ۆيزا جاساتپاي-اق دەمالىپ قايتۋعا بولاتىن ەلدەر - فوتو

استانا.قازاقپارات - جازدىڭ اپتاپ ىستىعىندا بارلىعى كەڭسە مەن ۇيدەن جىراق جەردە: اۋىلعا نەمەسە شەت ەلگە بارىپ دەمالۋدى ءجون كورەدى.

 وكىنىشكە وراي، شەت ەلگە شىعۋ ءۇشىن ۆيزا مەن پاسپورت جاساتۋدىڭ ماشاقاتى كوپ. ونى بىرەۋدىڭ قالتاسى كوتەرمەسە، ەكىنشىسىندە راسىمدەۋگە ۋاقىت جوق. نازارلارىڭىزعا بۇل قۇجاتتارسىز- اق دەمالىپ قايتۋعا بولاتىن 20 مەملەكەتتى ۇسىنامىز.

ابحازيا

 ابحازيانىڭ گاگرا، پيتسۋندا، سۋحۋمي قالالارى 30  جىل بويى تۋريستەردىڭ ءجيى كەلىپ جۇرگەن سۇيىكتى دەمالىس ورتالىقتارى. تورتكۇل دۇنيەدەن جىل سايىن تۋريستەر ارنايى شاقىرتۋ مەن دەمالىس جولداماسىن يەمدەنىپ، جازعى ۋاقىتىن وسىندا وتكىزەدى. تابيعاتى وتە كوركەم، اۋا- رايى جىلى، قاراعاي مەن سارىاعاشتىڭ مۇڭكىپ شىققان جۇپار ءيىسى ەستە قالارى ايتپاساق تا تۇسىنىكتى. قالتاڭىزعا قاراي جەكە ۇيلەردى جالعا الۋىڭىزعا بولادى. كوشەنىڭ ءار بۇرىشىنان ابحاز شەبەرلەرى دايىنداعان شاراپ تۇرلەرىنىڭ ءدامىن تاتىپ كورە الاسىز.

ءازىربايجان

باكۋ قالاسىنىڭ بيزنەسمەندەرى تۋريستەرگە قالاي جاعداي جاساۋ كەرەك ەكەنىن جاقسى بىلەدى. تەڭىز جاعالاۋىندا ورنالاسقان سانسىز جاعاجاي بارلىق تالاپقا ساي. باعاسى دا قول جەتىمدى، ساپاسى دا جوعارى. ۇزدىك دەپ تانىلعان دەمالىس ورىندارى مارداكيان كەنتىندە. ول جاقتا مامىر مەن قىركۇيەك ايلارى كەزىندە تەگىن جانە اقىلى قىزمەت كورسەتەتىن جاعاجايلار بار. يران شەكاراسىمەن شەكتەسكەن ايماقتا لەنكوران قارا قۇمدى جاعالاۋى تۋريستەردىڭ سۇرانىسىنا يە. قۇم ءتۇسىنىڭ ەرەكشەلىگىنە بايلانىستى كەلۋشىلەر سانى ءبىر ساتكە تولاستاعان ەمەس.

باربادوس

باربادوس - كاريب تەڭىزىنىڭ شىعىس بولىگىندەگى ارالداردىڭ ءبىرى. باربادوس كەزىندە بريتانيا ەلىنىڭ كولونياسى بولعان. بىرنەشە عاسىر بويى قانت قىزىلشاسىن وسىرەدى جانە اتى بارىنە تانىس روم شارابىن جاسايدى. باربادوس جاعالاۋى ءمىنسىز تازا ءارى پالما اعاشىنا تولى. تەڭىز قاراقشىلارىنىڭ ۇڭگىرلەرى اشىق كۇيىندە كورسەتىلگەن. بۇل جەردە جۇرگەن كەزدە ءوزىڭىزدى دانيەل دەفونىڭ كەيىپكەرى - روبينزونداي سەزىنەسىز. سوتقار داۋىلدان قورىقساڭىز، قوبالجۋدىڭ ەش ءجونى جوق. سەبەبى، الىستان سوققان جەل اشۋى بۇل ارالعا جەتە قويمايدى.

گرۋزيا

 دۇنيەجۇزىلىك اتلاستى اشىپ قاراساڭىز، گرۋزيانىڭ تاپ گوللانديا سەكىلدى كولەمى جاعىنان شاعىن مەملەكەت ەكەنىن كورەسىز. ءبىراق ونىڭ فاۋناسى وتە باي. گرۋزيا - تاۋ، وزەن، كول، دالا، شولەيت، تۋندرا، مۇزدىق، تايگاسى بار كىشىگىرىم قۇرلىق. سۆانەتيا تاۋىنىڭ باۋرايىنان الپينيزم سپورتىنىڭ قانشالىقتى قارقىن العانىن تاماشالاۋىڭىزعا بولادى. تاۋ توبەسىنەن بۇلاقتىڭ سارقىراپ اققان اعىنى جانعا باتقان اۋىرتپالىقتىڭ بارلىعىن وزىمەن بىرگە الا كەتىپ، بويىمىزدى كۇش- قايراتقا تولتىرادى. ۋرەكي جاعاجايىنداعى ماگنەتيتتىك قۇمنىڭ ەمدىك قاسيەتى بار. ول جۇرەك، جۇيكە، تەرى سىرقاتتارىنان تەز ايىعىپ كەتۋگە سەپتىگىن تيگىزەدى.

دومينيكانا

دومينيكانا تابان تىرەگەن جەردى بىرنەشە جىل بۇرىن ساياحاتشى كولۋمب كورىپ تامسانعان ەكەن. كولونيالىقتاردىڭ سوققان ەسكى قۇرىلىس ۇلگىلەرى ءالى سول قالپىندا. كۇن استىندا سنوركلينگ سپورتىمەن اينالىسۋىڭىزعا بولادى. ەڭ مىقتى جاعاجايلار پۋنتا- كانا كۋرورتتى اۋدانىندا ورنالاسقان. پۋنتا- كانا - سەرفينگيستەر ءۇشىن تاپتىرماس ورىن. جاعاجايعا جاقىن شىعاناقتاردا بۇدىر كيتتەردىڭ سالعان اندەرىن تىڭداي الاسىز.

مىسىر

اراب ەكزوتيكاسى، فانتاستيكالىق سۋاستى ءومىرى، مادەنيەتى مەن داستۇرلەرى مىسىر ەلى تۋريستەرىنىڭ كوڭىلىن باۋراپ الادى. باستى كۋرورتتى ايماقتارى - شارم- ەل- شەيح، دەموكراتيالىق حۋركادا، داۋنشيفتەر «مەككەسى» ، دايۆ- سپوت وتە جاقسى دامىعان داحاب جەرى.

دايىنداعان: نۇربول نۇرماحان ۇلى

massaget