سەمەي دارىگەرلەرىنە تىكۇشاق تارتۋ ەتىلدى
«اۋە كولىگىن «سالاماتتى قازاقستان» باعدارلاماسى بويىنشا رەسپۋبليكالىق سان اۆياتسيا ورتالىعى بولگەن.
وبلىستىق دەنساۋلىق ساقتاۋ باسقارماسىنىڭ حابارلاماسى بويىنشا، شىعىس قازاقستاندا جەدەل مەديتسينالىق كومەك جۇيەسى جاقسارىپ كەلەدى. ناۋقاستاردى تاسىمالداۋ ءۇشىن ايماقتىق مەديتسينا قىزمەتكەرلەرى تىكۇشاقتاردى پايدالانادى. تاياۋ كۇندەرى سەمەي ايماعىنا قىزمەت كورسەتۋ ءۇشىن سانيتارلىق اۆياتسيانىڭ تاعى ءبىر اۋە پورتى ىسكە قوسىلدى» ، - دەلىنگەن وبلىس اكىمىنىڭ اقپاراتتىق ورتالىعى تاراتقان حابارلامادا.
سەمەي قالاسىنىڭ سانيتارلىق اۆياتسيا مەڭگەرۋشىسى ناجيا پرونينانىڭ سوزىنە قاراعاندا، تىكۇشاق ارنايى مەديتسينالىق قۇرالمەن جابدىقتالعان. جەكە تىكۇشاق سەمەي قالاسىنان ەڭ شالعايدا جاتقان تۇرعىندارعا شۇعىل كومەك كورسەتۋ ءۇشىن تاپتىرماس كولىك قۇرالى.
كەشە مەديتسينا قىزمەتكەرلەرى شۇعىل كومەككە ءزارۋ ەكى ناۋقاستى جەتكىزدى. بىرەۋى تولعاعى قىسقان ايەل بولسا، ەكىنشىسى - گەمورراگيالىق ينسۋلتكە ۇشىراعان اباي اۋدانىنىڭ 28 جاستاعى تۇرعىنى. ناۋقاس ۋاقىتىلى اۋرۋحاناعا جەتكىزىلمەگەندە، ونىڭ ارتى قايعىلى اياقتالۋى مۇمكىن ەدى.
اتاپ وتەيىك، تىكۇشاق ءار ۇشقان سايىن مەملەكەتتىك قازىنا ءبىر ميلليون تەڭگەگە شىعىندالادى. الايدا ادامنىڭ ءومىرى قىل ۇستىندە تۇرعاندا مۇنداي شىعىندار اقتالىپ شىعادى.
سونداي-اق، وبلىسىنىڭ اكىمى دەنساۋلىق ساقتاۋ مەكەمەلەرىنە 58 كولىكتىڭ كىلتىن تاپسىردى، دەپ حابارلادى ش ق و اقپاراتتىق ورتالىعى.
ءىس- شارا سەمەيدىڭ ورتالىق الاڭىندا ءوتتى.
«وبلىس اكىمى بەردىبەك ساپاربايەۆ مەديسينا قىزمەتكەرلەرىن كاسىبي مەرەكەلەرىمەن قۇتتىقتادى جانە وبلىستىڭ دەنساۋلىق ساقتاۋ مەكەمەلەرىنە 10 كولىكتىڭ كىلتىن تاپسىردى. سانيتارلىق كولىكتى تاعى دا 48 مەديسينالىق ۇيىم الدى» ، - دەپ اتاپ وتىلگەن باسپا ءسوز حابارلاماسىندا.
2014 -جىلى ش ق و اكىمدىگى وبلىستىڭ مەديتسينالىق ۇيىمدارى ءۇشىن 117 بىرلىك سانيتارلىق كولىك ساتىپ الۋعا قاراجات بولگەن ەدى.
بۇدان باسقا، بۇل كۇنى «قولجەتىمدى باسپانا-2020» مەملەكەتتىك باعدارلاماسى بويىنشا كەزەگى كەلىپ، پاتەر كىلتتەرىن يەلەنگەن مەديتسينا سالاسىنىڭ 6 قىزمەتكەرىنىڭ وتباسىلارى قونىس تويىن تويلايدى.
سالتاناتتى ءراسىم سوڭىندا وبلىستىڭ ۇزدىك دارىگەرلەرى ماقتاۋ قاعازدارىمەن ماراپاتتالدى.
شارا قالا ارتىستەرىنىڭ، شىعارماشىلىق ۇجىمدارىنىڭ، مەديتسينالىق كوللەدج ستۋدەنتتەرىنىڭ قاتىسۋىمەن ۇيىمداستىرىلعان كونسەرتكە جانە تەاترلاندىرىلعان كورىنىستەرگە ۇلاستى.
