بالقاش كولىندە جەلكەندى قايىقپەن جارىستان الەم چەمپيوناتى باستالدى
«جەلكەندى قايىقپەن جارىستان ءۇشىنشى الەم چەمپيوناتىنىڭ بالقاش كولىندە ءوتۋى زاڭدى. نەگىزگى ماقسات - بىرەگەي كولدىڭ ەكولوگيالىق احۋالىنا قوعامنىڭ نازارىن اۋدارۋ. بۇل شارا قازاقستاندا ءبىرىنشى رەت ءوتىپ جاتىر. بۇعان دەيىن چەمپيونات رەسەي، ۋكراينادا وتكەن ەدى. بيىلعى چەمپيوناتتا رەسەي، قىرعىزستان، وزبەكستان، بالتىق جاعالۋى ەلدەرىنەن كەلگەن سپورتشىلار باعىن سىنايتىن بولادى»- دەدى ەكولوگ مەلس ەلەۋسىزوۆ.
ونىڭ ايتۋىنشا، بالقاش كولىنىڭ باسىنداعى قيىن جاعدايعا قىتايدىڭ ساياساتى كەرى اسەرىن تيگىزۋدە. كولگە كەلەتىن اعىن سۋدىڭ 80 پايىزى ىلە وزەنىمەن كەلەدى.
«الايدا قىتاي جاعى ىلەنىڭ سۋىن وتە كوپ مولشەردە شىعىنداۋدا. بۇل بالقاشتىڭ ەكولوگيالىق احۋالىنا ۇلكەن نۇقسان كەلتىرىپ وتىر. بيىل كولدەگى سۋ دەڭگەيى 1 مەترگە تايازداندى. بالقاش مۇزدىقتاردىڭ ەرۋىنىڭ ارقاسىندا ساقتالىپ وتىر»- دەدى م. ەلەۋسىزوۆ.
العاشقى سايىس 16- ماۋسىمدا باستالادى دەپ كۇتىلىپ وتىر. كەشەگى ءبىرىنشى قاشىقتىقتى باعىندىرۋ بويىنشا جارىس كەيىنگە شەگەرىلدى. ۇيىمداستىرۋشىلاردىڭ ايتۋىنشا، كۇشتى جەل سايىستىڭ باستالۋىنا كەدەرگى كەلتىرۋدە.
اۆتور: گۇلميرا عوسمانالي
