جەر استىنداعى جەزتاڭدايلار
گارمون سۇيەمەلىمەن ۇيلەسىم تاپقان ەر ادامنىڭ ورىنداۋىنداعى «ارمان، ارمان، ارمان، ارمان- اي.. .» دەگەن ءان سوزدەرى جاقىنداعان سايىن انىق ەستىلە باستادى. ەرسىلى- قارسىلى وتكەننىڭ مويىن بۇرماعانى كەمدە- كەم: ون- جيىرما تەڭگەلىكتەر سىلدىرلاي ءتۇسىپ جاتىر. ءان بولسا، ودان بەتەر اۋەلەي تۇسكەن.
جانىنا جاقىنداپ كەلىپ ساداقامدى تاستاعان سوڭ انشىگە زەر سالدىم. كوك كەپكاسىنىڭ استىنان قالىڭداپ كەتكەن اق شاشى قوبىراي شىعىپ تۇر. ءبىراق، القام- سالقام ەمەس، كيىمى جيناقى، كوزىن تارس جۇمىپ العان.. . شىرقاپ- اق وتىر. باقىلاپ تۇرعاندا ءبىر بايقاعانىم، ءانشى قارتتىڭ جانىندا اق فۋتبولكا، سۇر شالبار كيگەن قاراكوزىلدىرىكتى جىگىت ءبىر ەلى ۇزاماي، اينالاسىنا قاسقايا قاراپ تۇردى. قورعاۋشىسى ءتارىزدى.. .
ارينە، بىلاي الىپ قاراعاندا ءان سالىپ قايىر سۇراپ وتىرعان توسىن كورىنىس ەمەس. بارلىق قالا كوشەلەرىنەن كەزدەسەدى. تەك ويلاندىراتىنى - اۋدەم جەرگە جەتەرلىك داۋىسى بار ادامداردىڭ ونەرىن امالسىزدان كۇنكورىس كوزىنە اينالدىرىپ وتىرعانى. تاعى ءبىر قىزىعى كوشە انشىلەرى وزدەرىن قايىرشىلار قاتارىندا ويلامايدى. ءسوز جوق، ادام شوشىرلىق كەيىپتە قول جايىپ، تومەن قاراپ وتىرعاننان الدەقايدا جاقسى. حالىق تا اياعاننان بەرمەيدى، ونەرىنە باس يگەندىكتەن ساداقا تاستايدى. ال سوندا وعان دەگەن قۇرمەتىمىز وسىمەن شەكتەلۋى ءتيىس پە؟ .. ەگەردە ول ءان جۇلدىزى بولۋدى قالاسا، وعان مۇمكىندىگى بار بولسا، ءبۇيتىپ جەر استىن جولىندا وتىرماس ەدى عوي. قازىر «قۇر ايعاي باقىرعان، قۇلاققا ءان بە ەكەن؟ » دەگەن اباي ءسوزىن قاپەرىنە دە الماستان، ءانشى اتانىپ جۇرگەندەردىڭ قاسىندا كوشە انشىلەرىنىڭ ونەرگە ادالدىعى باسىم با دەگەن دە وي كەلەدى. ويتكەنى، قايسى بولماسىن، ءاندى جانى سۇيسىنە، تەبىرەنە ورىندايدى.
پەتر بيدەنكو - اۋەسقوي ءانشى:
- قارتايعان سايىن ادامدارعا تەك قۋانىش سىيلاعىڭ كەلەدى ەكەن. سودان بولار ەسىلدىڭ جاعاسىندا قىدىرىپ جۇرگەن جۇرتشىلىققا سىرنايمەن ءان ايتىپ وتىرعانىم. مەنىڭ اكەم دە دومبىرا شەرتىپ ءان ايتقان جان. بۇل ونەر سودان دارىسا كەرەك. كوبى مەنى قايىر تىلەپ وتىر دەپ ويلايدى. حالىق نە ويلاسا سونى ويلاسىن. ءبىراق مەنىڭ جانىم ءانسىز ءومىر سۇرە المايدى.
الەمدىك مادەنيەت پەن ونەردىڭ ءتورىن بەرمەيتىن فرانتسيا استاناسى- پاريجدە كوشە مۋزىكانتتارى ەركىن ونەر كورسەتەتىن ون ورىن بەرىلگەن ەكەن. سونىڭ ىشىندە ەكەۋى ساكرە كەر مەن نوتر- دام سوبورلارىنىڭ توڭىرەگىندە بولسا، ەندى ءبىرى پومپيدۋداعى قازىرگى ونەر مۇراجايىنىڭ الدىنداعى الاڭنان بۇيىرعان. ءتىپتى پاريج مەرياسىنىڭ (اكىمدىگىنىڭ) ماڭىنداعى جورج پومپيدۋ جاعالاۋىنان دا كوشە مۋزىكانتتارىنىڭ ونەرىن تاما شالاۋعا بولادى.
ال استانالىق كوشە مۋزىكانتى ءادىلحان بازاربايەۆتى جۇرت ينتەرنەت ارقىلى تانىپ قالدى. قۇقىققورعاۋ ورىندارى كوشەدە ونەر كورسەتۋىنە قانشا كولدەنەڭ تۇرسا دا قولىنان دومبىراسىن تاستاماي، ءان سالىپ جۇرگەن جايى بار. قاراقالپاق ەلىنەن كەلگەن قانداسىمىز كوشەدە ءان ايتۋدى زاڭداستىرۋدى قالايدى. الايدا، بۇل ەلوردا مادەنيەتىنە قايشى كەلەتىن سىڭايلى. ال، استانا قالاسىنىڭ ىشكى ىستەر دەپارتامەنتىنە قاراستى قوعامدىق قاۋىپسىزدىك باسقارماسى باستىعىنىڭ ورىنباسارى قۋانتاي ارعىنعازى ۇلىنىڭ ب ا ق بەتىندە جاريالانعان پىكىرىنە سۇيەنسەك، كوشە مۋزىكانتتارىنا ورىن قاراستىرۋ زاڭعا تومپاق كەلەدى. ودان گورى مەيرامحانالار مەن ءدامحانالاردا ءان ايتسا ەشكىم قولىن قاقپايدى. ونىڭ ۇستىنە زاڭدى جولمەن تابىس تابار بولسا، سالىق تولەۋى ءتيىس. ءجون- اق دەلىك، ءبىراق، ءناپاقاسىن بويىنداعى ونەرىنەن تاۋىپ جۇرگەن اق شاشتى قارت انشىلەردى سالىق تولەۋگە ماجبۇرلەۋ قيسىنعا كەلە مە؟ .. ەگەر ءبارى زاڭمەن رەتتەلەتىن بولسا، مىقتىلاردىڭ تويىندا ونەر كورسەتىپ جۇرگەن كاسىبي تانىمال انشىلەردىڭ دە سالىق تولەۋى ءتيىس قوي.. .
اۆتور: ءساتجان قاسىمجان ۇلى، استانا قالاسى.
«الاش ايناسى»
