رەسەي مۇنايى قازاقستان ارقىلى قىتايعا تاسىمالدانباق

استانا. قازاقپارات - بۇگىن پارلامەنت ماجىلىسىندە پالاتا دەپۋتاتتارى «قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەسپۋبليكاسىنىڭ اۋماعى ارقىلى قىتاي حالىق رەسپۋبليكاسىنا رەسەيلىك مۇنايدى تاسىمالداۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى.

اتالعان كەلىسىم 2013 - جىلدىڭ 24 - جەلتوقسانىندا ماسكەۋ قالاسىندا جاسالعان بولاتىن.

 «كەلىسىم رەسەيلىك مۇنايدى جىلىنا 7 ميلليون توننا كولەمىندە ۇزاق مەرزىمدى تاسىمالداۋى ءۇشىن جاعداي تۋعىزادى. بۇل رەتتە ومبى (رەسەي) - ەرتىس (قازاقستان) - اتاسۋ (قازاقستان) - الاتاۋ (ق ح ر) تاسىمالداۋ باعىتى بويىنشا ماگيسترالدىق قۇبىرلار جۇيەسىنە قول جەتكىزۋ قۇقىعىن قامتاماسىز ەتەدى. سونىمەن قاتار، ماگيسترالدىق قۇبىردىڭ وتكىزۋ مۇمكىندىگىن ون ميلليون تونناعا دەيىن ۇلعايتۋ مۇمكىندىگى دە ەسكەرىلەدى» ، - دەيدى مۇناي جانە گاز ءمينيسترى ۇزاقباي قارابالين.

ونىڭ ايتۋىنشا، مۇناي تاسىمالداۋعا ارنالعان تاريف بەس جىلعا بەكىتىلەدى. مۇنايدى تاسىمالداۋ باعىتى بويىنشا تاسىمالدانعان مۇنايدىڭ ءاربىر تونناسى ءۇشىن ا ق ش دوللارىمەن ەسەپ ايىرىسۋ قاراستىرىلادى. قازاقستان تاراپى تاسىمالداۋ باعىتى بويىنشا مۇنايدى تاسىمالداۋ جونىندەگى قىزمەتتەرگە نولدىك مولشەرلەمەمەن قوسىلعان قۇن سالىعىن سالۋدى كوزدەيدى. بۇل رەتتە قازاقستان تاراپى ەلىمىزدىڭ سالىق زاڭناماسىنا سايكەس، قوسىلعان قۇن سالىعىن قايتارۋ ءۇشىن مۇنايدى تاسىمالداۋ جونىندەگى قىزمەتتەردى حالىقارالىق تاسىمال رەتىندە قاراستىرادى.

اۆتور: قانات مامەتقازى ۇلى