ستۋدەنتتەر اۋىلشارۋاشىلىعىن دامىتۋدىڭ ەڭ ءتيىمدى تاسىلدەرىن ۇسىندى

استانا. قازاقپارات - پاۆلودارلىق ءبىر توپ ستۋدەنت العاش رەت ديپلومدىق جۇمىستارىن ۋنيۆەرسيتەت قابىرعاسىندا ەمەس، شارۋا قوجالىقتارىنىڭ باسىندا قورعادى.

مەملەكەتتىك ۋنيۆەرسيتەتتىڭ اگروتەحنيكالىق فاكۋلتەت ىزدەنۋشىلەرى اۋىلشارۋاشىلىعىن يننوۆاتسيالىق تەحنولوگيالار ارقىلى دامىتۋدىڭ ەڭ ءتيىمدى تاسىلدەرىن ۇسىندى.

مەملەكەتتىك ەمتيحان قابىلدايتىن كوشپەلى كوميسسيا ءاربىر ديپلومدىق جۇمىستى مۇقيات تىڭداپ شىقتى.

ەۆگەنيا سەليۆانوۆا ەڭبەگىنىڭ باسەكەگە قابىلەتتىلىگىن دالەلدەپ جاتىر. ول قويعا قاراعاندا ەشكى ءوسىرۋدىڭ پايدالى ەكەنىن ايتادى. ماسەلەن 1 كەلى ەشكى ءتۇبىتىنىڭ قۇنى شامامەن نارىقتا 5 مىڭ تەڭگە، ال ەتى مەن ءسۇتى ديەتالىق تاعامعا جاتادى.

ءاربىر اسىل تۇقىمنىڭ وزىندىك ەرەكشەلىكتەرى بار. ال جانات تيتانوۆتىڭ ديپلومدىق جۇمىسىندا اسىل تۇقىمدى قوي ءوسىرۋدىڭ ءتيىمدى، ءتيىمسىز تۇستارى كەڭىنەن زەرتتەلگەن.

جانات تيتانوۆ ديپلومدىق جۇمىسىنا تاجىكتىڭ «گيسسار» قويلارىن العان. مالدى جان-جاقتى زەرتتەگەن جاس عالىم ونىڭ ءوسىپ-ونۋىنە قازاقستاننىڭ سولتۇستىك ايماقتارىنىڭ قولايسىز ەكەنىن دالەلدەپ شىقتى.

جانات تيتانوۆ، س. تورايعىروۆ اتىنداعى پ م ۋ ستۋدەنتى:

- «گيسسار» وڭتۇستىكتىڭ مالى بولعاندىقتان، وسى جاقتىڭ قىس مەزگىلىن كوتەرە المايدى. ونىمدىلىكتەرى، ابساليۋتتىك وسىمدەرى تومەندەپ قالادى.

تولەگەن اسانبايەۆ، ق ر اۋىلشارۋاشىلىعى عىلىمدارىنىڭ كانديداتى:

- ساۋىن بيەلەردىڭ قۇلىندارى سۇتتەن قاعىلاتىنى بەلگىلى. ولاردىڭ تەز جەتىلىپ كەتۋى ءۇشىن ءبيدايدىڭ جاس وسكىندەرىن پايدالانىلۋ ۇسىنىلدى. ول -  «A» ، «B» ، «C» ، «D» دارۋمەندەرى.

وسى تەحنولوگيانى ءبىزدىڭ ستۋدەنتتەرىمىز ديپلومدىق جۇمىسىن قولدانا وتىرىپ، قولدان تاماقتاناتىن قۇلىنداردى اسىراۋعا بولادى دەگەن وي ايتتى. ولار سوندا تابىننان كەنجە قالمايدى. مال شارۋاشىلىعىمەن اينالىساتىندار يننوۆاتسيانى الىستان ىزدەۋدىڭ قاجەتى جوق دەپ وتىر. ول ءۇشىن شارۋا قوجالىقتارىمەن تىعىز بايلانىس ورناتۋ جەتكىلىكتى.

مامانداردىڭ ايتۋىنشا، بۇل سالادا ديپلومدىق جۇمىسقا ارنالعان تاقىرىپ كوپ.

بەكزيا ىسقاقوۆا، ماي اۋدانىنىڭ اكىمى:

- ستۋدەنتتەر ديپلومدى دايىنداۋ ءۇشىن شارۋاشىلىققا كەلىپ، جىل بويى زەرتتەۋ جۇمىستارىن جۇرگىزىپ، تاجىريبەدەن ءوتۋى قاجەت. ويتكەنى، اۋىلشارۋاشىلىعىنا قازىر ماماندار كەرەك. ستۋدەنتتەر ءۇشىن مۇنداي تاجىريبەنىڭ بەرەرى مول. جاستار ديپلومدارىن العان سوڭ، اۋىلدا جۇمىس ىستەۋگە نيەتتى. بۇگىندە اگرارلى سالا بىلىكتى ماماندارعا ءزارۋ.

سوندىقتان اۋىلشارۋاشىلىعىنداعى تەوريا مەن تاجىريبەنى ۇشتاستىرىپ، زەرتتەۋ جۇمىستارىن جۇرگىزۋدى جوعارى وقۋ ورنى ارى قاراي دا جالعاستىرادى.

اۆتورلار: ق. قاسيەتوۆا، ا. ياكۋبوۆ، ا. ومەلنيتسكي

24.kz