 دوللاردان باستالادى.

 بۇگىندە ەلىمىزدەگى تويلارعا وتاندىق ارتىستەردەن بولەك شەتەلدىك جۇلدىزدار دا ءجيى شاقىرىلادى. Eurostar كونتسەرت اگەنتتىگىنىڭ ديرەكتورى الەكسەي پۋچكوۆتىڭ ايتۋىنشا، ونىڭ كومپانياسى شەتەلدىك جانە رەسەيلىك ارتىستەردىڭ قاتىسۋىمەن ەلىمىزدە جىلىنا 60 كونتسەرت ۇيىمداستىرادى ەكەن. پۋچكوۆتىڭ شاقىرتۋىمەن قازاقستانعا نيكول شەرزينگەر، سيارا، Kanye West سەكىلدى الەمدىك جۇلدىزدار كەلگەن. مۇنداي اتاقتىلاردىڭ قالاماقىسى وتكىزىلەتىن مەرەكەلىك شارانىڭ بيۋدجەتىنە سايكەس شامامەن 150 مىڭ دوللاردان 5 ميلليون دوللارعا دەيىن جەتەدى. رەسەيلىك ارتىستەردىڭ قالاماقىسى 100 مىڭ دوللاردى قۇرايدى ەكەن.

ال ەندى اڭگىمەمىزدىڭ باسىنداعى اياجاننىڭ ارمانىنا ورالساق. قايرات نۇرتاسقا حابارلاسىپ، ونىڭ ءبىر تويداعى قالاماقىسى تۋرالى سۇراعانىمىزدا ول الماتىداعى تويعا كەمىندە 5000 مىڭ دولارعا باراتىنىن ايتتى. سونىمەن اياجانعا قايراتتى تويىنا شاقىرۋ ءۇشىن ءالى ءبىراز جۇمىس ىستەۋ كەرەك بولادى.

 

اۆتور: اينۇر سەنبايەۆا