اۋىل مەدبيكەسى پرەمەر-ءمينيستردىڭ العىسحاتىن الدى

ورال. قازاقپارات - بۇگىن وبلىستىق قازاق دراما تەاترىندا مەديتسينا قىزمەتكەرلەرىنىڭ كۇنىنە ارنالعان سالتاناتتى جيىن بولدى.

وندا وبلىس اكىمىنىڭ ورىنباسارى باقتيار ماكەننىڭ اتاپ وتكەنىندەي، ەلباسى ءوز جولداۋىندا مەديتسينالىق كومەكتىڭ قولجەتىمدى جانە ساپالى بولۋىنا باسا نازار اۋداردى.

مەديتسينا قىزمەتكەرلەرى الدىندا تۇرعان باستى ماقسات-مىندەت تە وسى.

وڭىردەگى دەنساۋلىق ساقتاۋ سالاسىنىڭ تاريحىنا توقتالعان ب. ماكەن بولاشاقتا وبلىستىڭ اۋىل-اۋداندارىنداعى مەديتسينالىق مەكەمەلەردىڭ بارىنە جاڭا كولىك بەرىلەتىنىن جەتكىزدى.

قازىرگى تاڭدا دەنساۋلىق ساقتاۋ ءىسىنىڭ قول جەتكەن تابىستارى ۇشان-تەڭىز. وعان نەيروحيرۋگ بەكەجان ترايسوۆ، كارديوحيرۋرگ جانايدار قازتۋعانوۆ باستاعان بىلگىر دارىگەرلەردىڭ جاساپ جاتقان كۇردەلى وتالارى دالەل. وبلىس دارىلەرلەرىنىڭ جاڭا تەحنولوگيانى يگەرۋى ارقاسىندا ومىرگە 500 گرام سالماقپەن تۋىلعان شارانالار جەتىلىپ كەتىپ جاتىر. وتكەن جىلى وبلىس مەديتسيناسىن دامىتۋعا 19 ميلليارد تەڭگە ءبولىندى. ءولىم-ءجىتىم سوڭعى ءۇش جىلدا قان اينالىم جۇيەلەرى اۋرۋلارىنان - 20، قاتەرلى ىسىكتەن - 8,7، تۋبەركۋلەز اۋرۋىنان 40 پايىزعا تومەندەگەن.

سالتاناتتى شارانىڭ ەكىنشى ءبولىمى وسىنداي قىرۋار جۇمىستى اتقارىپ جۇرگەن دارىگەرلەردى ماراپاتتاۋعا ارنالدى. ق ر پرەمەر-ءمينيسترى كارىم ءماسىموۆتىڭ العىسحاتى شىڭعىرلاۋ اۋىلدىق مەديتسينالىق پۋنكتتىڭ مەدبيكەسى التىناي سارتوۆاعا بەرىلدى. وبلىس اكىمىنىڭ العىسحاتىنا بەس دارىگەر يە بولدى. ولاردىڭ ىشىندە اقجايىق اۋداندىق تۋبەركۋلەز اۋرۋحاناسىنىڭ دارىگەرى بالزيرا سۇلتانوۆا، №5 قالالىق ەمحاناسىنىڭ دارىگەرى سارا بەكقوجا بار.

وبلىستىڭ 40 دارىگەرى ءار ءتۇرلى ماراپاتقا يە بولدى. «ق ر دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىنە وبلىسقا بەلگىلى دارىگەرلەر يرينا سۋحانوۆا، بەكەت مىرزاحمەتوۆ، نۇرجامال جۇماعۇلوۆا، نيكولاي دميتريەنكو يە بولدى. «ق ر دەنساۋلىق ساقتاۋ ءىسىنىڭ ۇزدىگى» توسبەلگىسىمەن، ق ر دەنساۋلىق ساقتاۋ ءمينيسترىنىڭ قۇرمەت گراموتاسىمەن، ءمينيستردىڭ العىسحاتىمەن بارلىعى 21 دارىگەر ماراپاتتالدى.

بيىل وبلىستا ءبىرىنشى رەت وتكەن «تانۋ» بايقاۋى 18 دارىگەر مەن 5 مەدبيكەنى ۇزدىك دەپ تانىدى. «كاسىبىنە ادالدىعى ءۇشىن» اتالىمى بويىنشا بۇگىندە 75 جاسقا تولىپ وتىرعان باقتىعالي احمەتوۆ ۇزدىك تانىلدى.

ارداگەر دارىگەردىڭ يىعىنا شاپان جابىلىپ، سىي-سياپاتتار جاسالدى. «مەديتسينا سالاسىنداعى يننوۆاتسيالىق تەحنولوگيالاردى وڭتايلى پايدالانعانى ءۇشىن» اتالىمى بويىنشا ناتاليا لوبانوۆا، «ادام ومىرىنە اراشا بولىپ، ءساتتى وتا جاساعانى ءۇشىن» اتالىمىنا بەكەجان ترايسوۆ، تەلمان يحسانوۆ، اقسالقىن نۇرجانوۆا، «ەمدەلۋشىلەردى قابىلداۋ جۇمىستارىن ساپالى ۇيىمداستىرعانى ءۇشىن» اتالىمىنا جانىبەك اۋدانىنىڭ مەدبيكەسى ايگۇل نىعمەتوۆا يە بولدى.

29 - ءساۋىر - 10 - ماۋسىم ارالىعىندا وبلىس تۇرعىندارى اراسىندا جاريالانعان «پاتسيەنت داۋسى» اۆتورلىق جوباسىنىڭ ناتيجەسى جاريالاندى.

ورال قالاسى بويىنشا وبلىستىق كارديولوگيالىق ورتالىقتىڭ كارديوحيرۋرگى جانايدار قازتۋعانوۆ، ال اۋداندار بويىنشا ءبورلى اۋداندىق اۋرۋحاناسىنىڭ ديرەكتورى، حيرۋرگ ماقسوت بايچەركەشوۆ ەڭ ۇزدىك دارىگەر اتاندى. اق جەلەڭدى ابزال جاندارعا گۇل شوقتارى سىيلانىپ، جىل بويعى ەڭبەكتەرى ەلەنگەن كۇن ونەر شەبەرلەرىنىڭ كونسەرتىمەن اياقتالدى.

اۆتور: ەلجان ەرالى