14:10, 10 - ماۋسىم 2014 | GMT +5
قازاقستان ازاماتتارى كورەياعا ۆيزاسىز باراتىن بولادى
استانا. قازاقپارات - قازاقستان ازاماتتارى كورەياعا ۆيزاسىز ساپارلاي الاتىن بولادى. بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە سىرتقى ىستەر ءمينيسترىنىڭ ورىنباسارى الەكسەي ۆولكوۆ ءمالىم ەتتى.
ا. ۆولكوۆتىڭ اتاپ وتۋىنشە، كورەيا پرەزيدەنتى پاك كىن حەنىڭ ەلىمىزگە مەملەكەتتىك ساپارى اياسىندا ەكى ەل اراسىنداعى 17 قۇجاتقا قول قويۋ جوسپارلانعان. ونىڭ ۇشەۋى ەكى ەلدىڭ مەملەكەت باسشىلارىنىڭ قاتىسۋىمەن راسىمدەلەتىن بولادى.
«سىزدەردىڭ نازارلارىڭىزدى مىنا قۇجاتقا اۋدارتقىم كەلەدى. ول قازاقستان رەسپۋبليكاسى مەن كورەيا رەسپۋبليكاسى ۇكىمەتتەرى اراسىنداعى ءوزارا ۆيزا تالاپتارىن الماسۋ تۋرالى كەلىسىم بولماق» ، - دەدى ول.
ونىڭ اتاپ وتۋىنشە، بۇل كەلىسىم جالپى ازاماتتىق ءتولقۇجاتى بار قازاقستان مەن كورەيا ازاماتتارىنا ءبىر ايعا دەيىن ءبىر- بىرىنە ۆيزاسىز ساپارلاۋعا مۇمكىندىك بەرەدى.
«بۇل تۋريزمدى، مەديتسينانى، عىلىمي تەحنولوگيالاردى، ستۋدەنتتەر الماسۋ جانە باسقا دا جايتتاردى دامىتۋمەن بايلانىستى» ، - دەدى ا. ۆولكوۆ.
اۆتور: مارلان جيەمباي
