ۆيتسە-پرەمەر تۇلەكتەن كەشىرىم سۇراتقان ءبىلىم مينيسترلىگىنىڭ ماسەلەسىن قاراماق

  استانا. قازاقپارات - ق ر پرەمەر-ءمينيسترىنىڭ ورىنباسارى گۇلشارا ءابدىحالىقوۆا تۇلەكتەن كەشىرىم سۇراتقان ءبىلىم مينيسترلىگىنىڭ ماسەلەسىن شەشۋدى ۋادە ەتتى.

 «بۇل ماسەلەنىڭ مەن انىعىن بىلەيىن: قاي جاقتان شىقتى، نە سەبەپتەن سۇراق بولدى ونداي، نە سەبەپتەن كەشىرىم سۇرادى. مۇنداي كەڭ ايادا تالقىلاۋدى جۇرگىزىپ كەرەك ەمەس ەدى دەپ سانايمىن. ءاربىر ادام تالقىلاۋعا، سۇراق قويۋعا قۇقىلى. مەن بۇل سۇراقتى انىقتاپ بىلەيىن. ناقتىلاپ تاعى ءبىر قارايتىن بولامىز»، - دەدى ول بۇگىن ورتالىق كوممۋنيكاتسيالار قىزمەتىندە وتكەن بريفينگتە.

 پەتروپاۆل قالاسىنداعى ءابۋ دوسمۇحامبەتوۆ اتىنداعى وبلىستىق دارىندى بالالارعا ارنالعان ماماندىرىلعان گيمنازيا - ينتەرناتىنىڭ تۇلەگى اينۇر سەرىك 31- تەلەارناعا بەرگەن جالعان اقپارات ءۇشىن كەشىرىم سۇراعان بولاتىن.

«2014 - جىلعى ۇ ب ت تاپسىرمالارىنىڭ بارلىعى مەكتەپ باعدارلاماسىنا ساي سۇراقتار. بارلىق سۇراقتاردىڭ دۇرىس جاۋابى بار جانە دۇرىس قۇرىلماعان سۇراقتار مۇلدەم بولعان جوق» ، - دەپ جازعان اينۇر ءوز حاتىندا.

ەستەرىڭىزگە سالايىق، پەتروپاۆلدىق تالاپكەر اينۇر سەرىك ۇ ب ت سۇراقتارىنىڭ ىشىندە سىرا زاۋىتى تۋرالى سۇراقتىڭ كەزدەسكەنىن تەلەارنا ارقىلى ايتىپ، بۇكىل ەلدى ءبىر شۋلاتقان ەدى.

كەيىن بۇل سۇراقتى تىلشىلەر ءسارىنجىپوۆتىڭ وزىنە قويعان بولاتىن. ءبىراق ق ر  ب ع م ۇلتتىق تەستىلەۋ ورتالىعىنىڭ ديرەكتورى قالي ابديەۆ ارتىنان باسپا ءسوز ماجىلىسىندە 2014 - جىلعى ۇ ب ت- دا سىرا زاۋىتى تۋرالى سۇراق بولعان جوق دەپ مالىمدەدى. ءتىپتى اينۇردىڭ قازاقستان تاريحىنان تاپسىرعان تەست سۇراقتارىن اكەلىپ، جۋرناليستەرگە كورسەتتى. راسىمەن دە بۇل سۇراق جوق ەكەن.

ەسكە سالا كەتسەك، قازاقستاندا 2014 - جىلعى ۇ ب ت- عا 92 مىڭنان اسا مەكتەپ تۇلەكتەرى قاتىستى. ولاردىڭ تورتەۋى ەڭ جوعارى 125 بال جينادى.

 اۆتور: جاسۇلان جولدىبايەۆ