مينيستر قازاقستان حالىقارالىق تۋريزم نارىعىنا ەنە الادى دەپ سانايدى
بۇگىن ماجىلىستەگى ۇكىمەت ساعاتىندا ەلىمىزدەگى تۋريزم سالاسىن دامىتۋ پەرسپەكتيۆالارى جايىندا بايانداعان ق ر پرەمەر- ءمينيسترىنىڭ ورىنباسارى - يندۋستريا جانە جاڭا تەحنولوگيالار ءمينيسترى اسەت يسەكەشيەۆ وسىلاي ءمالىم ەتتى.
ءمينيستردىڭ پايىمىنشا، قازاقستاندا تۋريزم سالاسى قارقىندى دامىپ كەلەدى، دەگەنمەن وندا ءبىرقاتار پروبلەمالىق ماسەلەلەر بارشىلىق. «بۇلار - تۋريزم سالاسىنداعى قىزمەتكە باعانىڭ جوعارىلىعى، ينفراقۇرىلىم مەن سەرۆيستىڭ جەتكىلىكتى تۇردە دامىماۋى، ۆيزا مەن باسقا دا شارالاردىڭ كۇردەلىلىگى. دەگەنمەن، قازاقستاندا حالىقارالىق تۋريزم نارىعىنا ەنۋدىڭ جوعارى پەرسپەكتيۆالارى بار» ، - دەدى ءا. يسەكەشيەۆ.
ءمينيستردىڭ سوزىنە قاراعاندا، حالىقارالىق تۋريزم ءوسىمىنىڭ ۇشتەن ەكى بولىگى كورشىلەس مەملەكەتتەرمەن قامتاماسىز ەتىلەدى. قازاقستان ءۇشىن بۇل شامامەن ون ميلليون تۋريستەردى قامتيدى جانە بۇعان قىتاي، رەسەي، تاياۋ شىعىس پەن ەۋروپانى جاتقىزۋعا بولادى.
«بۇل ءبىزدىڭ ەلىمىز ءۇشىن ىقتيمال الەۋەت بولىپ تابىلادى. سوندىقتان دا، پرەزيدەنتتىڭ جولداۋىندا ۇكىمەتكە تۋريزمدى دامىتۋعا جۇيەلى قادام جاساۋ تۋرالى تاپسىرما بەرىلگەن بولاتىن. ءبىز وسىعان وراي، ەلىمىزدە تۋريزمدى دامىتۋدىڭ 2020 - جىلعا دەيىنگى تۇجىرىمداماسىن ازىرلەدىك ءارى ونى ەنگىزە باستادىق» ، - دەيدى ءا. يسەكەشيەۆ.
ەلىمىزدەگى تۋريزم سالاسىن دامىتۋ پەرسپەكتيۆالارى جايىندا بايانداعان مينيستر اسەت بۇل باعىتتاعى ءۇش سەناري تۋرالى ايتتى.
«بۇگىنگى تاڭدا الەمدىك ەكونوميكا دامۋى وڭاي بولىپ وتىرعان جوق، جاھاندىق جاعدايدىڭ ودان ءارى قالاي ءوربيتىنى دە ازىرشە تۇسىنىكسىز. وسىنىڭ ءبارى ەل بيۋدجەتىنە اسەر ەتپەي قويمايدى. سوندىقتان دا، ءبىز تۋريزم سالاسىنىڭ دامۋىنا قاتىستى ىقتيمال ءۇش ستسەناريدى نەگىزگە الدىق. ونىڭ ءبىرىنشىسى - پەسسيميستىك ستسەناري، بۇل رەتتە بۇگىنگى دەڭگەيمەن دامۋ بولجانىپ، مەملەكەتتىك قولداۋ سونشالىقتى قامتىلمايدى. وسىلاي بولسا، جەكە سەكتور ينۆەستيتسياسى 2020 - جىلعا قاراي شامامەن 2 ميلليارد دوللار قۇراۋى مۇمكىن، ال تۋريزمنىڭ جالپى ىشكى ونىمدەگى ۇلەسى 1 پايىزعا جەتىپ، 56-60 مىڭعا تارتا جۇمىس ورىندارى قۇرىلادى.
ەكىنشى نۇسقا - مەملەكەتتىك جانە جەكە سەكتور بويىنشا ينفراقۇرىلىمعا ينۆەستيتسيا قارالادى. وندا ءبىز جەكە سەكتوردان 4-4,5 ميلليارد دوللار ينۆەستيتسيا كۇتەمىز، ال تۋريزمنىڭ جالپى ىشكى ونىمدەگى ۇلەسى 1,5 پايىزدى قۇراپ، 150-170 مىڭ جۇمىس ورنى قۇرىلماق. بۇل - بىزگە مەيلىنشە جاقىن، مەيلىنشە شىنايى ستسەناري» ، - دەدى ءا. يسەكەشيەۆ.
سونىمەن قاتار، مينيستر وپتيميستىك ستسەناريگە دە توقتالىپ ءوتتى. بۇل رەتتەگى بولجام بويىنشا تۋريزمنىڭ جالپى ىشكى ونىمدەگى ۇلەسى ءتورت پايىزعا دەيىن جەتەدى. ال جەكە ينۆەستيتسيالار كورسەتكىشى التى ميلليارد دوللاردى قۇراپ، ءۇش ءجۇز مىڭعا تارتا جۇمىس ورىندارى قۇرىلۋى مۇمكىن.
«بۇل ستسەناريدە تۋريزم سالاسىندا مەملەكەتتىك قولداۋ بارىنشا ارتادى، ونىڭ ىشىندە قارجىلىق قولداۋ دا كەڭىنەن قامتىلۋى شارت» ، - دەيدى ءا. يسەكەشيەۆ.
(پەسسيميزم- كۇماندى تۇرعىدا دۇنيەنى قابىلداۋ ءتۇرى. وپتيميزم - وپتيميزم بولاشاققا جارقىن سەنىممەن قاراۋ.)
اۆتور: قانات مامەتقازى ۇلى
