بيەنىڭ سۇتىنەن بالالار تاعامى جاسالاتىن بولدى

استانا. قازاقپارات - اقمولا وبلىسىندا بيەنىڭ سۇتىنەن بالالار تاعامى جاسالاتىن بولدى.

قازاق تاعامتانۋ اكادەمياسىنىڭ ارنايى تاعامدار ازىرلەۋ بيوتەحنولوگياسى زەرتحاناسىنىڭ جەتەكشىسى يۋري سەنياۆسكي حابارلادى.

عالىمنىڭ ايتۋىنشا، بۇل جوباعا قازاق كاسىپكەرلەرى قىزىعۋشىلىق تانىتىپ وتىر.

بيەنىڭ سۇتىنەن بالالار تاعامىن جاسايتىن فەرمالار مەن زاۋىتتار 2014 - جىلدىڭ سوڭىندا ىسكە قوسىلادى.

سەنياۆسكييدىڭ ايتۋىنشا، بيەنىڭ سۇتىنەن بالالاردىڭ يممۋنيتەتىن كوتەرەتىن ىرىمشىك، قۇنارلى سۋسىندار سەكىلدى بالالار تاعامى ازىرلەنەدى. بۇل تاعامدار بالاباقشالارعا، اۋرۋحانالارعا، مەكتەپتەرگە تاراتىلادى.

«بيە ءسۇتىنىڭ قۇرامى انا سۇتىنە قاتتى ۇقسايدى. سوندىقتان قازىرگى تاڭدا انا ءسۇتىن الماستىرۋشى تاعام بيەنىڭ سۇتىنەن جاسالماق»، - دەيدى سەنياۆسكي. زاۋىت بيەنىڭ سۇتىنەن جاسالعان بالالار ءسۇتىن جانە قۇرعاق ءسۇتتى دە وندىرەتىن بولادى. بۇل ونىمدەر جاڭا تەحنولوگيالار بويىنشا ازىرلەنبەك. بۇرىن حابارلانعانداي، بيەنىڭ سۇتىنەن جاسالعان تابيعي يوگۋرت الماتىداعى وكپە اۋرۋلارى ينستيتۋتىنىڭ بازاسىندا كلينيكالىق سىناقتان وتكىزىلگەن بولاتىن.

ناۋقاستار تاماقتاناتىن تاعامداردىڭ قاتارىنا يوگۋرت قوسىلعاننان كەيىن ولاردىڭ يممۋنيتەتتەرى كوتەرىلىپ، قان تالدامالارىنىڭ ناتيجەسى جاقسارعان، اعزالارى توكسيندەردەن تازارا باستاعان. اتالعان تاعام 50 ناۋقاسقا بەرىلدى. وسى يوگۋرت جانە باسقا دا بالالار تاعامىنىڭ تۇرلەرى اقمولا وبلىسىنداعى زاۋىتتا وندىرىلەتىن بولادى.

اقپارات كوزى: Tengrinews.kz