بىرىككەن اراب امىرلىكتەرى اسكەر سانىن كوبەيتبەك

ءابۋ- دابي. قازاقپارات - بىرىككەن اراب امىرلىكتەرىنىڭ پرەزيدەنتى شەيح حاليفا بين زايەد ءال ناحايان سەنبى كۇنى امىرلىكتەگى ەر ادامداردىڭ اسكەري قىزمەتتەن مىندەتتى تۇردە وتەتىنى تۋرالى زاڭ شىعاردى.

ب ا ءا- ءنىڭ «ۋاكاليات انبا ەل- ەمارات» (WAM) ۇلتتىق اقپارات اگەنتتىگىنىڭ حابارلاۋىنشا، بۇل شەشىم پارسى شىعاناعىنداعى اراب مەملەكەتىنىڭ تاياۋ شىعىس ايماعىنداعى تۇراقسىزدىقتىڭ كەڭەيە تۇسۋىنە الاڭداۋشىلىعىنان تۋىنداپ وتىر.

زاڭنىڭ شىعارىلۋى ۇلداردى وتانعا سۇيىسپەنشىلىك، ادالدىق جانە رياسىز قىزمەت ەتۋ رۋحىندا تاربيەلەۋ ماقساتتارىنا ساي كەلەدى» ، - دەلىنگەن WAM حابارلاماسىندا.

امىرلىك باسشىسى شەيح حاليفا بين زايەد ءال ناحايان اراب مونارحياسىندا مىندەتتى اسكەري قىزمەت ەنگىزۋ يدەياسىن العاش رەت بيىلعى قاڭتار ايىندا ايتقان بولاتىن. زاڭعا قول قويىلعاننان كەيىن ول دەنساۋلىعى جونىنەن مەديتسينالىق تالاپتارعا ساي كەلەتىن 18 بەن 30 جاس ارالىعىنداعى امىرلىكتەگى ەر ادامداردىڭ بارىنە قاتىستى. امىرلىك ارمياسىنا الىنعان ورتا ءبىلىمدى ازاماتتار توعىز اي، ال مەكتەپ اتتەستاتى جوقتار اسكەري بورىشىن ەكى جىل وتەيدى.

امىرلىكتە ايەلدەردىڭ ارميادا قىزمەت ەتۋى مىندەتتى ەمەس. ەگەر ايەلدەردىڭ ءوزى تىلەك بىلدىرسە، توعىز اي قىزمەت ەتەدى، وندا دا الدىمەن شاريعات زاڭىنا سايكەس قامقورشىسىنىڭ ماقۇلداۋى مىندەتتى بولماق.

ب ا ءا- دەگى اسكەري قىزمەت وقۋ كەزەڭدەرىن، اسكەري جاتتىعۋلاردى جانە پاتريوتيزم مەن قاۋىپسىزدىك جونىندەگى دارىستەردى قامتيدى. لوندونداعى حالىقارالىق ستراتەگيالىق زەرتتەۋلەر ينستيتۋتىنىڭ مالىمەتتەرىنە قاراعاندا، ب ا ءا قارۋلى كۇشتەرىندە 51 مىڭ ادام بار، ونىڭ ىشىندە قۇرلىقتاعى اسكەردە - 44 مىڭ، اسكەري- تەڭىز فوتىندا - 2,5 مىڭ ادام، اسكەري- اۋە كۇشتەرىندە 4,5 مىڭ اسكەر قىزمەت ەتەدى.