قىمىز بەن شۇبات دايىندايتىن جاڭا سەح ىسكە قوسىلدى

استانا. قازاقپارات - اتىراۋ وبلىسى يندەر اۋدانىنىڭ كوكتوعاي اۋىلىندا قىمىز بەن شۇبات دايىندايتىن جاڭا سەح ىسكە قوسىلدى.

قازىردىڭ وزىندە شيپالى سۋسىندارعا ىشكى نارىقتا سۇرانىس جوعارى.

الداعى ۋاقىتتا شارۋاشىلىق كەلىسىم شارتقا ساي، ونىمدەرىن رەسەيگە جىبەرمەكشى. «ونىمدەرىمىزدىڭ شەتەل اسۋىنا كەدەندىك وداقتىڭ تيگىزگەن ۇلەسى زور»، دەيدى شارۋاشىلىق باسشىسى.

جەرگىلىكتى كاسىپكەردىڭ مۇنداي كاسىپورىن سالىپ، وڭدى ءىستى قولعا الۋىنا مەملەكەتتىڭ قولداۋى تۇرتكى بولدى. يندۋستريالاندىرۋ كارتاسى اياسىندا نەسيەگە العان 225 ميلليون تەڭگە قارجىنىڭ تەڭ جارتىسىن ۇكىمەت وتەيدى.

شارۋاشىلىقتاعى بيەلەر ءبىر ساۋعاندا ليترگە جەتەتىن ءسۇت بەرەدى. ساۋىنشىلار بولسا، باس-اياعى 20 بيەنى كۇنىنە 4 مارتە ساۋادى. بولاشاقتا ولار جۇمىستارىن اۆتوماتتى تۇردە جۇرگىزەدى.

ول ءۇشىن مالداردى ساۋاتىن ارنايى قۇرىلعىلارعا تاپسىرىس بەرىلىپ قويعان. ازىرگە تەك دايىن ءونىمدى قاپتايتىن ارنايى قوندىرعىلار ساتىپ اكەلىنگەن. سەحتىڭ اشىلۋىنا قاتىسقان وبلىس باسشىسى اۋىلدىقتاردى مەملەكەتتىك باعدارلامالاردىڭ كومەگىن كوپتەپ پايدالانىپ، اۋىل شارۋاشىلىعى سالاسىنداعى كاسىپكەرلىكتى ارتتىرۋ كەرەكتىگىن جەتكىزدى.

باقتىقوجا ىزمۇحامبەتوۆ، اتىراۋ وبلىسىنىڭ اكىمى:

- قازىرگى كەزدە اۋىل شارۋاشىلىعىمەن اينالىسامىز دەگەندەرگە، بۇل - تابىستىڭ كوزى. بۇرىنعى كەڭەس كەزىندە دە اۋىل شارۋاشىلىعى بولدى، ءبىراق، قازىرگىدەي تابىس بولعان جوق. نەگە دەسەڭىز، 80 پايىزىن ۇكىمەت تولەپ وتىر. قانشاما سۋبسيديا بەرىلەدى. مال وسىرسەڭىز، اسىل تۇقىمدى مال باسىنا تولەنەتىن اقشا بار. شاعىن نەسيە ءوز الدىنا.

تولدەۋ ناۋقانىنان كەيىن شارۋاشىلىقتاعى تۇلىكتىڭ قاتارى 20 قۇلىن جانە وسىنشا بوتامەن تولىقتى. كەلەر جىلى ولاردىڭ سانى تاعى دا وسەدى. سەرىكتەستىك باسشىسى سول كەزدە ىشكى نارىقتىڭ سۇرانىسىن عانا قاناعاتتاندىرماي، ونىمدەردى شەتەلگە دە ەكسپورتتاۋعا دا شامامىز جەتەدى، دەيدى. ال، ۇلتتىق ونىمدەرگە قازىردىڭ وزىندە رەسەيلىك كومپانيالار قىزىعۋشىلىق تانىتىپ وتىر.

اقەدىل شالحاروۆ، شارۋا قوجالىعىنىڭ باسشىسى:

- قازىرگى ۋاقىتتا كۇنىنە 100 ليتر شۇبات، 60 ليتر قىمىز دايىندالادى. نەگىزگى سەحتىڭ وندىرەتىنى كۇنىنە 1000 ليتر. بولاشاقتا وسى ءسۇت ونىمدەرىن رەسەيگە دە، قازاقستانعا دا تاپسىرامىز.

شارۋا قوجالىعىنىڭ باسشىسى تەك ءسۇت ونىمدەرىن وندىرۋمەن شەكتەلمەك ەمەس. بيزنەس جوسپارىنا سايكەس، مالدىڭ ەتىن كونسەرۆىلەيتىن جاڭا سەح اشپاقشى. سونىمەن قاتار، 10 گەكتار القاپقا ەگىلگەن باۋ-باقشا ونىمدەرىنەن الما مەن قىزاناق شىرىنىن دايىنداماقشى. باتىربەك قۋاندىق ۇلى

«قازاقستان» تەلەارناسى