ونەر جۇلدىزدارى قايدا دەمالادى؟
بۇگىندە ەلىمىزدىڭ قالتالىلارى التى قۇرلىقتىڭ تاماشا جەرلەرىن ارالاپ، ءتىپتى قالاسا، ۇناعان ەلدەرىنەن ءۇي دە ساتىپ الىپ قويادى.
Forbes-تاعى الەم داۋلەتتىلەرىنىڭ تىزىمىنە ەنگەن قازاقستاندىقتاردى بىلاي قويعاندا قازىر تۇرمىسى ورتاشا قاراپايىم وتباسىلاردىڭ كوبى جازعى دەمالىستارىن شەتەل اسىپ وتكىزۋدى ادەتكە اينالدىرعان.
ال حالىقتىڭ الدىندا جۇرگەن تانىمال ونەر يەلەرى ساحنادان، توي-دۋماننان، حالىقتىڭ نازارىنان شارشاعاندا ءبىر ۋاقىت شەتەلگە بارىپ دەمالىپ، جاعاجايلاردا بالا-شاعالارىمەن ارقا-جارقا راحاتتانىپ قايتادى.
«الاش ايناسى» بيىلعى جازدى ونەر يەلەرى قايدا، قالاي وتكىزەتىندەرىن انىقتاپ كورگەن ەدى.
مەيرامبەك بەسپايەۆ، ءانشى:
- الەمنىڭ قانداي كەرەمەت جەرلەرىن ارالاساڭ دا تۋعان جەرگە جەتپەيدى، ارينە. قاي كەزدە دە تۋعان ەلىمىزدە حالقىمىزبەن بىرگەمىز. ءبىراق اندا-ساندا دەمالعاندا شەتەلگە شىعىپ تۇرامىز.
ويتكەنى بىزدە تاماشا دەمالىس ورىندارىمىز بار بولعانىمەن ونداعى قىزمەت كورسەتۋ ساپاسى جوعارى دەڭگەيدە دەپ ايتا المايمىن. سونداي-اق دەمالعان كەزدە ەشكىمنىڭ مازالاماعىن قالايسىڭ. وزدەرىڭىزگە بەلگىلى ونەر ادامدارى جىل بويى كونسەرت، توي-تومالاقتا حالىقتىڭ اراسىندا جۇرەتىن بولعاندىقتان ءبىر ۋاقىت كوپشىلىكتىڭ كوزىنەن تاسا جەردە دەمالعىسى كەلەدى. ءوز باسىم تۇركيادا، تەڭىز جاعاسىندا دەمالعاندى ۇناتامىن.
بۇركىت، ءانشى:
- ءبىز ايشا ەكەۋمىز جاز مەزگىلىن وتە جاقسى كورەمىز. ىستىق ەلدەردە، تەڭىز جاعالاۋىندا دەمالعان عاجاپ قوي. وسى جازدا، ياعني شىلدە ايىندا ەۋروپا ەلدەرىن ارالاپ قايتپاقپىز جانە سول جاقتا ەكى بەينەكليپ تۇسىرە كەلۋدى دە جوسپارلاپ وتىرمىز. شەتەلدە دەمالساڭ، جىلدا بارعىڭ كەلىپ تۇرادى.
قايرات نۇرتاس، ءانشى
- شىنى كەرەك، مەندە دەمالاتىن ۋاقىت بولا بەرمەيدى، بولسا دا وتە از. ۋاقىتىمنىڭ كوبى ۇشاقتا وتەدى دەسەم دە بولادى. گاسترولدىك ساپارلارمەن جۇرەمىن. بوس ۋاقىتىم بولا قالسا، فازەنداعا بارامىن، تابيعات اياسىندا دەمالعاندى، اتقا مىنگەندى جاقسى كورەمىن. وزىمە سىيعا تارتقان كەرەمەت اتىم بار. مەن تىنىشتىقتا دەمالعاندى ۇناتامىن. ال شەتەلدەرگە دەمالۋ ءۇشىن ەمەس، كوبىنەسە جۇمىس بارىسىمەن بارامىن. ايتالىق وسى جىلدىڭ قازان ايىندا ا ق ش-تىڭ مايامي شتاتىنا بارۋدى جوسپارلاپ وتىرمىن.
روزا ءالقوجا، ءانشى:
- بيىل ءبىرىنشى رەت بالا-شاعامىزبەن تۇركياعا بارىپ دەمالىپ قايتۋدى جوسپارلاپ وتىرمىز. ارينە، ءوزىمىزدىڭ ەلىمىزدە دە تابيعاتى تاماشا، كورىكتى جەرلەر، دەمالىس ورىندارى بار. دەگەنمەن شەتەلگە دە بارىپ، كورىپ، دەمالىپ قايتقان جاقسى عوي. جازعى دەمالىستى ەستە قالارلىقتاي قىزىق وتكىزگەنگە نە جەتسىن؟ اللا بۇيىرسا، شىلدە ايىندا وتباسىمىزبەن تۇركياعا اتتانباقپىز.
ايگۇل يمانبايەۆا، ءانشى:
- وسى جازدا مەن تۇركيانىڭ بىرنەشە قالاسىنا بارۋدى جوسپارلاپ وتىرمىن. ماعان انتاليادا دەمالعان قاتتى ۇنايدى. تۇركيادا تۋريستەرگە بارلىق جاعداي جاسالعان.
جازيرا مەن جانبولات، ءانشى جۇپ:
- ءبىز دەمالىسىمىزدى ۇنەمى شەتەلدە وتكىزەمىز دەپ ايتا المايمىز. ءساتى تۇسكەندە اۋىلعا بارىپ، اعايىن-تۋىستى ارالاپ قايتامىز، وتباسىمىزبەن تابيعات اياسىنا دا ءجيى شىعىپ تۇرامىز. وسى جىلى جازدا ءبىز تۇركياعا بارىپ دەمالىپ قايتپاقپىز.
ونەر ادامدارىنىڭ جازعى دەمالىستارىن قايدا وتكىزەتىنىن سۇراستىرا كەلىپ، بايقاعانىمىز «جۇلدىزدار» كوبىنەسە شەتەلگە اعىلادى. اسىرەسە، ءبىزدىڭ ەلىمىزدە تۇركيانىڭ جاعاجايلارىنا بارىپ دەمالۋشىلاردىڭ قاتارى جىل سايىن كوبەيە تۇسۋدە. سونداي-اق تۋريستىك كومپانيالار ماماندارىنىڭ ايتۋىنشا ءبىزدىڭ ەلىمىزدىڭ ازاماتارىنىڭ تۇركيادان باسقا مالايزيا، تايلاند، بىرىككەن اراب امىرلىكتەرىنە بارىپ دەمالۋعا دەگەن قىزىعۋشىلىقتارى زور كورىنەدى. وكىنىشكە وراي قازاقستاننىڭ كورىكتى جەرلەرى، تابيعاتى تاماشا ورىندارى ءالى دە كوپشىلىكتىڭ سۇرانىسىنا يە بولا الماي تۇر. بىزگە وزگە ەلدىڭ تانىمال تۇلعاسى كەلىپ دەمالماق تۇگىلى ءوز ەلىمىزدىڭ ازاماتتارى قازاقستاننىڭ و شەتىنەن بۇل شەتىنە كەلىپ ءوز تۋعان جەرىنىڭ تابيعاتىن، تۋريستىك ورىندارىن تاماشالامايدى.
قازىر كىمنەن سۇراساڭىز دا بۋرابايدان بودرۋمدى، الاكولدەن انتاليانى ارتىق كورەدى. بۇعان سەبەپ، وتاندىق دەمالىس ورىندارى شەتەلدىك جاعاجايلارمەن قىزمەت كورسەتۋدىڭ ساپاسى جاعىنان باسەكەلەسە الماسا دا، باعاسى جاعىنان قالىسپاي تۇرۋى. تۇركياعا بارىپ 1500 ا ق ش دوللارىنا دەمالىسىڭىزدى تاماشا وتكىزىپ كەلسەڭىز، بۋرابايعا ۇشاقپەن بارماي-اق «جاياۋ» بارساڭىز دا وسى قارجىنى جۇمسايسىز.
مامانداردىڭ ايتۋىنشا، قازاقستانعا شەتتەن كەلۋشى تۋريستەردى ەلىمىزدەگى ەكوتۋريزم قاتتى قىزىقتىراتىن كورىنەدى. دەسەك تە، تۋريزم سالاسى ماماندارىنىڭ ەلىمىزدىڭ جارناماسىن ءجوندى جاساي الماۋى، ەلىمىزگە تۋريست تارتا الماۋى، قىزمەت كورسەتۋ ساپاسىنىڭ تومەندىگى وتاندىق تۋريزمنىڭ كەنجە قالۋىنا سەبەپ بولىپ وتىر.
سونداي-اق ءوزىمىز قازاقستاننىڭ نەبىر تاماشا جەرلەرى، بار، تابيعاتى تاماشا دەپ الامىز دا، قولىمىزعا اقشا تيسە، جۇرتتان قالماي شەتەلگە بارىپ دەمالىپ قايتامىز. سوعان قاراعاندا شەتەلدە دەمالۋ ادەتكە اينالىپ كەتتى-اۋ...
ەگەر ءبىزدىڭ سايتتى ۇزبەي قاراپ وتىراتىن وقىرمان بولساڭىز الداعى ۋاقىتتا ءبىزدىڭ سايتتان قازاقستاننىڭ عاجاپ دەمالىس ورىندارى تۋرالى وقيتىن بولاسىز. ەلىمىزدىڭ شيپاجايلارىندا تاماشا دەمالىس وتكىزگەندەرىڭىز بولسا، سول تۋرالى بىزگە جازىڭىز، قىمباتتى وقىرمان. وتاندىق تۋريزمدى بىرلەسە ناسيحاتتايىق...
اۆتور: اينۇر سەنبايەۆا
