ءماجىلىس دەپۋتاتى ۇ ب ت- داعى ادىلەتسىزدىك ماسەلەسىن كوتەردى
بۇگىن ءماجىلىستىڭ جالپى وتىرىسىندا ۇكىمەت باسشىسىنىڭ اتىنا ساۋال جولداعان دەپۋتات گۇلميرا يسىمبايەۆا وسى ماسەلەنى كوتەردى.
ءماجىلىس دەپۋتاتىنىڭ ايتۋىنشا، ۇلتتىق ءبىرىڭعاي تەستىلەۋدى وتكىزۋ بىلتىرعى جىلدارعا قاراعاندا بيىل جاقسارىپ قالعان. الايدا، جەكەلەگەن پروبلەمالار دا جوق ەمەس.
«ءماجىلىس دەپۋتاتتارى ورىس تىلىندە وقىتاتىن مەكتەپ تۇلەكتەرى ءۇشىن قازاق ءتىلى بويىنشا، قازاق تىلىندە وقىتاتىن مەكتەپ تۇلەكتەرى ءۇشىن ورىس ءتىلى بويىنشا العان بالىن ۇ ب ت كەزىندەگى گرانتقا ەنۋ بارىسىندا ەسكەرۋ قاجەتتىلىگى تۋرالى ماسەلەنى ءارتۇرلى دەڭگەيدە بىرنەشە رەت كوتەردى.
الايدا، ول شەشىمىن تاپپادى. وسى پاندەر بويىنشا العان بالل ءبىلىم بەرۋ گرانتىن يەلەنۋگە ارنالعان كونكۋرستا ەسكەرىلمەيدى. ال تومەندەگەن كەزدە، بۇل ەسكەرىلەدى. ياعني، كورسەتكىشتى جوعارىلاتاتىن كەزدە بالل ەسەپتەلمەيدى، كورسەتكىشتى تومەندەتكەن كەزدە مىندەتتى تۇردە ەسەپكە الىنىپ وتىر»، - دەيدى دەپۋتات گ. يسىمبايەۆا.
دەپۋتاتتىڭ سوزىنە قاراعاندا، الماتى قالاسى م. ماقاتايەۆ اتىنداعى 140-مەكتەپ- گيمنازياسىنىڭ وقۋشىسى، «التىن بەلگى» ۇمىتكەرىنىڭ اتا- اناسىنان ءدال وسى پروبلەماعا قاتىستى حات كەلگەن. وندا تۇلەك ءتورت پاننەن: قازاقستان تاريحى، ماتەماتيكا، قازاق ءتىلى، اعىلشىن ءتىلى پانىنەن جوعارى بالل جيناعان. ال قازاق مەكتەبىندەگى ورىس ءتىلى ءپانى بويىنشا وقۋشىنىڭ «التىن بەلگىگە» ءبىر بالى جەتپەي قالىپ وتىر. «وقۋشى بۇل رەتتە ۇلتتىق ءبىرىڭعاي تەستىلەۋدە بەرىلگەن تاپسىرماداعى تىنىس بەلگىسى قويىلماعاندىقتان قاتەلەسكەندىگىن ايتىپ، اپەللياتسيالىق كوميسسياعا دا ءوتىنىش جاساعان. راسىندا دا، تاپسىرمانىڭ جاۋابىندا ءتيىستى سىزىقشا بەلگىسى قويىلماعانى بەلگىلى بولدى. ءسويتىپ، تەست تاپسىرماسىنداعى قاتەلىك جاۋاپتىڭ دۇرىس بولماۋىنا سوقتىرىپ وتىر. سوندىقتان دا، وقۋشىنىڭ تالابىن ەسكەرىپ ءبىر بالل قوسۋعا بولار ەدى. الايدا، اپەللياتسيالىق كوميسسيا وقۋشىنىڭ ءوتىنىشىن قاراماعان»، - دەيدى دەپۋتات.
بۇل رەتتە گ. يسىمبايەۆا ءدال وسىنداي جاعدايدىڭ كوپتەپ كەزدەسەتىنىن العا تارتادى. ونىڭ ايتۋىنشا، 11 جىل بويى كىلەڭ بەسكە وقىعان بالا، تەستىلەۋدىڭ نەگىزگى ءپانىنىڭ بارىنەن بەس السا، «التىن بەلگىنىڭ» ۇمىتكەرىنە ورىس نەمەسە قازاق ءتىلى ءپانى نەگە كەدەرگى بولۋعا ءتيىس.
«بۇل ءپان ءبىلىم بەرۋ گرانتىن الۋعا ەسكەرىلمەيتىنى سەكىلدى، «التىن بەلگى» الۋ ءۇشىن دە ەسكەرىلمەۋى كەرەك. سوندا عانا ادىلدىك بولار ەدى»، - دەدى دەپۋتات.
بۇدان بولەك، گ. يسىمبايەۆا اپەللياتسيالىق كوميسسيالار الداعى ۋاقىتتا ءوز مىندەتىنە جاۋاپكەرشىلىكپەن قاراۋى تيىستىگىن ايتتى. ونىڭ سوزىنە قاراعاندا، سۇراقتارداعى تىنىس بەلگىلەرى، باسپاداعى باسقا دا قاتەلەر بالا تاعدىرىنا اسەر ەتەتىنىن ەسكەرىپ، بىلىكتى ماماندار رەتىندە ءادىل شەشىمدەر شىعارۋلارى كەرەك. «اسىرەسە، «التىن بەلگى الۋعا 1 بالل، كەيبىر جاعدايلاردا 2 بالل جەتپەي جاتقان بالالاردىڭ جۇمىستارى وتە مۇقيات قارالىپ، كۇماندى جاعدايدىڭ ءبارى وقۋشىنىڭ پايداسىنا شەشىلۋى ءتيىس»، - دەدى ءماجىلىس دەپۋتاتى.
اۆتور: قانات مامەتقازى ۇلى
