قۇمار ويىندى قويا الماي ءجۇرمىن

استانا. قازاقپارات - «ەت جەسەڭ تىسىڭە، جەمەسەڭ تۇسىڭە كىرەتىنى» سەكىلدى كازينو دا ءدال سولاي، بارساڭ ۇتىلاسىڭ، ال بارماساڭ، قانشاما اقشانى ۋىستاپ ۇتىپ جاتقانىڭ تۇسىڭە كىرىپ، دەگبىرىڭ قاشىپ ۇيىقتاي المايسىڭ.

 سوسىن ەندىگى جولى بارسام جولىم بولادى ەكەن، اقشاعا قارق بولامىن دەپ، ەرىكسىز تاعى دا كازينوعا باس سۇعاسىڭ. بۇل ادەتتىڭ جاقسىلىققا اپارمايتىنىن ءىشىڭ سەزە تۇرا، وزىڭە- ءوزىڭ توقتاۋ سالا المايدى ەكەنسىڭ.

 بۇنىڭ ارتى وكىنىشكە تولى ءتۇپسىز دۇنيە ەكەن. ءجا، ءبارىن باسىنان باستايىن، قۇرمەتتى «الاش ايناسىنىڭ» وقىرماندارى. مەنىڭ باسىما تۇسكەن زوبالاڭ بىلاي باستالعان ەدى.. .

 جالپى مەن كازينوعا ەشقانداي قىزىقپاۋشى ەدىم. جۇمىستا بىرگە ىستەيتىن سىيلاس اعام وسى ويىنعا قۇمار بولعان سوڭ، مەنى وزىمەن بىرگە ەرتىپ الاتىن. «باسىندا مەنىڭ قولىم جاقسى جۇرەدى، اجەپتەۋىر اقشا ۇتامىن، ءبىراق دەرەۋ تۇرىپ كەتە الماي سان سوعىپ قالامىن، سوندىقتان اقشانى ەكى- ءۇش ەسە كوبەيتكەن سوڭ، مەنى دەرەۋ تۇرعىزىپ الىپ كەت» ، - دەپ ايتىپ جۇرەتىن. ونىڭ ۇستىنە وندا تاماق، سىرا، تەمەكى -  ءبارى- ءبارى تەگىن بولعان سوڭ، ءبىر جاعىنان قارىن تويعىزىپ، ەكىنشى جاعىنان ويىن كورىپ قايتامىن دەپ بارىپ ءجۇردىم.

وسىلايشا كارتا ويىنىن بىرتە- بىرتە ۇيرەنە باستادىم. كەيدە الگى اعام «كارتانى سەن اششى، سەنىڭ قولىڭ جەڭىل» دەپ وتىراتىن بولدى. شىنىندا دا وسىنداي كەزدە مەن اشقان كارتادان ۇتىس شىعاتىن. كەيىن ويىنعا دەگەن قۇمارلىعىم ارتىپ، ەندى كازينوعا جالعىز باراتىندى شىعاردىم. باسىندا 200 دوللارمەن كىرىپ، ويىنعا ەكى مىڭ تەڭگە تىگىپ، قولىما ءۇش تۇز، ءبىر كارول ءتۇسىپ، بىردەن 500 دوللار ۇتتىم. دەرەۋ كازينودان شىعىپ، ەرتەسىنە بازارعا بارىپ كيىم الدىم. جارىمدى كينوعا، كافەگە ەرتىپ، سەرۋەندەدىك.

اقشانىڭ وڭاي تابىلاتىن جولىن تاپقان سوڭ، كازينوعا ءجيى باراتىندى شىعاردىم. كەيدە ۇتاسىڭ، كەيدە ۇتىلاسىڭ. ايلىعىڭنىڭ ءبارىن بەرىپ، قينالاتىن كەزدەرىڭ بولادى. دوستارىڭنان، تۋىس- تانىستارىڭنان اقشا سۇراپ، قارىزعا باتاسىڭ. مەنى قويشى، بۇل جەردە نەبىر دوكەيلەر جۇرەتىن كورىنەدى. ولار ءبىز سەكىلدى 200-300 دوللار ەمەس، 25-30, ءتىپتى 50 مىڭ دوللارمەن كەلىپ، قۇمارىن قاندىرىپ جاتادى.

نەگىزى قۇمار ويىن تۇرلەرىن جاقسى بىلسەڭ، ىشكى لوگيكاڭ مىقتى بولسا، كازينودان دا ۇلكەن پايدا تابۋعا بولادى. ماسەلەن رۋلەتكانى بۇرىپ جىبەرگەندە ول قانشالىقتى قاتتى اينالدى، ەندى قاي نومىرگە تۇسەتىنىن مۇقيات قاداعالاۋىڭ كەرەك. الدىمەن ءجىتى زەرتتەپ الىپ، ىشكى ينتۋيتسيا ارقىلى كىشكەنە شار وسى نومىرگە تۇسەدى- اۋ دەگەن ويمەن جوبالاپ بىرنەشە نومىرگە فيشكا سالساڭ ۇتۋعا مۇمكىندىك بار.

 ويىن اۆتوماتىندا دا سول، الدىمەن ويىنشىلار قاي اۆتوماتقا كوبەرىك اقشا سالدى، سونىڭ ءبارىن قاداعالاپ وتىرىپ، كوپ اقشا تۇسكەن اۆتوماتتا ويىندى جالعاستىرۋىڭ كەرەك. ەگەر ول اۆتوماتتا 100 مىڭنان اسا قارجى جينالىپ قالسا، كوپ جاعدايدا ول ۇتقان تابىستىڭ 30-50 پايىزىن شىعارىپ تۇرادى. تەك وسى كەزدى ءساتتى پايدالانۋىڭ كەرەك. بۇل جەردە ءبىلىم، ءجىتى زەرتتەۋ، ىشكى تۇيسىگىڭ مىقتى بولۋى ءتيىس. ديللەر كارتا تاراتقاندا دا سولاي، وتە مۇقيات بولساڭ، ودان دا جاقسى تابىس تابۋىڭا بولادى.

 ءبىراق قانشا دەگەنمەن قۇمار ويىن ناشا سەكىلدى ەلىتىپ تۇرادى. مۇنى جاقسىلاپ مەڭگەرەمىن دەگەنشە، كولىگىڭ، ۇيىڭنەن ايرىلىپ، كرەديتكە كىرىپ كەتۋىڭ عاجاپ ەمەس. دوستارىڭمەن دە قارىز ءۇشىن قارىم- قاتىناسىڭ ءۇزىلىپ، جالقاۋلىققا سالىنىپ (ەگەر كازينودان ۇتاتىن بولسام، جۇمىس ىستەپ كەرەگى نە دەگەن وي تۋادى) ، ۇنەمى سترەسستە، ۇرلىق جاساپ، وتىرىك ايتىپ، ارتى قالاي باسىڭدى قاۋىپ- قاتەرگە تىگىپ العانىڭدى اڭعارماي قالاسىڭ. بۇل اۋرۋ جازىلمايتىن دەرتكە اينالۋى مۇمكىن.

سوندىقتان مەن دە وسى قۇمارلىقتان قۇتىلۋدى ۇيعاردىم. ويتكەنى وسى قۇمارلىقتىڭ سالدارىنان وتباسىمدى قارىزعا باتىردىم. ءۇيدى دە، كولىكتى دە كرەديتكە قويدىم. ەڭ اقىر اياعى ايەلىمنىڭ قۇلاعىنداعى التىندارىن ساتىپ، كازينوعا باردىم. جارقىراعان كەلىنشەگىم، ەكى ۇلىم، اكە- شەشەم، شۇكىر، ءبارى بار، ءبىراق ولار دا مەنەن ابدەن مەزى بولدى، شارشاپ كەتتى. ۇيدەن دە، كۇيدەن دە ايرىلعاننان كەيىن، ايەلىم بالالارىن الىپ، توركىنىنە كەتتى. اجىراسىپ تىندىق. بالالارىما ۋاقىتىلى اليمەنت تولەي الماي، سوتتى بولدىم. دوستارىم دا تەرىس اينالدى. ەڭ سوڭىندا جالعىز قالدىم. شەشەم دە مەنىڭ قىلىعىمنان ءتۇڭىلىپ كەتتى.

جالعىزدىق دەگەن وتە قيىن ەكەن. اسىرەسە وتباسىلى بولىپ ءجۇرىپ، جالعىز قالىپ قالعان وتە اۋىر. ومىردەن باز كەشىپ كەتكىم كەلەدى كەيدە. ۇيدەگىلەر ەندى ماعان كومەكتەسە المايدى. قارىزدارىم قاتتى مازالاپ جاتىر، سوتقا بەردى. كەيدە ءىشىپ كەتىپ، وسىنىڭ ءبارىن ۇمىتقىم كەلەدى. ءبىراق قۇلىندارىمدى ويلاپ، ەسىمدى جيىپ الامىن. قالايدا قۇمار ويىندى قويىپ، وتباسىممەن تاتۋ- ءتاتتى ءومىر سۇرگىم كەلەدى.. . قانداي اقىل بەرەسىزدەر!

تولەگەن

ماقالاعا قاتىستى پىكىرلەر:

قازاق قىز

اللاح قولداپ مۇلدەم جابىلىپ قالسا بولار ەدى! سەبەبى مەنىڭ اعام سول ويىنحاناعا قۇمار! جانۇيامىزدى قارىزعا باتىردى. ءوز وقۋىنىڭ، مەنىڭ وقۋىمنىڭ اقشاسىن ۇتتىرعانى بىلاي تۇرسىن! ءۇيىمىزدى، ماشيناسىن كرەديتكە قويىپ جىبەرگەن! قولىنا  تىيىن تۇسسە الا قاشىپ ويىنحاناعا كەتەتىن! اللاعا شۇكىر قازىر باسىلعانداي!

مارات

سەن DVD فيلمدەر ساتاتىنداردان سۇرا، جاڭادان شىققان وزبەك فيلم بار، كارتوجنيك بالانىڭ، باسىنا تۇسكەن ازابىن، تۋعان ناعاشىسى ۇيىمداستىرادى، كارتانى قويسىن، ەسىن بىلسىن دەپ. سونى كور، فيلمنىڭ اتى كۇيەۋ نەمەسە كۇيىك پە سونداي بىردەڭە، وزبەك تىلىندە، تۇسىنۋگە بولادى. مەنىمشە كارتا قۇمارلارعا ساباق بولسىن دەپ شىعارعان، الدا كور!

ەريك

اسسالاۋماعالەيكۇم جاماعات! مەن 17 جاسار ستۋدەنتپىن. مەن بۇگىن انامنىڭ «ساباقتارىڭدى جاپ» دەپ بەرگەن 20000 تەڭگە اقشاسىن قۇمار ويىن ويناپ ۇتىلىپ قالدىم. ەندى نە ىستەرىمدى بىلمەي تۇرمىن. ءوز- وزىمە «ەگەر دە وسى بىلىقتان قۇتىلسام ەندى قۇمار ويىن وينامايمىن، يسلامعا بەت بۇرامىن» دەپ ۋادە بەردىم. ءبىراق قالاي قۇتىلارىمدى بىلمەيمىن. ءوز وزىمە قول جۇمساعىم كەلىپ تۇر.

ەرجان

تولەگەن تەپسەڭ تەمىر ۇزەتىن ازامات شىعارسىز، باسىڭدى تىك كوتەردە كوز الدىڭا بالاپاندارىڭدى قويىپ تەك جۇمىسقا بەرىلىڭىز قانداي بولماسىن، قارىزدارىڭىزدان قۇتىلىڭىزدا قۇلىنشاقتارىڭىزدى باۋىرىڭىزعا باسىپ ۇزاق عۇمىر ءسۇرىڭىز. بولعان ءىس بولدى، قازاق ايتادى عوي سۇرىنبەيتىن تۇياق جوق، حاننىڭ قىزىندادا قاتەلىك بولادى دەپ. ەگەر اراق شاراپقا باسىڭدى بۇرساڭ ءسىز بالاپاندارىڭىزدى ۇمىتاسىز سونى ەستەن شىعارماڭىز.

...

«الاش ايناسى» گازەتى