قازاقستان پرەزيدەنتى رەسمي ساپارمەن تاجىكستانعا بارادى

استانا. قازاقپارات - بيىلعى قىركۇيەك ايىندا قازاقستان مەن تاجىكستان پرەزيدەنتتەرىنىڭ دۋشانبەدە وتەتىن كەزدەسۋىنە تىڭعىلىقتى دايىندىق جۇرگىزىلۋدە.

بۇل تۋرالى بۇگىن قازاقستان مەن تاجىكستان سىرتقى ساياسي ۆەدومستۆولارى اراسىنداعى 2014-2015 -جىلدارعا ارنالعان ارىپتەستىك جوسپارىنا قول قويۋ بارىسىندا ق ر سىرتقى ىستەر ءمينيسترى ەرلان ىدىرىسوۆ ايتتى.

 «وسى جىلدىڭ قىركۇيەك ايىندا دۋشانبەدە وتەتىن ەكى ەل باسشىلارى كەزدەسۋىنىڭ جوعارى دەڭگەيدە ۇيىمداستىرىلۋىن كەلىسسوزدەر ناتيجەسى بويىنشا ەل باسشىلىعى مەن ۇكىمەتىنە بايانداپ وتىراتىن بولامىز» ، - دەپ اتاپ ءوتتى ە. ىدىرىسوۆ.

ونىڭ ايتۋىنشا، سوڭعى جىلداردا ەكى ەل اراسىنداعى ارىپتەستىك جىلدام دامىپ، جاڭا دەڭگەيگە كوتەرىلدى. 2013 - جىلى اراداعى تاۋار اينالىمى 700 ميلليون دوللارعا جەتكەن.

«بىزگە تاۋار اينالىمى كولەمىنىڭ ودان ءارى ءوسىرىپ، جۋىق ارادا ءوزارا ساۋدا- ساتتىقتىڭ نومەنكلاتۋراسىن كەڭەيتۋ قاجەت. ءبىزدىڭ ەكىجاقتى پايىمداۋىمىزشا، بۇگىندە ەكى ەل اراسىندا ينۆەستيتسيالىق، كولىكتىك- كوممۋنيكاتسيالىق، اۋىل شارۋاشىلىق، مادەني- گۋمانيتارلىق جانە باسقا دا كوپتەگەن سالالار بويىنشا ۇلكەن الەۋەت بار» ، - دەدى س ءى م باسشىسى.

 ءوز كەزەگىندە تاجىكستان سىرتقى ىستەر ءمينيسترى سيرودجيدين اسلوۆ تاجىكستان مەن قازاقستان اراسىنداعى ارىپتەستىك تۋرالى جان- جاقتى تالداي كەلە، ەكى ەلدىڭ ارىپتەستىگى جاقىن تۋىستىق، دوستىق نەگىزدە قۇرىلعانىن اتاپ ءوتتى.

 «كەزدەسۋ بارىسىندا ءبىز تاجىكستان مەن قازاقستاننىڭ قارىم- قاتىناسى قۇدايى كورشىلىك، سەنىم مەن ارىپتەستىك اياسىندا ءوربىپ كەلە جاتقانىنا تاعى ءبىر كوز جەتكىزدىك. سوندىقتان قازاقستان ءبىزدىڭ ەلىمىزدىڭ سىرتقى ساياساتىنداعى ەرەكشە قۇرمەتتى ورىندا» ، - دەدى س. اسلوۆ.

اۆتور: ءابۋ- اسقار مەكەش ۇلى