ۋكراينا- رەسەي شەكاراسىنا قامال سالۋدى ۇسىندى

استانا. قازاقپارات - دنەپروپەتروۆسك وبلىستىق اكىمشىلىگىنىڭ باسشىسى، وليگارح (ءىرى بيزنەسىمەن، باي) يگور كولومويسكي ۋكراينا پرەزيدەنتى پەتر پوروشەنكوعا دونەتسك، لۋگانسك جانە حاركوۆ وبلىستارىنىڭ رەسەيمەن شەكاراسىنا قامال سالۋدى ۇسىندى.

ونىڭ پرەزيدەنت اكىمشىلىگىنە جولداعان ۇسىنىسى بويىنشا، جارتى جىلدا 1900 كيلومەترگە سوزىلاتىن شەكاراعا اسا بەرىك تەمىردەن بيىكتىگى ەكى مەترلىك قامال سالۋعا بولادى.

 بۇعان قوسا قامال ۇستىنە ەلەكتر توگىن جۇرگىزىپ، قامال جانىنان شۇڭقىر قازىپ، مينالاپ تاستاۋ ۇسىنىلعان. جوبا قۇنى 100 ميلليون ەۋروعا باعالانىپ وتىر. وعان كەتەتىن قارجىنىڭ ءبىرازىن كولومويسكي ءوزى قۇرعان «دنەپر-1» قورى بەرۋگە دايار.

يگور كولومويسكي بۇل ۇسىنىسىن فينليانديانىڭ س س س ر- دەن قورعانۋ ءۇشىن سالعان «ماننەرگەيم سىزىعىمەن» جانە يزرايلدىڭ ەگيپەتپەن شەكاراسىنا ورناتقان قابىرعاسىمەن تەڭەستىرەدى. وليگارحتىڭ ايتۋىنشا، ۋكراينا دا ءوزىن پۋتين باسقارعان رەسەيدەن قورعاۋ ءۇشىن مۇنداي قامال سالۋى ءتيىس.

 «ازاتتىق» سايتى