ن. نازاربايەۆ «ەني» كومپانياسىنا قاشاعان جوباسىنىڭ كەلەشەگىنە الاڭداۋشىلىعىن ءبىلدىردى

استانا-بۋراباي. قازاقپارات - ەلباسى نۇرسۇلتان نازاربايەۆ «ەني» كومپانياسىنىڭ باس اتقارۋشى ديرەكتورى كلاۋديو دەسكالتسيمەن كەزدەستى، دەپ حابارلادى اقوردا سايتى.

كەزدەسۋ اقمولا وبلىسىنىڭ بۋراباي كەنتىندە ءوتىپ جاتقان ق ر پرەزيدەنتى جانىنداعى شەتەلدىك ينۆەستورلار كەڭەسى اياسىندا ءوتتى.

كەزدەسۋدە كومپانيانىڭ قاراشىعاناق جانە سولتۇستىك كاسپي جوبالارىن جۇزەگە اسىرۋعا قاتىسۋى جونىندەگى نەگىزگى جايتتار، سونداي-اق «قازمۇنايگاز» ۇ ك ا ق-مەن ءوزارا ءىس-قيمىلى تۋرالى اڭگىمە قوزعالدى.

نۇرسۇلتان نازاربايەۆ ك. دەسكالتسيدى جاڭا لاۋازىمعا تاعايىندالۋىمەن قۇتتىقتادى جانە قىزمەتىنە تابىس تىلەدى.

- ءبىزدىڭ كەزدەسۋىمىز يتاليا پرەمەر-ءمينيسترى ماتتەو رەنتسيدىڭ جۇمىس ساپارى قارساڭىندا ءوتىپ وتىر. ءبىزدىڭ ەلدەرىمىزدىڭ اراسىنداعى قارىم-قاتىناس ىلعي دا جوعارى دەڭگەيدە بولدى. «ەني» كومپانياسى قازاقستاندا 20 جىل بويى جۇمىس ىستەپ كەلەدى، ءبىزدىڭ ىنتىماقتاستىعىمىزدىڭ ەڭ باستى تارماعى سولتۇستىك كاسپي جوباسى بولىپ سانالادى. تۋىنداعان قيىندىقتارعا قاراماستان، ءبىز قويىلعان مىندەتتى ءارى قاراي شەشە الاتىنىمىزعا سەنىمدىمىن، - دەدى قازاقستان پرەزيدەنتى

اڭگىمە بارىسىندا مەملەكەت باسشىسى قاشاعان مۇناي-گاز كەنىشىن يگەرۋگە بايلانىستى جوبانى جۇزەگە اسىرۋ بارىسىنا قاتىستى الاڭداۋشىلىعىن ءبىلدىردى.

سونىمەن قاتار ەلدەگى مۇناي-گاز سالاسىن ودان ءارى دامىتۋ جانە ەنەرگيا رەسۋرستارىن تاسىمالداۋ جەلىسىن كەڭەيتۋگە جاعداي جاساۋ ماسەلەلەرى تالقىلاندى.

«ەني» - مۇناي مەن گازدى بارلاۋ، ءوندىرۋ، تاسىمالداۋ، وڭدەۋ جانە جەتكىزۋ باعىتتارى بويىنشا جۇمىس ىستەيتىن ينتەگراتسيالانعان ەنەرگەتيكالىق كومپانيا. ءوز جۇمىسىن كومپانيا 79 ەلدە جۇرگىزەدى، وعان جالپى سانى 80 مىڭعا جۋىق قىزمەتكەر جۇمىلدىرىلىپ وتىر. قازاقستاندا «ەني» كومپانياسى 1992 - جىلدان بەرى جۇمىس ىستەپ كەلەدى.