قازاق تەليەۆيزياسىنىڭ تاريحىندا بولماعان جوبا - قازاق سپورت تەلەارناسى برازيليادان تىكەلەي كورسەتىلىم جاساماق
- جول بولسىن، ەرمۇحامەد اعا. برازيلياعا اتتانار الدىنداعى كوڭىل- كۇيىڭىز قالاي؟
- كوڭىل- كۇيىم كەرەمەت. بۇل جولى مەن ومىرىمدەگى ەڭ ءىرى فۋتبول جارىسىنا بارا جاتىرمىن. تالاي جىلدار بويى ارمان بولعان بۇل دۇنيە ءبىر- اق كۇندە ومىرشەڭدىگىن كورسەتتى. جانە اناۋ- مىناۋ ەمەس فۋتبولدىڭ بەيرەسمي وتانى برازيلياعا! ول جاقتا فۋتبولدىڭ قانداي دەڭگەيدەگى سپورت ەكەندىگىن بارلىقتارىڭىز بىلەسىزدەر. برازيليا فۋتبولمەن تىنىستاپ تۇرعان ەل. فۋتبول كورولى پەلە، مىڭ گول سوققان روماريو، مۋنديالدار تاريحىندا ەڭ كوپ گول سوققان رونالدو مەن وسى كۇنگى ميلليونداردىڭ پىرىنە اينالعان نەيماردىڭ وتانى. ءان مەن بيگە اۋەس، جىلىنا ءبىر كارناۆالداتىپ تۇراتىن برازيليا جاعاجايدا جالاڭاياق دوپ تەپكەندى جانىنداي قالايتىن حالىق. مۇنىڭ بارلىعىن كوزبەنەن كورمەسەڭ دە، سەزىنىپ، تانىسىپ قايتۋدىڭ ءوزى ءبىر باقىت.
- «قازاق تەليەۆيزياسىنىڭ تاريحىندا بولماعان جوبا» الدىندا قوبالجۋ بار ما؟
- «مۋنديالعا» مەن جاي ءتىلشى رەتىندە ەمەس، سونىمەن قاتار كوممەنتاتور رەتىندە بارامىن. بۇرىن- سوڭدى «قازاق تەليەۆيزياسىنىڭ تاريحىندا بولماعان جوبا» دەپ وسى كۇنى جارنامالاتىپ جاتقانداي- اق، ەلدە بولماعان جاڭاشىلدىق جاساماقپىز. چەمپيوناتقا بارعانداردىڭ جازعانىن وقىپ وتىراتىن زامان ارتتا قالىپ، سول جاقتا وتىرىپ تىكەلەي ەفيردە سويلەيتىن دەڭگەيگە جەتتىك. بۇل مەن ءۇشىن ۇلكەن تاجىربيە بولماق. وسىعان دەيىن ازيادا ويىندارىندا ستاديوننىڭ باسىنان ەفيرگە شىققانىم بار- تىن. سونى ۇلكەن تاجىربيە دەپ جۇرگەنمىن. ەندى بۇل جولعى اڭگىمە ءتىپتى بولەك. ونىڭ ۇستىنە بۇل فۋتبول تويى! ال مەن ءوز باسىم فۋتبولدى كوپ نارسەدەن بيىك قويامىن.
- ءىرى دودالاردى تىكەلەي ەفيردە جۇرگىزۋ وڭاي شارۋا ەمەس ەكەنى بەلگىلى. دايىندىعىڭىز قالاي؟
- ءىرى دودالاردىڭ كەزىندە كوممەنتاتور بولۋ نەگىزى وڭاي شارۋا ەمەس. ءبىر ماتچقا دايىندالىپ كەلىپ، اعىلا سالاتىن ءجايتقا جاتپايدى. مۇندا تۋرا فۋتبولشىلار سەكىلدى بۇكىل تۋرنيرگە تەگىس دايىندالۋىڭ كەرەك. 2012 - جىلى ەۋرو وتكەن كەزدە سونىڭ ءبىر شەتىن كورىپ قالعان ەدىم. ول كەزدە ويىنداردى تەك الماتىدا، ستۋديادا وتىرىپ جۇرگىزدىم. بۇل جولعى دايىندىق ەرەكشە.
- جولساپارلارىڭىز جايلى ايتا وتىرساڭىز، قانشا جۋرناليست اتتانعالى وتىرسىزدار؟
- «KazSport» ارناسىنىڭ 7 بىردەي قىزمەتكەرى چەمپيوناتقا جول تارتپاق. ونىڭ 4 ەۋى كوممەنتاتور ءارى جۋرناليست، ۇشەۋى رەجيسسەر. ولار ەكى توپقا بولىنگەن. ءبىزدىڭ توپ «ۇلكەن ايماق» دەپ اتالادى. ءبىزدىڭ جولسىزبامىزدى جاساعان پروديۋسسەرلەر قوناقۇي، ءارى- بەرى ءجۇرۋىمىزدىڭ بارلىعىن الدىن الا جوسپارلاپ تاستاعان. مەن ارىپتەسىم پاۆەل تسىبۋلين جانە تاعى ەكى رەجيسسەر 4 قالادا بولامىز. كۇن سايىن سول 4 قالانى كەزەكپە- كەزەك ارالايمىز. ويىن اياقتالىسىمەن ورتاداعى ساناۋلى ساعاتتى اۋەجايعا جەتۋگە ارنايمىز. ويتكەنى، كۇنىنە ءبىر مارتە تىكۇشاققا ءمىنىپ، كەلەسى قالاعا بارۋىمىز كەرەك. كەيبىر كۇندەرى ۋاقىتتىڭ تىعىزدىعىنان ۇيىقتاۋعا دا ورىن قالماعان. مۇنداي جاعدايعا ارينە شىداۋعا بولادى. وسىنداي جاعدايمەن مەن وتكەن جىلدارى چەمپيوندار ليگاسىنىڭ كەزىندە جولىققانمىن. ءبىر ۇشاقتان، ءبىر ۇشاققا سەكىرىپ، جول- جونەكەي اۋىر سومكەلەردى ارقالاۋ بۇل ادامدى ابدەن قاجىتادى. ال سونداي قالىپتا 39 كۇن بويى ءجۇرۋ ءتىپتى، اۋىر بولماق.
ەكىنشى توپتا ەرمەك تورەنيازوۆ پەن تيمۋر سۇلەيمەنوۆ سەكىلدى كوممەنتاتورلار قىزمەت ەتپەك. ولاردىڭ جۇمىس كەستەسى بىزدىكىندەي. ءبىز برازيليا، سان- پاۋلۋ، ريو- دە- جانەيرو، جانە بەلۋ- وريزونتي قالالارىندا بولساق، ولار جارىس وتەتىن وزگە 4 قالادا بولادى.
- جاقىندا حالىقارالىق سپورت جۋرناليستەرى قاۋىمداستىعى (AIPS) برازيليادا وتەتىن الەم چەمپيوناتىنا جول تارتاتىن تىلشىلەرگە ساق بولۋدى ەسكەرتتى. بۇل تۋرالى نە دەيسىز؟
- ءيا، بۇل جاعىنان حاباردارمىن. اتتانار الدىندا ەلدىڭ بارلىق تىنىس- تىرشىلىگىمەن تانىستىم. ءبىز باراتىن كەي قالالار الەمدەگى قىلمىستىڭ وتانى دا سانالادى ەكەن. باستىسى - ساق بولۋىمىز كەرەك.
- قاي قۇراما توپ جارادى دەپ ويلايسىز؟ قاي قۇراماعا جانكۇيەرلىك تانىتاسىز؟
- وڭتۇستىك امەريكا قۇرلىعىندا وتكەن الەم چەمپيوناتىنىڭ بارلىعىندا وزگە قۇرلىق قۇرامالارىنا چەمپيوندىق بۇيىرماعان. بۇل جولى دا سولاي بولاتىن سەكىلدى. ارگەنتينا نەمەسە ۋرۋگۆاي چەمپيون بولۋى مۇمكىن. ال ءوز باسىم اعىلشىنداردىڭ اسىعى الشىسىنان تۇسكەنىن قالايمىن.
- سۇقباتىڭىزعا راقمەت! جولىڭىز بولسىن. ەڭبەكتەرىڭىزگە تابىس تىلەيمىز!
سۇقباتتاسقان: ومىربەك سانسىزباي
سۋرەت: ەرمۇحامەد ماۋلەننىڭ جەكە مۇراعاتى
massaget
