ن. نازاربايەۆتىڭ ينۆەستيتسيالىق كليماتتى جەتىلدىرۋ باعىتىنداعى زاڭعا قول قويۋى ءبىزدى قاناتتاندىردى - ە ق د ب پرەزيدەنتى

استانا- بۋراباي. قازاقپارات - بۇدان بۇرىن حابارلاعانىمىزداي، بۋراباي كەنتىندە ەلباسى نۇرسۇلتان نازاربايەۆتىڭ توراعالىعىمەن قازاقستان پرەزيدەنتىنىڭ جانىنداعى شەتەل ينۆەستورلارى كەڭەسىنىڭ جالپى وتىرىسى وتكەن بولاتىن.

وندا ەلىمىزدەگى ينۆەستيتسيالىق احۋالدى جاقسارتۋ، ينۆەستورلاردىڭ قۇقىقتارىن قورعاۋ جونىندەگى شارالار، سونداي- اق، يندۋستريالاندىرۋدىڭ ەكىنشى بەسجىلدىعى شەڭبەرىندە ينۆەستيتسيالاۋ جانە تەحنولوگيالار ترانسفەرتى ماسەلەلەرى تالقىلانعان ەدى. وسىناۋ القالى جيىن بارىسىندا ق ر پرەزيدەنتى نۇرسۇلتان نازاربايەۆ «ينۆەستيتسيالىق كليماتتى جەتىلدىرۋ ماسەلەلەرى جونىندەگى قازاقستان رەسپۋبليكاسىنىڭ ءبىرقاتار زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭعا قول قويعان بولاتىن. كەڭەسكە قاتىسقان ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيدىڭ پىكىرىنشە، قازاقستان مەملەكەتىنىڭ باسشىسى قول قويعان زاڭ شەڭبەرىندە ينۆەستورلارعا ۇلكەن جەڭىلدىكتەر جاسالىپ وتىر.

 «بۇل شەشىم ءبىزدى قاناتتاندىرىپ تاستادى. وسىعان سايكەس قازاقستان ەكونوميكاسىنا قۇياتىن ينۆەستيتسيامىزدىڭ كولەمىن ۇلعايتۋ جونىندە ۇيعارىم جاسادىق. جالپى، ەۋروپا قايتا قۇرۋ جانە دامۋ بانكى قازاقستان ەكونوميكاسىنداعى ءىرى ينۆەستورلاردىڭ ءبىرى بولىپ تابىلادى. سوڭعى 20  جىلدىڭ ىشىندە ءبىز قازاقستانعا 6,85 ميلليارد دوللاردىڭ قارجىسىن ينۆەستيتسيالادىق. ال پرەزيدەنت نۇرسۇلتان نازاربايەۆ قول قويعان جاڭا زاڭ مەنىڭ ويىمشا، وسى ەلگە قۇيىلاتىن ينۆەستيتسيا كولەمىن الدەقايدا ارتتىرۋعا سەبەپشى بولىپ، جاڭا ينۆەستورلاردىڭ كەلۋىنە جول اشۋعا ءتيىس. ويتكەنى، زاڭدا ينۆەستورلار ءۇشىن ءبىرقاتار جاعىمدى جەڭىلدىكتەر جاسالىنعان. ماسەلەن، وتىرىس بارىسىندا مەملەكەت باسشىسىنىڭ اتاپ كورسەتكەنىندەي، سالىق جەڭىلدىكتەرىمەن قاتار، يندۋستريالاندىرۋدىڭ جاڭا باعدارلاماسىن جۇزەگە اسىرۋ ءۇشىن مەملەكەتتىك بيۋدجەتتەن 5  جىل بويىنا شامامەن 600 ميلليارد تەڭگە بولىنسە، ۇلتتىق قوردان تاعى 1 تريلليون تەڭگە ءبولۋ تۋرالى شەشىم قابىلدانىپتى. وسىعان قوسىمشا نۇرسۇلتان نازاربايەۆتىڭ ءوزى دۇنيەجۇزىلىك بانكپەن، ەۋروپا قايتا قۇرۋ جانە دامۋ بانكىمەن، ازيا دامۋ بانكىمەن، سونداي- اق، يسلام بانكىمەن نەگىزدەمەلىك كەلىسىمگە قول قويىلعاندىعىن اتاپ كورسەتتى. دەمەك ءبىز ەل ەكونوميكاسىنا ينۆەستيتسيا تارتۋدى ىنتالاندىرۋ جونىندە مەملەكەتپەن سەنىمدى ارىپتەستىك قاتىناس ورناتىپ وتىرمىز. بۇل ارىپتەستىك ەكى جاققا بىردەي تيىمدىلىك بەرەتىندىگىنە سەنىم بىلدىرەمىن» ، دەيدى ەۋروپا قايتا قۇرۋ جانە دامۋ بانكىنىڭ پرەزيدەنتى.

 

«ەگەمەن قازاقستان»