استاناعا الەمنىڭ ءار تۇكپىرىنەن اتاقتى سيقىرشىلار جينالماق
بۇل - ەلىمىزدە تۇڭعىش رەت قولعا الىنىپ وتىرعان بىرەگەي جوبا. بۇرىن- سوڭدى قولعا الىنباعان شارانى ۇيىمداستىرۋشىلار ەندى جىل سايىن جۇزەگە اسىراتىنىن ايتىپ وتىر.
رەسمي مالىمەتكە سۇيەنسەك، ەلوردا تورىنە الەمنىڭ تۇكپىر- تۇكپىرىنەن كاسىبي سيقىرشىلار جينالماق. ماگيالىق ونەردىڭ مايىن ىشكەن مايتالماندار ەكى كۇندىك شوۋ- باعدارلاما ۇسىنادى.
فەستيۆال قوناقتارىنىڭ اراسىندا «وتقا تۇسسە جانبايتىن» اعايىندى سافرونوۆتار بار. انالوگى الەمدە جوق ەكسكليۋزيۆتى باعدارلامالارىن وزدەرى دايىندايدى. ولاردىڭ اينالاسىندا رەسەي، جاپون، امەريكا مەملەكەتتەرىنىڭ بىلىكتى ماماندارى جۇمىس ىستەيدى. 2012 - جىلى «ادامدى تىرىدەي ورتەۋ» نومىرلەرىمەن ەلدىڭ زارەسىن ۇشىرعان. تىكەلەي ەفيردەگى ورتتەن ەسىن جيا الماي جۇرگەندەر، كوز الدىنداعى كىسىنى كومىپ نەمەسە ارامەن بولشەكتەپ، ءبولىپ تاستاعاندارىن كورىپ، جاعالارىن ۇستاعان. بۇل ونەردى وسى ۋاقىتقا دەيىن تەلەارنادان نەمەسە عالامتور بەتتەرىنەن كورىپ جۇرگەن استانالىقتار ەندى بەتپە- بەت تاماشالاي الادى.
رەسەيدەگى فوكۋس ونەرىمەن اينالىساتىن جالعىز قىز الەكساندرا سكاچكوۆا دا تىكەلەي ەفير ارقىلى تانىلعانداردىڭ ءبىرى. فوكۋسنيكتەر مەن يلليۋزيونيستەردىڭ «ۋديۆي مەنيا» تەلەجوباسىنىڭ اقتىق سىنىندا توپ جارعان الەكساندرا زالداعى حالىقپەن تىكەلەي جۇمىس ىستەگەندى ۇناتادى. كورەرمەنمەن تىعىز قارىم- قاتىناس جاساي وتىرىپ، قايران قالدىرادى.
«ۋديۆي مەنيا» شوۋىنىڭ 3- ماۋسىمداعى تاعى ءبىر جەڭىمپازى انتون ابراشەكوۆ. ول فوكۋسنيك- مانيپۋلياتور رەتىندە ۇشقان قۇس، جۇگىرگەن اڭدى قىبىر ەتكىزبەيدى.
ون جىلدىق تاجىريبەسى بار تاعى ءبىر تالانت ەلىمىزگە قۋانا- قۋانا قادام باساتىنىن جەتكىزىپتى. «ۋديۆي مەنيا» ، «ۋليچنايا ماگيا» جوبالارىنىڭ قاتىسۋشىسى الەكساندر مۋراتايەۆ قالىڭدىعىن ءاپ- ساتتە تىعىپ قوياتىن ونەرىمەن ەرەكشەلەنەدى.
ون جىلعا جۋىق ەرتەگى الەمىنە جەتەلەپ جۇرگەن تالانتتى ارتيست پاۆەل كاراحتانوۆ تا قۇر كەلمەيدى. كورەرمەندەر بۇل ونەر يەسىمەن رەسەي ارنالارى ارقىلى جاقسى تانىس. ءار جولى باعدارلاما جۇرگىزۋشىلەرى ونىڭ قيمىل- ارەكەتىن وپەراتورلاردىڭ ءتۇسىرىپ ۇلگەرە المايتىندىقتارىن ايتىپ، باس شايقاپتى.
«فەنومەن» ، «تاڭعاجايىپ ادامدار» شوۋىنىڭ جەڭىمپازى، سونداي- اق «ۋكراينانىڭ ءبىرىنشى فەنومەنى» اتانعان ارتەم تيحيەۆيچ - ءوز ونەرىن ەرەكشە باعالايتىنداردىڭ ءبىرى. پسيحولوگيالىق، ماگيالىق قاسيەتتەر مەن ىشكى تۇيسىگى ارقىلى جۇمىس ىستەيدى. ماسەلەن، بالا كەزىندە ارتەم مۋلتفيلم كورگىسى كەلسە، اكەسى تاماشالاپ وتىرعان فۋتبول ارناسىن وپ- وڭاي اۋىستىرىپ جىبەرەتىن كورىنەدى.
قىرعىز ەلىنىڭ جوعارى ساناتتى سيقىرشىسى، IBM مۇشەسى، امەريكالىق SAM باۋىرلاستىق كلۋبىنىڭ مۇشەسى، ەۋروپادا وتكەن «بيتۆى ماگوۆ» جانە باسقا بايقاۋلاردىڭ جۇلدەگەرى يلدار ياگوفاروۆتىڭ قولىنا تۇسكەن دۇنيە دە سول ساتتە عايىپ بولادى. باسقا بىرەۋدىڭ قالتاسىنان تابىلۋى مۇمكىن، نە اسپانعا ۇشىپ جوعالادى. اۋادا قالىقتاپ، كۇلگە اينالادى. قىرىق بولىنگەن قاعاز اقشا قايتا قالپىنا كەلەدى. ادامدار «ۇشىپ» ، قاسىق- شانىشقىلار قول تيگىزبەسەڭىز دە وزدەرى قيمىلداپ، اۋزىڭىزعا اس سالادى. قىسقاسى، مۇنىڭ ءبارىن كورگەن دە، كورمەگەن دە ارماندا.
گوللاندىق يلليۋزيونيستەردىڭ «Magic Unlimited» توبى ارىپتەستەرىن مىڭ ورايتىن ويلارى بار. قۇرامىندا كارتاشىلار مەن جورامال جاساۋشىلار، ادامدىق كەيىپتەن شىعىپ، باسقا وبرازعا وپ- وڭاي اينالىپ كەتەتىندەر، جوعالىپ- تابىلاتىندار، «ءولىپ- تىرىلەتىندەر» تولىپ جاتىر.
قورىتا ايتقاندا، اسقاق استانانىڭ مەرەيلى كۇندەرى «Magic Astana» - «سيقىرلى استانا» يلليۋزيونيستەر فەستيۆالى ەستەن كەتپەس ەستەلىكتەر قالدىرماق.
- ءبىز بالا كۇنىمىزدە سيقىرشىلاردىڭ كوزدىڭ جاۋىن الاتىن سيقىرلى تاياعى مەن سان ءتۇرلى ءىس- ارەكەتتەرىنە كوز الماي قاراپ، ولاردىڭ قاس- قاباعى مەن كوز قيىعىن ەرەكشە قاداعالاپ وتىرۋشى ەدىك قوي. تاڭعاجايىپ الەمگە ءسابي جۇرەكپەن تامساناتىنبىز. عاجايىپ ءسات تالاي ارماندارعا جەتەلەيتىن. ءتىپتى وسكەندە سيقىرشى بولساق دەپ ارمانعا بەرىلەتىنبىز. يەسىنىڭ ايتقانىن بۇلجىتپاي ورىندايتىن اقىلدى اڭدارعا، بيلەيتىن اتتارعا قايران قالاتىنبىز. ءبىز عانا ەمەس ۇلكەندەر جاعى دا وپ- وڭاي الدانىپ قالىپ، ارقا- جارقا ءماز بولىپ، سوناۋ الىستا قالعان بالالىق بال- داۋرەندەرىنە ءبىر ساياحات جاساپ قايتاتىن. ءسىز سول عاجايىپتار الەمىنە قايتا ورالعىڭىز كەلسە، 1 - حالىقارالىق «سيقىرلى استانا» - «Magic Astana» يلليۋزيونيستەر فەستيۆالىن تاماشالاڭىز، - دەيدى ۇيىمداستىرۋ القاسى.
قانشايىم بايداۋلەت
«ايقىن» گازەتى
