قازاق بولسام، ەسىمىم پاسكالبەك بولار ەدى - سون پاسكال

استانا. قازاقپارات - "قازاق بولسام، ەسىمىم پاسكالبەك نەمەسە پاسكالجان بولار ەدى" - يتالياندىق ءانشى سون پاسكال بۇگىن استانادا "جاستار ءۇنى" شاراسى اياسىندا وتكەن كونتسەرتتى وسىنداي سوزدەرمەن باستادى.

بارلىق اندەردى ول تەك قازاق تىلىندە شىرقادى. ولاردىڭ قاتارىندا "كوزىمنىڭ قاراسى"، "اينالايىن"، "ماحاببات" شىعارمالارى، سونىمەن قاتار يتالياندىق ءانشىنىڭ شىن ومىردە قازاق قىزىنا عاشىق بولعانداعى اق سەزىمىن بىلدىرەتىن "قازاق بولسام" اتتى ولەڭى دە بار.

 ابايدىڭ اتاقتى "كوزىمنىڭ قاراسىن" حالىقپەن بىرگە تەربەپ ايتقان سون پاسكال، ۇلى قازاق اقىنىن الەمدىك دەڭگەيدەگى روك جۇلدىزعا تەڭەپ، تىڭداۋشىلارىنىڭ جۇرەگىن باۋراپ تا الدى.

 پاسكال شىعارماشىلىعىنىڭ ءبىر ەرەكشەلىگى - ول 35 جاسقا دەيىنگى اۋديتوريادا اسا ۇلكەن تانىمالدىلىققا يە بولىپ وتىر. ونىڭ Youtube-تاعى بەينەباياندارىن 1 ميلليوننان استام ادام كورگەن. بۇل كورسەتكىشتەر بويىنشا، Youtube پەن Vkontatkte كورسەتكەنىندەي، ول كوپتەگەن انشىلەردى شاڭ قاپتىرادى.

سونىمەن بىرگە مەرەكەلىك باعدارلامادا قايرات باەكەنوۆ، «فورمات» توبى، دوس، قۇلايىم قايىربايەۆا، تريو «ارت- دومبىرا» ، «Viva» شوۋ- بالەتى مەن كۆن قۇراماسى ونەرلەرىن پاش ەتتى.