مۇسىلمان فۋتبولشىلار رامازاندى قالاي وتكىزەدى؟

استانا. قازاقپارات - تورتكۇل دۇنيەنىڭ نازارىن تەڭبىل دوپقا اۋدارعان اتاقتى فۋتبول چەمپيوناتى باستاعالى الەم مۇسىلماندارى دا الاڭداي باستادى. جاسىل الاڭدا ويىن كورسەتەتىن باۋىرلاستارىنىڭ اۋىز بەكىتىپ، ورازا ۇستاۋى - جان الىپ، جان بەرىسكەن جانتالاس ويىن ۇستىندە ناعىز سىناق بولعالى تۇر،

 دەپ جازادى muslim.kz.

وسى ايدىڭ 28 - جۇلدىزى كۇنى باستالاتىن رامازاننىڭ جارتىسىنا جۋىق ۋاقىتى الەم چەمپيوناتىنىڭ ابىگەرىمەن تۇسپا- تۇس كەلەدى. بۇنداي سايكەستىك سوڭعى رەت 1986 - جىلى بولعان ەكەن. OnIslam.net باسىلىمىنىڭ حابارلاۋىنشا، فۋتبولشىلاردىڭ كەيبىرى مي قايناتار شىلدەنىڭ اپتابىنا قاراماستان اۋىز بەكىتەتىندەرىن مالىمدەسە، ەندى بىرەۋلەرى وزدەرىنىڭ ۇستازدارىنا قازاسىن كەيىن وتەۋگە بولماس پا ەكەن دەگەن ساۋال جولداۋدا.

ءدۇبىرلى دوپ دوداسىنىڭ چەمپيوندىعىنا تالاساتىن قۇرامالار قۇرامىندا مۇسىلمان ويىنشىلارىنىڭ قاتارى دا ءبىرشاما. ماسەلەن، فرانسيا قۇراماسىندا بەلگىلى ويىنشىلارى - «رەال» ساپىنداعى كاريم بەنزەما مەن «ارسەنالدىق» باكاري سانيا، «نيۋكاسلدىق» مۋسسا سيسسوكو مەن «ليۆەرپۋلدىك» مامادۋ ساحو ەسىمدى ويىنشىلار - بەس ۋاقىت نامازىن وقىپ، اسىل ءدىنىمىزدى بەرىك ۇستانىپ جۇرگەندەر.

سونداي- اق، باۋىرلاستارىمىزدىڭ قاتارىن كوت- ديۆۋارلىق اعايىندى يايا مەن كولو تۋرە جانە اعىلشىن كلۋبتارىندا ونەر كورسەتەتىن جەرۆينيۋ مەن شەيح توتە دە تولىقتىرادى.

جانە دە بەلگيا قۇراماسىنىڭ بەلدى ويىنشىلارى مارۋان فەللايني مەن مۋسسا دەمبەلە دە، شۆەيتساريالىق دجەردان شاكيري دە، گەرمانيا قۇراماسىنداعى مەسۋت وزيل مەن سامي حەديرالار - ماڭدايىن ساجدەگە ۇسىنعان مۇسىلماندار

ايتا كەتەيىك، يۆۋارلىق كولو تۋرە ەشقانداي قيىندىققا قاراماستان، ورازا ۇستايتىنىن قازىردەن مالىمدەپ قويدى. «ءوزىم ءۇشىن ورازا رامازاننىڭ العاشقى بەس كۇنى عانا قيىندىق تۋدىرادى. كەيىننەن اعزامىز ۇيرەنىسىپ كەتەدى. سول شاقتاردا مەن ءوزىمدى كەرەمەت سەزىنەمىن» ، - دەيدى ول.