مەملەكەتتىك ەمتيحاننان تولىق ۇپاي جيناعان قوس تۇلەك
تەستىلەۋدەن سوڭ تالايلار ورامالىن سۋ عىپ جىلادى. الدەكىمدەرگە ۇلكەن ۋنيۆەرسيتەتتىڭ ەسىگى اشىلدى. تاعى بىرەۋلەرگە تارس جابىلدى.
تومەن بال العانىنا اۋەلى ءوزىن، ودان قالسا، «شپارگالكاسىن» (كوشىرمە، ۇرلىق قاعاز) تارتىپ العان كوميسسيانى كىنالاعاندار دا كەزدەستى. «دۇرىس وقىتپادى، كومەكتەسپەدى» دەپ ۇستازىن جازعىرىپ جۇرگەندەر دە جەتەرلىك. ۇلتتىق تەستىلەۋ ورتالىعىنىڭ دەرەگىنشە، 2-9 - ماۋسىم ارالىعىندا 92077 مەكتەپ ءبىتىرۋشى تەستىلەۋدەن ءوتتى. ولاردىڭ 63603- ءى سىناقتى قازاق تىلىندە، 28474- ءى ورىس تىلىندە تاپسىردى.
ۇ ب ت- نىڭ تۇسىندا تۇلەكتەردىڭ كوپشىلىگى ءوز بىلىمدەرىنە سەنىمسىزدىكتەرىن بايقاتىپ الدى. بۇلاي دەيتىنىمىز، العاشقى ءۇش كۇننىڭ وزىندە تالاپكەرلەردەن 11046 ۇيالى تەلەفون، 7533 شپارگالكا، 438 كالكۋلياتور (ەسەپ ماشينا)، 82 فوتو اپپارات، 8 راتسيا، 8 بليۋتۋز، 19 فلەشكا، 17 wi-fi تابىلىپتى. تەكسەرۋشىلەر: «تالاپكەرلەردەن راتسيالىق قۇرالدارمەن قوسا كەڭسە پىشاعى مەن قول سكانەرىن دە تاركىلەدىك» دەگەندە، تەست تاپسىرۋشىلاردىڭ سونشالىقتى «قارۋلانعانىنا» قايران قالدىق.
ايتسە دە، 11 جىلعى ءبىلىمىن دالەلدەپ، 125 سۇراقتىڭ جاۋابىن تولىق شەشكەن تالاپكەرلەر دە بار. 2-3 - ماۋسىمدا تەست تاپسىرعانداردىڭ اراسىندا الماتىلىق ەكى تۇلەك 125 بال جينادى. №178 ليتسەيدىڭ تۇلەگى ايعانىم ءابدىجاپپار مەن ى. التىنسارين اتىنداعى №159 گيمنازيانىڭ ءبىتىرۋشىسى ءاسيا ماراتتىڭ ەسىمى ءا دەگەننەن- اق كوپتىڭ اۋزىنا ىلىكتى. ولار 125 بال جيناپ، ۇزدىك ناتيجە كورسەتتى. «التىن بەلگىلەرىن» دە اقتادى. ەكى قىزبەن دە ۇ ب ت- عا قالاي دايىندالعاندارىن سۇراپ، سۇحباتتاسقانبىز. ۇزدىكتەردىڭ ۇ ب ت- عا دايىندالۋ ءادىسى كەيىنگىلەرگە ۇلگى بولارلىق ەكەن.
ايعانىم ءابدىجاپپاردىڭ رەداكسيامىزدىڭ ەسىگىن اشقان ساتتە قۋانىشتى ەكەنى ءبىلىنىپ تۇردى. ءجۇزى بال- بۇل جايناپ: «ۇلان» گازەتى مە؟ - دەدى كۇلىمدەي. ول جوعارى ناتيجەگە قول جەتكىزگەنىنىڭ قۇپياسىن بىلاي ءتۇسىندىردى.
ايعانىم ءابدىجاپپار:
11- سىنىپقا اياق باسقالى «م- اگەنت، ۆكونتاكتە، فەيسبۋك، تۆيتتەر، ينستاگرام» ءبارىن ۇمىتتىم. عالامتورعا كىرۋدەن ءوزىمدى اۆتوماتتى تۇردە شەكتەدىم. اركىم ءوزى شەشەدى، ارينە. ءبىراق، ۋاقىتتى ءتيىمدى پايدالانۋ ءۇشىن بۇل ءتاسىل وتە ءتيىمدى. مەن وقيتىن مەكتەپ ماتەماتيكانى تەرەڭدەتىپ وقىتاتىندىقتان، ەسەپتەن قينالعان جوقپىن. قالعان ساباقتارعا تازا وقۋلىقپەن دايىندالدىم. وزگە دەرەك كوزدەرىنە جۇگىنىپ، باس اۋىرتۋدىڭ قاجەتى جوق. ويتكەنى، ۇ ب ت- داعى بارلىق تاپسىرمالار مەكتەپ باعدارلاماسىنا نەگىزدەلگەن. ارنايى تاربيشىلەرگە بارمادىم. قوسىمشا ساباقتى ءوزىمنىڭ ۇستازدارىمنان الدىم.
ماعان كەلگەن نۇسقادا بۇرىن كەزدەسپەگەن سۇراقتار دا، لوگيكالىق تاپسىرمالار دا بولدى. ولارعا ويىمدى جيناقتاپ، سارالاي كەلە جاۋاپ بەردىم. ناتيجەدە، جاۋاپتارىمنىڭ ءبارى دۇرىس بولىپ، 125 بالدى ەنشىلەدىم. شپارگالكا قولدانبادىم. سەبەبى، كوشىرۋدىڭ ءوزىن كەلىستىرە المايمىن. جانىمداعى تالاپكەرلەردىڭ نە ىستەپ وتىرعانىنا ءمان بەرەتىن ۋاقىتىم بولمادى. باسقالارعا الاڭدايمىن دەپ ۋاقىت جوعالتپاۋ كەرەك، دۇرىسى.
ال ءاسيا ماراتپەن تەلەفونمەن تىلدەستىك. ءسوزى مىعىم ەكەندىگى بايقالدى. اپەللياتسيالىق جولمەن 1 سۇراقتىڭ جاۋابىن دالەلدەگەن ءاسيانىڭ بىلىمدىلىگىنە ريزامىز. «124 بالعا دا شۇكىر» دەي سالماي، ءوزىنىڭ دۇرىس جاۋاپ بەرگەنىن قايتا قاراۋعا ۇسىنىپ، جەڭىپ شىقتى. قازاق ءتىلى پانىنەن بەرىلگەن 25- سۇراق «تىنىس بەلگىسى دۇرىس قويىلماعان سويلەمدى تابىڭىز» دەگەن ەكەن. سىناق بارىسىندا ءاسيا سول سۇراققا ۇزاق ويلانىپتى.
ءاسيا مارات:
اۋديتوريادان شىققاندا، 125 سۇراقتىڭ جاۋابىن دۇرىس شەشكەنىمە سەنىمدى ەدىم. تەست كىلتتەرى شىعىپ، مەنىڭ ۇپايلارىمدى ەسەپتەگەندە 124 بولىپ قالدى. وسىلايشا قاي جاۋاپتىڭ قاتە بولعانىن ءبىلدىم. سويتسەم، قازاق تىلىنەن ءوزىم كۇماندانعان سۇراق ەكەن. تەست ورتالىعى ەكى دۇرىس جاۋاپ جازعان. وسىنى ايتقانىمدا، مەنىڭ جاۋابىمدى «قاناعاتتانارلىق» دەپ باعالاپ، ارتىنشا 1 ۇپايىمدى قوستى.
مەن 11 جىل بويى ۇزدىك وقىدىم. ساباقتى جاقسى وقىعانىمنىڭ ارقاسىندا وسىنداي ناتيجە كورسەتە الدىم. نەگىزى، ءار سىنىپتا جاقسى وقىپ، وقىعانىڭدى جادىڭا ساقتاي بىلسەڭ، تەست بارىسىندا ەش قيىندىق تۋىندامايدى.
ايعانىم دا، ءاسيا دا ناقتى قاي وقۋ ورنىنا قۇجات تاپسىراتىنىن ءالى شەشپەپتى. ءبىر نارسە عانا انىق - ولار ەلىمىزدە ءبىلىم الماقشى. ەكەۋىنىڭ دە تاڭداۋ پاندەرى - گەوگرافيا. ءاسيا «ەسەپ جانە اۋديت» ماماندىعىن يگەرمەكشى. ايعانىم ەكونوميكا نەمەسە جەرگىلىكتى باسقارۋ سالاسىن قالاپ وتىر. «قارجىگەر ماماندىعىنا نەمەسە گەوگرافيا سالاسىنا قاتىستى ماماندىقتاردىڭ قاي- قايسىسىنا دا قۇجات تاپسىرسام بولادى عوي» دەپ جىميدى. ونىسى راس ەندى. «التىن بەلگى» مەن 125 بالدى يەلەنگەن التىن قىزدارعا ەلىمىزدەگى ۋنيۆەرسيتەتتەردىڭ قاي- قايسىسىنىڭ دا ەسىگى اشىق.
جادىرا اققايىر
(«ۇلان» ، №23. 10.06.2014)
