فرانسيا قازاقستان ەكونوميكاسىنداعى ەڭ ءىرى ءتورت ينۆەستوردىڭ ءبىرى
جالپى وتىرىس بارىسىندا كوتەرىلگەن ماسەلەلەر مەن قابىلدانعان شەشىمدەر ينۆەستورلار كوڭىلىنەن شىققاندىعى سەزىلەدى. اتالعان وتىرىسقا قاتىسقان «Total»كومپانياسىنىڭ ۆيتسە- پرەزيدەنتى يۆ- لۋي دارريكاررەردىڭ پىكىرى دە وسىعان توعىسىپ جاتىر.
«قازاقستان ۇكىمەتىنىڭ ەلدەگى ينۆەستيتسيالىق احۋالدى جاقسارتۋعا قاتىستى جاساپ جاتقان بارلىق شارالارىن قولدايتىندىعىمدى بىلدىرەمىن، دەدى ول «ەگەمەن قازاقستان» باسىلىمىنا بەرگەن سۇحباتىندا. - سەبەبى، ءبىز قازاقستانمەن ارىپتەستىك قارىم- قاتىناستا تۇسكەننەن بەرى بۇل ەلدىڭ جاعدايى جىلدان- جىلعا جاقسارا تۇسكەندىگىنە، قابىلدانعان شەشىمدەردىڭ ومىردە ناقتى جۇزەگە اسىپ جاتقاندىعىنا كۋا بولىپ ءجۇرمىز. ونىڭ ۇستىنە قازاق- فرانسۋز بىرلەسكەن جوبالارى ارتا تۇسۋدە. سونىڭ ناتيجەسىندە فرانسيا قازىرگى كۇنى قازاقستان ەكونوميكاسىنداعى ەڭ ءىرى ءتورت ينۆەستوردىڭ ءبىرى بولىپ وتىر.
بۇگىنگى كۇنى قازاقستاندا 150 دەن استام فرانسۋز كومپانيالارى تابىستى جۇمىس ىستەۋدە. ولار ەل ەكونوميكاسىنىڭ اۆياعارىش، مۇناي- گاز، كولىك سەكىلدى ماڭىزدى سالالارىندا ەڭبەك ەتىپ كەلەدى. 11 جوبا قازىردىڭ وزىندە جۇزەگە اسىرىلىپ ۇلگەردى. ولاردىڭ قاتارىندا «ەيرباس» كومپانياسى ءۇشىن بولشەكتەر شىعارۋ، سونداي- اق لوكوموتيۆتەر، ەلەكترونيكالىق زاتتار، سۋ تازارتقىش قۇرالدار جانە فارماتسيەۆتيكا مەن تاماق وندىرىسىنە قاجەتتى قۇرالدار جانە ءدارى- دارمەكتەر بار.
ءبىز الداعى ۋاقىتتا دا قازاقستانمەن جۇمىس ىستەي بەرۋگە ءازىرمىز. ويتكەنى، قازاقستان ينۆەستورلارعا ءتيىستى جەڭىلدىكتەردى قاراستىرۋمەن قاتار قوسىمشا قۇن سالىعى مەن اكسيزدەن باسقا، بارلىق سالىقتار مەن تولەمدەردىڭ مولشەرلەمەلەرىنە قاتىستى زاڭنامانىڭ تۇراقتىلىعىنا كەپىلدىك بەرىپ وتىر. ونىڭ ۇستىنە مەملەكەت باسشىسى ينۆەستورلار ءۇشىن مەملەكەتتىك مەكەمەلەرمەن جۇمىس كەزىندە «ءبىر تەرەزە» قاعيداتىنىڭ ەنگىزىلەتىندىگىنەن حاباردار ەتتى. بۇدان بولەك، ينۆەستورلاردىڭ قۇقىقتارى مەن مۇددەلەرىن قورعاۋدى قامتاماسىز ەتۋ ءۇشىن «ينۆەستيتسيالىق ومبۋدسمەن» ينستيتۋتى زاڭنامالىق دەڭگەيدە ەنگىزىلەتىندىگىن ايتتى. وسى جاعدايلار بىزدەردى قاناتتاندىرىپ وتىر.
