فۋتبول:«ءولىم توبىنان» قاي قۇرامالار « ءتىرى» شىعادى؟
«مۋنديالداعى» بۇل توپتى كوپتەگەن فۋتبول ماماندارى «ءولىم توبى» دەپ اتاۋدا. انگليا، ۋرۋگۆاي جانە يتاليا سىندى قۇرامالار تەكەتىرەسى قاشان دا قىزىق بولعان. بۇل جولى دا تارتىستى بولماق. ال «ارىستاندار اپانىنا» تۇسكەن كوستا- ريكا عايىپتان تايىپ، توپتىق كەزەڭنەن شىعىپ جاتسا، ءدۇبىرلى دودانىڭ باستى سەنساتسياسى بولارى انىق.
«ماەسترو» جۇيەسىن قالاي ۇستانادى؟
ۋرۋگۆاي قۇراماسى الەم چەمپيوناتىنا تاجىريبەلى قۇراممەن كەلەدى. كوبىسى ەگدە تارتسا دا، توپ جارۋعا مۇمكىندىگى جوعارى فۋتبولشىلار. باس باپكەرى وسكار تابارەستىڭ ءوزى كەزىندە ۇلتتىق قۇراما جەيدەسىن كيىپ، ونەر كورسەتكەن. ويىنى جانكۇيەرلەر كوڭىلىنەن شىعىپ، قالىڭ كوپشىلىك ونى «ماەسترو» دەپ اتاپ كەتكەن ەكەن. ەندى سول «ماەسترو» ويىن جۇيەسىن قالاي ۇستانادى؟
2010 - جىلى وڭتۇستىك افريكادا وتكەن دودادا ۋرۋگۆاي كەرەمەت ونەر كورسەتتى. قازىردىڭ وزىندە سول قۇرامنان اسا كوپ وزگەرىستەر بايقالمايدى. ۇزاق ۋاقىتتان بەرى وسكار تابارەس قۇرامامەن جۇمىس جاساپ كەلەدى. نەگىزگى سەنەر تۇسى - شابۋىل شەبى بولماق. ويتكەنى، لۋيس سۋارەس، ەدينسون كاۆاني، ەرناندەس جانە ستۋانيدان كوپ ناتيجە كۇتۋگە بولادى. جوق جەردەن بار جاساي الادى. ال كوماندانىڭ ءالسىز تۇسى - پلەيمەيكەردىڭ بولماۋى. جارتىلاي قورعاۋشىلاردىڭ كوبىسى قورعاۋشىلارعا كومەكتەسۋگە جاقىن وينايتىن فۋتبولشىلار. ەندى بۇل قىزمەتتى ارداگەر ديەگو فورلان مەن لودەيرو اتقارۋى ءتيىس.
«سەلەستادان» جانكۇيەرلەر كۇتپەگەن سىي كۇتۋدە. ىرىكتەۋ كەزەڭىندە اسا مىقتى ويىن ورنەگىن كورسەتپەسە دە، 2010 - جىلعى «مۋنديالدىڭ» جارتىلاي فينالىنا جەتكەن قۇراما ءوز قۇرلىعىندا بەلسەنەدى دەپ بولجانۋدا. بالكىم، راس تا شىعار. العاشقى كوستا- ريكامەن بولاتىن ويىندا قۇراما ءۇش ۇپايمەن بىرگە، ءىرى ەسەپپەن دە جەڭىسكە جەتۋى ءتيىس. بۇل جەڭىس فۋتبولشىلارعا جىگەر بەرەدى. ودان كەيىنگى ناتيجەنى وسكار تابارەس ۇستانعان جۇيە شەشپەك.. .
بۋكمەكەرلىك ورتالىقتار ۋرۋگۆاي قۇراماسىنىڭ توپتان شىعۋىنا - 1,57 كوەفيتسيەنت، چەمپيون اتانۋىنا 26 كوەفيتسيەنت بەرىپ وتىر.
يتاليا گەرمانياداعى جەتىستىگىن قايتالاي الا ما؟
«سكۋادرا ادزۋررانىڭ» توپتان شىعۋ مۇمكىندىگى جوعارى باعالانۋدا. 2006 - جىلعى «مۋنديالدا» بۇل قۇرامانىڭ توپ جارۋىن بىرەۋ بولجاعانمەن، كوبىسى كۇتپەگەن ەدى. ودان كەيىن كوماندا ساپى اۋىسقانمەن، يتاليالىقتاردىڭ ويىن جۇيەسى جانكۇيەرلەرگە تانىس. تانىس بولعاندا دا «جۇمباق» جاعدايدا. كوبىنە يتاليا قۇراماسى توپتاعى العاشقى ويىندارىندا ءالسىز كورىنگەنمەن، سوڭىنا قاراي ويىنىن وزگەرتە تۇسەدى. ال برازيلياداعى توپ قۇرامانىڭ بۇل جۇيەسىن ىسكە اسىرۋىنا مۇمكىندىك بەرە مە ەكەن؟
چەزارە پراندەللي كومانداسىن ناعىز تاجىريبەلى، ءتىس قاققان ويىنشىلار دەسەك بولادى. ال ونداي قۇرامانىڭ ستاندارتتى جاعدايلاردا گول سوعۋعا زور مۇمكىندىگى بار. سوندىقتان دا اندرەا پيرلو باستاعان جىگىتتەر ايىپ سوققىلارىمەن قاتار، ەكىنشى قاباتتاعى ويىندا دا جەڭىسكە جەتە الادى. شابۋىل شەبىندەگى جىگىتتەر بەلسەنسە، وزگە بولىگى ساقاداي- ساي دەۋگە بولادى. جولى بولىپ جاتسا، بۇل قۇرامانىڭ ۇزاققا شابۋىنا مۇمكىندىك بار.
يتاليا قۇراماسى جولداستىق كەزدەسۋلەردە اسا بەلسەنە بەرمەيدى. ماسەلەن، 2012 - جىلى ەۋروپا چەمپيوناتىنىڭ الدىنداعى جولداستىق كەزدەسۋلەرى ءتاۋىر بولعان جوق. ءبىراق، دودادا فينالعا دەيىن جەتتى. بۇل الەم چەمپيوناتى الدىنداعى كەزدەسۋلەرىن دە ءساتتى وتكىزگەن جوق. ءتىپتى، ليۋكسەمبۋرگپەن تەڭ وينادى. الايدا وسىعان قاراپ، قۇرامانى ءالسىز دەپ باعالاۋعا بولمايدى. ويتكەنى، «سكۋادرا ادزۋررا» بار كۇشىن «مۋنديالعا» ساقتاپ وتىر.
قۇرامانىڭ توپتان شىعۋ مۇمكىندىگى 1,36 كوەففيتسيەنتپەن باعالانۋدا. توپتان ءبىرىنشى ورىن الۋى - 2,62, چەمپيون اتانۋىنا - 26 كوەففيتسيەنت ۇسىنىلۋدا.
انگليا ايدى اسپانعا شىعارا ما؟
اعىلشىنداردىڭ ءىرى دودالاردا جولى بولماي كەلەدى. بۇل توپتا دا روي حودجسون شاكىرتتەرىنىڭ پلەي- وففقا شىعۋى كۇماندى سانالۋدا. دەسە دە انگليا قۇراماسى بەس قارۋىن سايلاپ كەلىپ وتىر.
نەگىزگى قاقپاشى دجو حارت جايلى كوبىرەك اڭگىمە قوزعاۋعا بولادى. تالانتتى قاقپاشى بولسا دا، كەي ساتتەردە كۇتپەگەن قاتەلىك جىبەرىپ قوياتىنىن جانكۇيەرلەر جاقسى بىلەدى. ءبىر ءساتتى ويناپ كەتسە، ويناپ كەتەدى. كوپ دۇنيە روي حودجسون ۇسىنعان جۇيەگە بايلانىستى بولماق. ال باس باپكەردىڭ ويىن جۇيەسى 4-3-3 بولۋى بەك مۇمكىن. دجون تەرريدىڭ دە قۇراماعا قوسىلماۋىن اعىلشىن جانكۇيەرلەرى ءۇشىن جاقسىلىققا بالاۋعا كەلمەيدى. ويتكەنى، «چەلسي» ويىنشىسى سەكىلدى فۋتبولشى قۇرامادا جوق. تەو ۋولكوتتى دا وسى قاتارعا جاتقىزۋعا بولادى. ورتالىق الاڭ بولىگىندە كوماندا ستيۆەن دجەرارد پەن فرەنك لەمپاردقا سەنىم ارتادى. كاپيتان مەن ۆيتسە- كاپيتان قۇرامانى العا سۇيرەۋگە ۇمتىلارى انىق. شابۋىل شەبىندە رۋنيدىڭ ويىنىن جوعارى باعالاۋعا بولادى. دەنني ۋەلبەكتى كوپ جانكۇيەرلەر بارماعانىن دا قالاعان ەدى. ءبىراق، باس باپكەر ونى نازارىنان تىس قالدىرمادى. مۇمكىن، ۇلكەن پايداسى تيەر.. .
سونىمەن، اعىلشىن قۇراماسىنىڭ توپتان شىعۋ مۇمكىندىگى 1,57 كوەففيتسيەنتپەن باعالانۋدا. ەگەر توپتان شىعىپ جاتسا، «س» توبىنداعى قۇرامالاردى ەسكەرەر بولسا، 1/4 فينالعا وتۋىنە جاعداي جاسارى بەلگىلى. ال اعىلشىنداردىڭ ەكىنشى رەت الەم چەمپيونى اتاعىن جەڭىپ الۋ بولجامى - 26 كوەفيتسيەنتپەن باعالانۋدا.
«تيكوستار» تەك كەلدى مە؟
كوستا- ريكا قۇراماسىنا جەرەبە جولداس بولمادى. ناعىز «ارىستاندار اپانىنا» ءتۇستى. توپتىڭ ۇپاي تاراتۋشى قۇراماسى سانالۋدا. ءبىر ۇپايدىڭ ءوزىن يەلەنۋ حورحە پينتو شاكىرتتەرىنە جەتىستىك بولماق. ءتىپتى قۇراما گول سوقسا دا جانكۇيەرلەرى شەكسىز قۋانارى انىق. «جاقسى قاقپاشى - جارتى كوماندا» دەمەكشى، قۇرامانى «ليەۆانتە» ساپىندا ونەر كورسەتەتىن قاقپاشى كەيلور ناۆاس كوپ ساتتە قۇتقارۋى مۇمكىن دەپ بولجانۋدا. كوستا- ريكا عايىپتان تايىپ، توپتىق كەزەڭنەن شىعىپ جاتسا، ءدۇبىرلى دودانىڭ باستى سەنساتسياسى بولارى انىق.
1/8 فينالدا «D» توبىنان ءبىرىنشى ورىن العان قۇراما «C» توبىنىڭ ەكىنشى ورىن العان قۇراماسىمەن، كەرىسىنشە «C» توبىنىڭ كوشىن باستاعان قۇرامامەن «D» توبىنان ەكىنشى ورىن العان قۇراما كەزدەسەدى. وسىعان دەيىن تانىستىرىپ وتكەن «س» توبىندا كولۋمبيا، گرەكيا، كوت- د'يۆۋار جانە جاپونيا قۇرامالارى بار.
«D» توبىنىڭ ويىن كەستەسى:
14 ماۋسىم
01: 00 ۋرۋگۆاي - كوستا- ريكا
15 ماۋسىم
04:00 انگليا - يتاليا
19 ماۋسىم
01:00 ۋرۋگۆاي - انگليا
20 ماۋسىم
22:00 يتاليا - كوستا- ريكا
24 ماۋسىم
22:00 يتاليا - ۋرۋگۆاي
22:00 كوستا- ريكا - انگليا
ويىندار استانا ۋاقىتىمەن كورسەتىلدى
دايىنداعان: ومىربەك سانسىزباي
massaget.kz/
