فۋتبولدان ءا چ: كىم توپتان سۇرىنبەي شىعادى؟ - ءبىزدىڭ بولجام

استانا. قازاقپارات - ساناۋلى كۇندەردەن كەيىن تورتكۇل دۇنيە ءتورت جىل بويى كۇتكەن فۋتبولدان الەم چەمپيوناتى باستالادى.

بيىل برازيليادا وتەتىن ءدۇبىرلى دوپ دوداسىندا كىم توپ جارادى؟

قانداي جارىق جۇلدىزدار اشىلادى؟

كۇللى الەم نازارىن تىگىپ وتىرعان بايگەنىڭ قارساڭىندا «قازاقپارات» وسى جانە باسقا دا سۇراقتارعا جاۋاپ ىزدەپ، مۋنديالعا قاتىسۋشىلاردىڭ مۇمكىندىكتەرىن تارازىعا سالۋدى ءجون كوردى. بۇگىنگى ماقالادا توپتىق كەزەڭگە تالداۋ جاساپ كورەلىك...

توپتىق كەزەڭ

ا توبى. برازيليا، حورۆاتيا، مەكسيكا، كامەرۋن.

العاشقى توپتا چەمپيوناتتى ۇيىمداستىرۋشى ەل ءارى الەمنىڭ بەس دۇركىن چەمپيوندارى برازيليا قۇراماسىنا حورۆاتيا، مەكسيكا جانە كامەرۋن قارسىلاس اتانباق. بۇل توپتىڭ سەركەسى ءسوزسىز الاڭ قوجايىندارى بولۋى ءتيىس.

جالپى، نەيمار باستاعان «پەنتاكامپەوندارعا» اۋىر جۇك ارتىلىپ وتىر، سەبەبى الەۋمەتتىك نارازىلىق جايلاعان برازيليا حالقىنا تەك كۋبوك قاجەت. باسقا ناتيجە ولاردى قاناعاتتاندىرمايدى.

سوندىقتان لۋيس فەليپە سكولاري شاكىرتتەرىنە بارىن سالۋ قاجەت. ءبىر قىزىعى، بۇل جولى برازيليا قۇرامىنداعى باستى جۇلدىزدار قورعانىس شەبىندە جينالعان. تياگو سيلۆا، داۆيد لۋيس پەن دانتە، مارسەلو مەن داني الۆەش سەكىلدى تاسقامال قورعاۋشىلاردىڭ قارسىلاستى جۋليو سەزاردىڭ قاقپاسىنىڭ ماڭايىنا جولاتپاۋعا شامالارى كەلەدى.

بۇكىل ەلدىڭ ۇكىلەگەن ۇمىتىنە اينالىپ وتىرعان نەيمار ءۇشىن بۇل ەرەكشە سىن. ءبىرىنشى ورىندى الاڭ يەلەرى ەشكىمگە بەرە قويماس دەپ وتىر ماماندار. ال ەكىنشى ورىن جانە 1/8 فينالعا جولداما ءۇشىن كۇرەستى قالعان ءۇشى قۇراما جۇرگىزەتىن بولادى. بۇل رەتتە بالقان تۇبەگىنەن كەلگەن اياق دوپشىلار مەن مەكسيكالىقتاردىڭ مۇمكىندىكتەرى ءسال باسىمىراق كورىنەدى.

ءبىزدىڭ بولجام: ءبىرىنشى ورىن برازيلياعا بۇيىرادى، ەكىنشى ورىن ءۇشىن كۇرەس حورۆاتيا مەن مەكسيكا اراسىندا وتەدى. قۇرامى جاعىنان حورۆاتتاردىڭ مۇمكىندىكتەرى جوعارىراق كورىنەدى.

ۆ توبى. يسپانيا، گوللانديا، چيلي، اۆستراليا.

2010 - جىلى وڭتۇستىك افريكا رەسپۋبليكاسىندا وتكەن سوڭعى الەم بىرىنشىلىگىنىڭ فينالىندا يسپانيا مەن گوللانديا قۇرامالارى ويناعانى بەلگىلى. بۇل جولى ازۋلى قارسىلاستار توپتىق تۋرنيردە جولىعىپ وتىر.

سونداي-اق بۇل توپتا چيلي مەن اۆستراليا دا ونەر كورسەتەدى. كورشى توپتا برازيليا، سوندىقتان دا بارلىعى تەك ءبىرىنشى ورىن ءۇشىن ايقاساتىنى ايتپاسا دا تۇسىنىكتى. قازىرگى الەم جانە ەۋروپا چەمپيوندارى يسپانيا وسى جولى دا جەتىستىگىن قايتالاي الا ما؟

ءتورت جىل بۇرىن جاسىنداي جارقىلداپ، التىندى اپەرگەن كاسيلياس، حاۆي، ينەستالار وردا بۇزار شاقتان اسىپ بارادى. ال جاس ويىنشىلار قۇراما تىزگىنىن ءوز قولدارىنا الۋعا ازىرگە اسىعار ەمەس. ال گوللانديا شە؟ روببەن، سنەيدەر، ۆان پەرسي سەكىلدى جارىق جۇلدىزدارمەن بىرگە برازيليا الاڭىندا نەگىزىنەن جاس ويىنشىلار دوپ تەبەدى. جالپى لۋي ۆان گال شاكىرتتەرى مۋنديالداعى ەڭ جاس قۇراما. چيلي العاشقى كەزدەسۋىندە جەڭىسكە جەتىپ جاتسا، الىپتارمەن باسەكەلەسە الادى. ال اۆستراليالىقتاردىڭ توپتان شىعاتىنىنا ماماندار دا، بۋكمەكەرلەر دە سەنبەيتىن سەكىلدى.

ءبىزدىڭ بولجام: يسپانيا مەن گوللانديا العاشقى ەكى ورىندى يەلەنىپ، كەلەسى كەزەڭگە وتۋلەرى ءتيىس.

س توبى. كولۋمبيا، كوت د'يۆۋار، گرەكيا، جاپونيا.

بۇل توپتان كىم شىعاتىنىن بولجاۋ وڭاي ەمەس. دروگبا مەن يايا تۋرە سەكىلدى جارىق جۇلدىزدار ءۇشىن قۇراما ساپىندا جەتىستىككە جەتۋدىڭ سوڭعى مۇمكىندىگى بولىپ قالۋى ىقتيمال، سوندىقتان «ءپىل سۇيەگى جاعالۋىنان» كەلگەن فۋتبولشىلار ايانىپ قالماسى انىق. كولۋمبيانىڭ باستى جۇلدىزى رادامەل فالكاو جاراقاتىنا بايلانىستى الەمدىك دوداعا قاتىسا المايدى، الايدا بۇل قۇرامادا ونسىز دا ەۋروپا الاڭدارىندا دوپ تەۋىپ جۇرگەندەر جەتەرلىك. ال كۇنشىعىس ەلىنىڭ وكىلدەرى مەن ەلليندەر قاشاندا ەڭبەكقورلىعىمەن، تەمىردەي تارتىبىمەن تانىلىپ كەلەدى.

سول سەبەپتى بۇل توپتاعى ءار ويىن تارتىستى بولارىن عانا بولجاۋعا بولادى.

ءبىزدىڭ بولجام: ءتورت كوماندانىڭ دا توپتان شىعۋعا مۇمكىندىكتەرى سالىستىرمالى تۇردە شامالاس دەسەك بولادى. كولۋمبيا مەن كوت د'يۆۋاردىڭ قۇرامى جاقسى بولسا، گرەكتەر مەن جاپوندىقتاردىڭ جوعارى دەڭگەيلى تۋرنيرلەردە ءساتتى ونەر كورسەتۋ تاجىريبەلەرى مول.

د توبى. ۋرۋگۆاي، يتاليا، انگليا، كوستا ريكا.

بۇل توپتا ءار جىلدارى الەم چەمپيونى اتاعىن جەڭىپ العان ءۇش بىردەي كوماندا كەلەسى كەزەڭ جولداماسىن ساراپقا سالماق. ۋرۋگۆايدىڭ شابۋىل شەبى مىقتى. لۋيس سۋارەس پەن ەدينسون كاۆاني جۇبىن تۇساپ ۇستاپ تۇرۋ ءۇشىن قورعاۋشىلارعا تالاي تەر توگۋ قاجەت بولادى. بەرىك قورعانىسقا يەك ارتاتىن يتالياندىقتار مەن ءاۋ باستا فۋتبولدى ويلاپ تاپقان اعىلشىندار كەز كەلگەن ءىرى تۋرنيرلەردىڭ فاۆوريتتتەرى قاتارىندا بولاتىنى تۇسىنىكتى.

ءبىراق وسى جولى قوس قۇرامانىڭ پروبلەمالارى ۇقساس سەكىلدى. ەكى كوماندانىڭ جەتەكشى ويىنشىلارى - يتالياداعى بۋففون مەن پيرلو دا، انگلياداعى دجەررارد پەن لەمپارد تا فۋتبولدىق ولشەممەن العاندا اقساقال جاسىنا جەتتى. جاڭا كوشباسشىلار ماريو بالوتەللي مەن ۋەين رۋني شەشۋشى ساتتە بوساڭدىق تانىتىپ ءجۇر. ءبىراق توپتان شىعا السا، ءۇش كوماندانىڭ قايسىسى دا الىسقا جەتۋى مۇمكىن. ال كوستا ريكا ءۇشىن ۇپاي ۇلەستىرۋشى اتانباي، جاقسى ويىن ورنەگىن كورسەتسە جامان ناتيجە بولمايدى.

ءبىزدىڭ بولجام: بۇل توپتا دا باسەكەلەستىك جوعارى دەڭگەيدە بولادى دەپ كۇتىلۋدە. الايدا ءىرى تۋرنيرلەردە ونەر كورسەتۋ جاعىنان تاجىريبەلەرى مول يتاليا مەن انگليا دىتتەگەن ماقساتتارىنا جەتۋدىڭ جولىن بىلەدى.

ە توبى. فرانسيا، شۆەيتساريا، ەكۆادور. گوندۋراس.

ءۇشجولاقتىلار ءۇشىن جەرەبە جولداس بولدى دەۋشىلەر كوپ بولدى. شىنىندا دا ەگەر فرانسۋزدار الاڭدا بار كۇشتەرىن سارپىپ وينايتىن بولسا، كەمىندە شيرەك فينالعا جەتۋگە جول اشىق. ءبىر وكىنىشتىسى، فرانسيانىڭ الاڭداعى ۇزدىك ويىنشىسى فرانك ريبەري جاراقاتىنا بايلانىستى مۋنديالدان تىس قالدى. سونداي-اق ولارعا شۆەيساريالىقتار مەن وڭتۇستىك امەريكالىقتار باسەكەلەس اتانۋى عاجاپ ەمەس.

ءبىزدىڭ بولجام: فرانسيا ءبىرىنشى ورىندى يەلەنۋى ىقتيمال، ەكىنشى ورىن ءۇشىن تالاستا شۆەيساريالىقتار ەكۆادوردان ايلاسىن اسىرۋى ابدەن مۇمكىن.

ف توبى. ارگەنتينا، نيگەريا، بوسنيا جانە گەرسوگوۆينا، يران.

ليونەل مەسسي كلۋبتىق دەڭگەيدە مۇمكىن بولاتىن بارلىق كۋبوكتاردى ۇتىپ الدى. ەندى مارادونامەن ءبىر قاتاردا اتالۋ ءۇشىن جەتىسپەي تۇرعان جالعىز تروفەي -الەم كۋبوگى. برازيليا الاڭدارىندا مەسسيگە انحەل دي ماريا، سەرحيو اگۋەرو، گونسالو يگۋاين سەكىلدى الەمدىك فۋتبولدىڭ جارىق جۇلدىزدارى كومەكتەسپەك.

الايدا ارگەنتينانىڭ وسال تۇسى دا بار: قورعانىس شەبىندە اسا تاجىريبەلى ويىنشىلاردىڭ ازدىعى شەشىمىن تابۋعا بولاتىن ماسەلە دەسەك، قاقپاشى پوزيسياسى جانكۇيەرلەردىڭ ەرەكشە الاڭداۋشىلىعىن تۋدىرىپ وتىر. قالعان كوماندالار ءۇشىن توپتىق تۋرنيردەن اسۋ جەتىستىككە بالانادى.

ءبىزدىڭ بولجام: ەگەر بۇل توپتا ارگەنتينا ءبىرىنشى ورىن الماسا، ۇلكەن «سەنساسيا» ورىن الاتىنى ءسوزسىز. ەكىنشى ورىن ءۇشىن تالاستى نيگەريا مەن تۋرنيرگە العاش قاتىسىپ وتىرعان بوسنيا جۇرگىزەتىن سەكىلدى.

گ توبى. گەرمانيا، پورتۋگاليا، گانا، ا ق ش.

كەز كەلگەن جارىستىڭ باستى فاۆوريتتەرىنىڭ ءبىرى اتاناتىن نەمىستەر سوڭعى جىلدارى بيىكتى باعىندىرۋعا ءبىر-ەكى قادام قالعاندا ءسۇرىنىپ ءجۇر. يواحيم ليەۆ شاكىرتتەرى وسى جولى جيۋل ريمە كۋبوگىن بەرلينگە جەتكىزۋگە تاۋەكەل ەتىپ وتىر. بۇل ماقساتقا قول جەتكىزۋ ءۇشىن گەرمانيادا تالاي ءتۋرنيردى باعىندىرعان تاجىريبەلى قۇرام دا، بىلىكتى باپكەر دە بار.

سوندىقتان فينالدىق ماتچتان سوڭ كۋبوكتى فيليپ لام كوتەرىپ جاتسا، تاڭ قالماڭىز. ال پورتۋگاليا قۇراماسى ءۇشىن كريشتيانۋ رونالدۋدىڭ جاراقاتى ۇلكەن پروبلەماعا اينالۋى مۇمكىن. ەگەر پيرەنەيلىكتەردىڭ باس جۇلدىزى توپتىق تۋرنيردە ونەر كورسەتە الماسا، گانالىقتار مەن امەريكالىقتاردىڭ پلەي-وفف سىنىنا شىعۋ مۇمكىندىكتەرى ارتا تۇسەتىنى انىق.

ءبىزدىڭ بولجام: ءبىرىنشى ورىندى گەرمانيا يەلەنەدى، ەكىنشى ورىن پورتۋگالياعا بۇيىرۋى ىقتيمال.

ن توبى. رەسەي، بەلگيا، وڭتۇستىك كورەيا، الجير.

كوپتەگەن ماماندار بۇل توپتى ەڭ «ءالسىز» دەپ سانايدى. تيبو كۋرتۋا، ۆەنسان كومپاني، ەدەن ازار، رومەلۋ لۋكاكۋ سەكىلدى جۇلدىزداردان قۇرالعان بەلگيالىقتاردان جۇرت جوعارى ناتيجە كۇتىپ وتىر. سولتۇستىك كورشىلەرىمىز دە فابيو كاپەللونىڭ تاجىريبەسىنە ارقا سۇيەپ، كەمىندە توپتان شىعادى دەپ ۇمىتتەنۋدە. ون ەكى جىل بۇرىن ءوز جەرىندە ايدى اسپانعا شىعارا جازداعان كورەيالىقتاردىڭ دا، مۋنديالعا قاتارىنان ەكىنشى رەت كەلىپ وتىرعان الجيرلىكتەردىڭ دە وسال قارسىلاس ەمەستىگى اركىمگە ايان.

ءبىزدىڭ بولجام: بۇل توپتا دا قاعاز جۇزىندە ەۋروپالىق كوماندالار فاۆوريت سانالادى. بەلگيا مەن رەسەيدىڭ العاشقى ەكى ورىندى يەلەنۋگە مۇمكىندىكتەرى جوعارى. ءبىراق وڭتۇستىك كورەيانى دا ەسەپتەن شىعارۋعا بولمايدى.