قۇرىلىس قىزمەتى قانشا پايىزعا قىمباتتادى؟

استانا. قازاقپارات - قازىرگى جاز ايلارىندا كوپشىلىگىمىز قۇرىلىس جۇمىستارىن جۇرگىزەمىز. قالانىڭ ءىشى-سىرتىنان ءۇي سالا باستادى.

وسى الماتىداعى قۇرىلىس قىزمەتىنىڭ باعاسى بيىل قانداي كورسەتكىشتە؟

وسىنى ناقتى بىلۋگە بولا ما؟

بۇل ساۋالعا الماتى قالاسى بويىنشا «بارومەتر» ماركەتينگتىك تالداۋ ورتالىعىنىڭ باس مەنەدجەرى نۇرلىعانىم ادىلبەكوۆا جاۋاپ بەردى:

- 2014 - جىلدىڭ ماۋسىم ايىنداعى مالىمەتتەردى وتكەن جىلدىڭ ناق وسى ايىمەن سالىستىرا ايتساق، الماتىداعى قۇرىلىس-مونتاج جۇمىستارىنىڭ باعاسى 3,1 پايىزعا، قۇرىلىسقا قاجەتتى ماشينالار مەن جابدىقتاردىڭ قىزمەتى - 3,7 پايىزعا، وزگە جۇمىستار مەن شىعىندار -  2,2 پايىزعا ءوستى.

جالپى، قولدا بار دەرەكتەر بويىنشا، قۇرىلىس ۇيىمدارى پايدالاناتىن ماتەريالدار، دەتالدار مەن كونسترۋكتسيالاردىڭ باعاسى جىل باسىنان بەرى 0,8 پايىزعا وسكەن. بولات كونسترۋكتسيالار 6, 2 پايىزعا، پورتلاندتسەمەنت - 2, 2 پايىزعا، قۇرىلىس قۇمى -  3,8 پايىزعا، اعاش- تالشىقتى تاقتالار - 1, 7 پايىزعا، گيپسوكارتون - 1, 5 پايىزعا، وليف - 1,4 پايىزعا قىمباتتاعان.

نەگىزىنەن ەلدەگى قۇرىلىس قىزمەتىنىڭ جانە قۇرىلىس ماتەريالدارىنىڭ باعاسىنىڭ وسۋىنە بىردەن ءبىر ىقپال ەتەتىن دۇنيە - وتاندىق قۇرىلىس جۇمىسىن جۇرگىزەتىن مامانداردىڭ تاپشىلىعى مەن قۇرىلىس ونىمدەرىنىڭ شەتتەن كوپتەپ تاسىمالداناتىنى.

سوندىقتان كەلەشەكتە دە قۇرىلىسقا قاجەتتى ماتەريالداردىڭ قۇنى وسە تۇسەدى. الداعى شىلدە-تامىز ايلارىندا جوعارىدا كورسەتىلگەن قۇرىلىس ماتەريالدارىنىڭ باعاسى 2-3 پايىزعا تاعى دا قىمباتتايدى دەپ كۇتىلۋدە.

«الاش ايناسى»