ق ر پرەزيدەنتى «دجەنەرال ەلەكتريك» باسشىلىعىمەن مۇنايگاز سالاسى ماسەلەلەرىن تالقىلادى

استانا. بۋراباي. قازاقپارات - مەملەكەت باسشىسى نۇرسۇلتان نازاربايەۆ «دجەنەرال ەلەكتريك ويل ەند گاز» كومپانياسىنىڭ پرەزيدەنتى جانە باس اتقارۋشى ديرەكتورى لورەنزو سيمونەلليمەن كەزدەستى، دەپ حابارلادى اقوردانىڭ سايتى.

كەزدەسۋ اقمولا وبلىسى بۋراباي كەنتىندە ق ر پرەزيدەنتى جانىنداعى شەتەلدىك ينۆەستورلار كەڭەسى اياسىندا ءوتتى.

كەزدەسۋ بارىسىندا مۇناي-گاز ينفراقۇرىلىمى، ەنەرگەتيكا، كولىك، دەنساۋلىق ساقتاۋ جانە وزگە دە سالالارداعى ىنتىماقتاستىقتىڭ نەگىزگى باعىتتارى تالقىلاندى.

نۇرسۇلتان نازاربايەۆ كومپانيانىڭ قازاقستانداعى بەلسەندى ينۆەستيتسيالىق قىزمەتىن جانە ونى ءارى قاراي كەڭەيتۋگە ازىرلىگىن اتاپ ءوتتى، سونداي-اق لوكوموتيۆ قۇراستىرۋ جونىندەگى بىرلەسكەن كاسىپورىننىڭ ونىمدەرىن سىرتقى نارىقتارعا شىعارۋدىڭ ماڭىزدىلىعىنا توقتالدى.

تاراپتار كومپانيا بولىمشەلەرىنىڭ مەملەكەتتىك ورگاندارمەن جانە ەلدەگى ۇلتتىق كومپانيالارمەن تابىستى ءوزارا ىقپالداستىعىنا توقتالىپ، ءبىرقاتار ينفراقۇرىلىمدىق جانە كولىكتىك جوبالاردى قاراستىردى.

«دجەنەرال ەلەكتريك» - قازاقستان رەسپۋبليكاسىنداعى شەتەلدىك ءىرى كومپانيانىڭ ءبىرى. ونىڭ كليەنتتەرى مەن سەرىكتەستەرى قاتارىنا وڭىردە 200 دەن استام كومپانيا جانە ۇيىمدار كىرەدى. «جەنەرال ەلەكتريكتىڭ» الماتىداعى وكىلدىگى 1994 - جىلى اشىلدى.