قاشاعاندى يگەرىپ جاتقان كونسورتسيۋمدە وزگەرىستەر بولماق
North Caspian Operating Company -NCOC باسپا ءسوز قىزمەتى حابارلادى.
مۇنداي شەشىم وتكەن جىلعى كۇزدە گاز قۇبىرىندا بولعان بىرنەشە اپاتتى جاعدايدان كەيىن قابىلداندى، سونىڭ سالدارىنان بەلگىسىز ۋاقىتقا قاشاعاندا مۇناي ءوندىرۋ توقتاتىلدى. جوبا وپەراتورى NCOC كومپانياسىنىڭ جۇمىسى ءتيىمسىز دەپ تانىلدى.
«قاشاعان جوباسىنىڭ يگەرۋ كەزەڭىنەن ءوندىرۋ كەزەڭىنە ءوتۋى سولتۇستىك كاسپي بويىنشا ءونىمدى ءبولۋ كەلىسىمى اۋقىمىندا رەسۋرستاردى ودان ءارى يگەرۋگە كونسورتسيۋمدى ازىرلەۋ ماقساتىندا وپەراتور مەن اگەنتتەردىڭ قىزمەتىن بىرىكتىرۋ جانە ودان ءارى ىقپالداستىرۋ مۇمكىندىگىن ۇسىنادى.
بۇل مۇمكىندىكتى جاقسىراق پايدالانۋ ءۇشىن كونسورتسيۋم قاتىسۋشىلارى قازىرگى وپەراتسيالىق مودەلدەن ءبىرىڭعاي شوعىرلاندىرىلعان بىرلەسكەن كومپانياعا بىرتە- بىرتە كوشۋگە ۋاعدالاستى. ءبىرىڭعاي شوعىرلاندىرىلعان بىرلەسكەن كومپانيا ءوز قىزمەتىندە NCOC پەن اگەنتتەردىڭ يگەرۋ، بۇرعىلاۋ جانە پايدالانۋ سالاسىنداعى جەتىستىكتەرىن ءوز جۇمىستارىندا پايدالاناتىن بولادى. جاڭا كومپانيا كونسورتسيۋم قاتىسۋشىلارى جاساعان قازىرگى قۇرالدار مەن ۇدەرىستەردى بىرىكتىرىپ، باسقارۋدىڭ ءبىرىڭعاي كورپوراتيۆتىك جۇيەسى اۋقىمىندا جۇمىس جاسايتىن بولادى» ، - دەپ حابارلادى باسپا ءسوز قىزمەتى.
ءبىرىڭعاي شوعىرلاندىرىلعان بىرلەسكەن كومپانيا
North Caspian Operating Company -NCOC دەپ اتالماق. ءبىرىڭعاي وپەراتسيالىق كومپانيا قىزمەتكەرلەرىنىڭ باسىم بولىگى اتىراۋدا بولادى. مەملەكەتتىك لاۋازىمدى تۇلعالارمەن ءوزارا ءىس- قيمىلدى جۇزەگە اسىراتىن قىزمەتكەرلەر استانادا بولماق.
بۇل جۇمىستار بيىلعى جىلى باستالماق، ءبىراق ول قۇبىرلاردى جوندەۋگە، ءوندىرۋدى قايتا باستاۋعا، كەنىشتى يگەرۋدىڭ ءبىرىنشى كەزەڭىنەن قالعان جۇمىستار كولەمىن اياقتاۋعا اسەر ەتپەيدى. بولعان وزگەرىستەر تۋرالى رەسمي جاريالانعانعا دەيىن بۇرىنعى باسشىلىقپەن قازىرگى وپەراتسيالىق مودەل پايدالانىلادى. ونىمدەردى ءبولۋ كەلىسىمىندە جانە جوباعا قاتىسۋشىلاردىڭ مەنشىگى قۇرىلىمىندا وزگەرىستەر بولمايدى، دەپ اتاپ ءوتتى NCOC باسپا ءسوز قىزمەتى.
ەسكە سالا كەتەيىك، 1 - مامىردان باستاپ NCOC- تىڭ باسقارۋشى ديرەكتورى قىزمەتىنە پەر وففاننىڭ ورنىنا بۇدان بۇرىن ExxonMobil كومپانياسىندا جۇمىس جاساعان ستەفان دە مايە تاعايىندالدى.
بۇدان بۇرىن حابارلانعانداي، كەنىشتەگى ءوندىرۋدى توقتاتۋ قاشاعاننان تەڭىز تۇبىمەن جەر ۇستىندەگى «بولاشاق» كەشەنىنە دەيىن تارتىلعان 93 شاقىرىمدىق قۇبىردىڭ ەكى تارماعىندا جارىقشاق پايدا بولۋى انىقتالعاننان كەيىن بولدى. كەنىشتىڭ العاشقى كەزەڭىندە تاۋلىگىنە 200 مىڭ باررەلگە دەيىن مۇناي ءوندىرۋ، ونىڭ جوعارى شەگىن تاۋلىگىنە 1,5 ميلليون باررەلگە دەيىن جەتكىزۋ جوسپارلانعان بولاتىن.
