جول اپاتىنان اتا-اناسى قازا بولعان تۇلەككە وبلىس اكىمىنىڭ وقۋ گرانتى بەرىلەتىن بولدى
ايتا كەتەيىك، اعىمداعى جىلدىڭ 7 - مامىر كۇنى «باتىس ەۋروپا-باتىس قىتاي» اۆتو ءدالىزىنىڭ قىزىلوردا وبلىسى، شيەلى اۋدانى، تارتوعاي ەلدى مەكەنى تۇسىندا جول-كولىك اپاتى بولىپ، 11 ادام قازا بولعان ەدى.
بيۋدجەتتەن تىس كوزدەردەن قايتىس بولعان 11 ادامنىڭ وتباسىنا 1 ميلليون تەڭگەدەن، ال جاراقات العاندارعا 500 مىڭ تەڭگەدەن قارجىلاي كومەك بەرىلدى.
- ارينە، قايعىنىڭ ورنىن تولتىرۋ مۇمكىن ەمەس. ءبىراق قولدان كەلگەن كومەكتى جاسايمىز. سىزدەر دە تۇسىنىستىكپەن قاراپ، سابىرلى بولىڭىزدار. مۇنداي جاعداي قايتالانباس ءۇشىن اباي بولايىق، - دەدى وبلىس اكىمى ق. كوشەربايەۆ.
جيىنعا قاتىسقان قىزىلوردا وبلىستىق ىشكى ىستەر دەپارتامەنتى باستىعىنىڭ تەرگەۋ جونىندەگى ورىنباسارى نۇرلان اناربايەۆ جول-كولىك وقيعاسىنا بايلانىستى قىلمىستىق ءىس قوزعالىپ، بارلىق ءىس بويىنشا بىرنەشە ساراپتامالار تاعايىندالعاندىعىن ايتتى. وسى ساراپتاما ناتيجەسى ءادىل، وبەكتيۆتى جۇرەتىنىن جەتكىزدى. ال وبلىستىق دەنساۋلىق ساقتاۋ باسقارما باسشىسىنىڭ مىندەتىن اتقارۋشى ساكەن سەرعازيەۆ اۋرۋحانادا ەم الىپ جاتقان ناۋقاستاردىڭ جاعدايى ءبىرقالىپتى ەكەنىن ايتىپ، ولارعا قاجەتتى مەديتسينالىق كومەك ۋاقىتىلى كورسەتىلىپ جاتقانىن باياندادى.
ايماق باسشىسى جاپا شەككەندەردىڭ وتباسىنا قارجىلاي كومەكتەن بولەك، قاجەتتى الەۋمەتتىك قولداۋ كورسەتىلەتىنىن ايتتى. ماسەلەن، اتا- اناسىنان ايىرىلعان مەكتەپ ءبىتىرۋشى تۇلەككە وبلىس اكىمىنىڭ وقۋ گرانتى بەرىلەتىن بولدى.
اۆتور: ەلۋباي اۋەزوۆ
