استانادا نان باعاسى قىمباتتادى
بۇگىن استانادا وتكەن باسپا ءسوز ءماسليحاتىندا نان- توقاش ونىمدەرىن شىعاراتىن ەڭ ءىرى وندىرۋشىلەردىڭ ءبىرى الەۋمەتتىك نان باعاسىنىڭ ءوسۋ سەبەپتەرىن ءتۇسىندىرىپ بەردى.
«الەۋمەتتىك نان بار، قالىپتى، ءبىز ونى «كىرپىش» دەپ اتايمىز، ول ءبىزدىڭ زاۋىتتا 45 تەڭگە تۇراتىن. جەتكىزۋىمەن ساناعاندا 48 تەڭگە بولاتىن. قازىرگى ۋاقىتتا زاۋىتتاعى باعا 50 تەڭگە، ياعني ول بەس تەڭگەگە جوعارىلادى. جەتكىزۋى 3 تەڭگەگە قىمباتتادى، سوندىقتان قالاعا جەتكەندە ول 55 تەڭگە بولادى. ساۋدا ورتالىقتارىندا ءبىزدىڭ ناندى 60 تەڭگەدەن اسىرماۋ جونىندە ۇسىنىس جاسايمىز. ءبىراق قازىر نارىقتىق زامان. ولارعا باعانى سول دەڭگەيدە ۇستاپ تۇرۋعا مىندەتتەي المايمىز» ، - دەيدى «سەسنا استىق» كونتسەرنى» اق ديرەكتورلار كەڭەسىنىڭ مۇشەسى يليا مەشەرياكوۆ.
ونىڭ ايتۋىنشا، نان باعاسى وسى اپتانىىڭ باسىندا، دۇيسەنبىدە جوعارىلاتىلدى.
ي. مەشەرياكوۆتىڭ سوزىنە قاراعاندا، نان باعاسىنىڭ وسۋىنە ۇن مەن ءبيداي قۇنىنىڭ جوعارىلاۋى اسەر ەتىپ وتىر.
«ءبىزدىڭ كومپانيا 50 تەڭگەدەن كەم باعامەن نان ساتا المايدى. سەبەبى ناننىڭ وزىندىك قۇنىنىڭ ءوزى شامامەن 65 تەڭگە بولىپ وتىر. ءبىزدى تۇسىنۋگە تىرىسىڭىزدار. 2008 -جىلدان بەرى كومپانيا نان باعاسىن وزگەرتپەي كەلدى، سەبەبى الەۋمەتتىك جاۋاپكەرشىلىكتى تۇسىنەدى، قالىپتى نان حالىقتىڭ ەڭ قاجەتتى ونىمدەردىڭ ءبىرى» ، - دەيدى ول.
رەسمي دەرەكتەر بويىنشا، سوڭعى التى جىلدا استانادا قالىپتى ناننىڭ باعاسى جوعارىلاماعان جانە 50-55 تەڭگە كولەمىندە ساقتالىپ كەلدى. بريفينگتە اتاپ كورسەتىلگەنىندەي، باعانى ۇستاپ تۇرۋعا مەملەكەتتىك رەزەرۆتەگى استىقتىڭ ارزان باعامەن جىبەرىلۋى كومەكتەسىپ كەلگەن. قازىرگى ۋاقىتتا 19 ناۋبايحانا نەگىزسىز باعانى وسىرمەۋ جونىندە مەموراندۋمعا قول قويدى. دەگەنمەن ەلورداداعى ەڭ ءىرى ءوندىرۋشى «سەسنا» كونتسەرنى» بۇل كەلىسىمگە قول قويعان جوق. بۇگىنگى تاڭدا ناننىڭ باعاسى تەك وسى كومپانيادا جوعارىلادى.
اۆتور: جاسۇلان جولدىبايەۆ
