اۋدارىسپاقتان ازيا چەمپيوناتى: باس جۇلدە - التىن بەلدىك جانە اۆتوكولىك

استانا. قازاقپارات - اۋدارىسپاقتان ازيا چەمپيوناتىندا ءابسوليۋتتى چەمپيوننىڭ «التىن بەلبەۋى» ساراپقا سالىنىپ، باس جۇلدەگە تەمىر تۇلپار تىگىلەدى.

بۇل تۋرالى بۇگىن اۋدارىسپاقتان 1-اشىق ازيا چەمپيوناتىنىڭ ۇيىمداستىرىلۋىنا وراي وتكەن بريفينگتە ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان ءمالىم ەتتى.

«بۇل تۇڭعىش رەت تاريحتا وتكەلى تۇرعان جارىس. بۇرىن-سوڭدى اۋدارىسپاقتان مۇنداي حالىقارالىق دارەجەدەگى شارا بولعان ەمەس. بۇل جارىسقا الەمنىڭ 12 ەلى ءوز وتىنىشتەرىن ءبىلدىرىپ، ونىڭ 11 ەلى كەلدى»، - دەدى ول.

ونىڭ اتاپ وتۋىنشە، اۋدارىسپاق ات ۇستىندەگى كوشپەلى بابالارىمىزدىڭ سوعىس ونەرىنىڭ بۇگىنگى كۇنگە جەتكەن ايرىقشا سالاسى، ءداستۇرى دەپ ايتۋعا بولادى.

«وسى بايراقتى باسەكەگە 11 مەملەكەتتىڭ قۇرىش قولدى، تاقىمى تاستاي بولعان پالۋاندارى قاتىسۋعا نيەت ءبىلدىرىپ وتىر. بۇل جوباعا قىتاي، رەسەي، تۇركيا، ۆەنگريا، اۋعانستان، قىرعىزستان، تاجىكستان، وزبەكستان، ازەربايجان، موڭعوليا جانە قازاقستاننىڭ سايدىڭ تاسىنداي ىرىكتەلگەن سپورشىلارى اراسىنان ازيا قۇرلىعىنداعى اۋدارىسپاقتان ەڭ مىقتى پالۋان انىقتالادى.

چەمپيونات 70, 90 كەلىگە دەيىن جانە 90 كەلىدەن جوعارى سالماق دارەجەلەرى بويىنشا وتەدى. جارىستىڭ سوڭىندا جەڭىسكە جەتكەن پالۋاندار ابسوليۋتتى چەمپيون اتاعىن ساراپقا سالاتىن بولادى. ءدۇبىرلى دودانىڭ باس جۇلدەسى «التىن بەلدىك» جانە اۆتوكولىك»، - دەدى ب. تىلەۋحان.

ايتا كەتەيىك، اۋدارىسپاقتان ازيا چەمپيوناتى ەرتەڭ ەلورداداعى «قازانات» يپپودرومىندا باستالادى.

اۆتور: مارلان جيەمباي