بەكبولات تىلەۋحان: اۋدارىسپاق ونەرىنىڭ ايرىقشا دامىعان جەرى - قازاق توپىراعى
بۇل تۋرالى nurotan.kz پورتالىندا جاريالاندى.
«اۋدارىسپاق - بۇل سوعىس ونەرىنىڭ نەگىزى. ال اۋدارىسپاق - تەك قازاقتىكى دەپ ايتۋعا بولمايدى. بۇل ازياداعى تۇركى جۇرتىنا، تەك تۇركى ەمەس پارسى جۇرتىنا دا ورتاق ونەر. ءبىراق، اۋدارىسپاق ونەرىنىڭ ايرىقشا دامىعان جەرى - قازاق توپىراعى ەكەنىن ايتا كەتۋ كەرەك» ، - دەپ ءوز پىكىرىن ءبىلدىردى.
ونىڭ ايتۋىنشا، كەشەگى وتكەن باتىر بابالارىمىز قىلىش سىنىپ، نايزا مايىرىلىپ، قاق ايىرىلعان كەزدە بىلەگىنە سەنىپ ات ۇستىندە اۋدارىسىپ، تاقىم تارتىسقان.
«كەشەگى كۇنگە دەيىن سول ونەر كوبىنەسە اۋىل اراسىنداعى شوپاندار تويى سەكىلدى شارالار شەڭبەرىندە شەكتەلىپ كەلدى. بۇگىنگىدەي رۋحاني قۇندىلىقتاردىڭ بارلىعى جاڭعىرىپ جاتقان كەزدە وسى اۋدارىسپاقتىڭ، سونداي- اق كوكپاردىڭ الەمدىك دەڭگەيگە جەتۋى، ياعني ازيا چەمپيوناتىنىڭ وتكىزىلۋى - ەلدەگى ەكونوميكالىق الەۋەتتىڭ، تىنىشتىقتىڭ، جۇرگىزىلىپ جاتقان سارابدال ساياساتتىڭ ارقاسى ەكەنىن ايتۋىمىز كەرەك» ، - دەدى ول.
استانادا تۇڭعىش رەت وتكىزىلىپ وتىرعان چەمپيونات بۇدان كەيىن قىتايدا ءوتۋى مۇمكىن ەكەنىن جەتكىزگەن بەكبولات تىلەۋحان چەمپيوناتتىڭ ەرەجەسىنە دە توقتالا كەتتى.
«الداعى چەمپيوناتتار ءبىزدىڭ دايىنداعان ەرەجەمىزدىڭ نەگىزىندە وتەتىن بولادى. سوندىقتان ءبىز ويىن ەرەجەسىن جاساۋ بارىسىندا اۋعاننىڭ دا، وزبەكتىڭ دە، قىرعىزدىڭ دا شارتتارىن بارىنشا ەسكەردىك. ءبىراق، ءبىر ەرەكشەلىگى - ويىننىڭ تەرمينى قازاق تىلىندە بولادى. العاشقى ازيا چەمپيوناتىن وتكىزگەن الاڭ يەسى رەتىندە وسىنداي قۇرمەتكە يە بولىپ وتىرمىز» ، - دەدى ۇلتتىق ويىنداردىڭ جاناشىرى.
