قازاقستاندىقتارعا شىعىس ەلدەرىنە شىقپاۋعا ەسكەرتۋ جاسالدى

استانا. قازاقپارات - قازاقستاندىقتارعا ساۋد ارابياسىنا جانە تاياۋ شىعىس ەلدەرىنە ساپارلاۋدان تارتىنۋ تۋرالى ۇسىنىس جاسالدى.

بۇنداي ۇسىنىستى كەشە ورتالىق كوممۋنيكاتسيالار قىزمەتىندەگى بريفينگتە ق ر تۇتىنۋشىلاردىڭ قۇقىقتارىن قورعاۋ اگەنتتىگى ءتوراعاسىنىڭ ورىنباسارى - قازاقستاننىڭ باس سانيتارلىق دارىگەرى جانداربەك بەكشين ايتتى.

«ساۋد ارابياسى كورولدىگى، تاياۋ شىعىس ەلدەرىنە بارۋدان تارتىنۋدى نەمەسە بۇل ەلدەرگە ساپارلاردى قاتتى قاجەت بولعان جاعدايدا عانا جاساۋدى ۇسىندىق»، - دەدى ج. بەكشين.

بۇل قاۋىپسىزدىك شارالارى اتالعان ەلدەردەگى پنيەۆموكوكك ينفەكتسياسى، كوروناۆيرۋس ىندەتى وشاقتارىنىڭ پايدا بولۋىنا بايلانىستى بولىپ وتىر. ونىڭ سوزىنە قاراعاندا، ساۋد ارابياسى كورولدىگىنىڭ دەنساۋلىق ساقتاۋ مينيسترلىگى اسقىنعان دەرتى بار جانە يممۋنيتەتى تومەن ادامداردىڭ ساپارىنا ەسكەرتۋ جاسادى.

«بۇگىندە 700 گە جۋىق وقيعا تىركەلىپ، ونىڭ ىشىندە 280 ىندە ادامدار قازا بولدى. وسىنىڭ نەگىزگى ۇلەسى ساۋد ارابياسى كورولدىگىنە تيەسىلى. جالپى بۇگىندە كوروناۆيرۋس ون جەتى مەملەكەتتە تىركەلدى»، - دەدى ج. بەكشين.

سونىمەن قاتار ول اتالعان ەلگە قاجىلىققا باراتىن ادامداردا پنيەۆموكوكك ينفەكتسياسىنا قارسى ۆاكتسينا ەگىلگەندىگىن راستايتىن سەرتيفيكات بولۋى قاجەت ەكەنىن ايتتى.

ايتا كەتەيىك، پنيەۆموكوكك - جەدەل پنيەۆمونيانىڭ قوزدىرعىشى (اسىرەسە، كىشكەنتاي بالالار مەن قارتتاردا). قانعا تۇسكەن جاعدايدا قوزدىرعىش مي قابىقتارىنىڭ، وكپەنىڭ، بۋىننىڭ جانە تاعى باسقا اعزالاردىڭ ءىرىڭدى قابىنۋىنا الىپ كەلەدى. بالالاردا ءجيى كەزدەسەتىن كلينيكالىق تۇرلەرى - جەدەل ورتا وتيت (60 پايىزعا دەيىن)، پنيەۆمونيا (65-80 پايىزعا دەيىن) جانە مەنينگيت (5-20 پايىز).

دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرى بويىنشا، الەمدە پنيەۆموكوكك ينفەكتسياسىنان پايدا بولاتىن سىرقاتتاردان جىلىنا 1,6 ميلليوننان استام ادام قايتىس بولادى. سونىڭ ىشىندە 1 ميلليونعا جۋىعى - 5 جاسقا تولماعان بالالار. ال 1 جاسقا تولماعان بالالاردىڭ شەتىنەۋ ۇلەسى 40 پايىزدى قۇراپ وتىر.