ستامبۋل وپەرا جانە بالەت فەستيۆالى «ءبىرجان- سارا» قويىلىمىمەن اشىلماق

 استانا. قازاقپارات - «ءبىرجان- سارا» وپەراسى تاعى دا تۇركيادا كورسەتىلەدى. تۇرىكتىڭ ءتورت ءىرى ستامبۋل، انكارا، ەسكىشاحار جانە بۋرسا قالالارىندا تۇرىكسوي جانە سامۋنسك وپەرا جانە بالەت تەاترىنىڭ حالىقارالىق ۇيىمى قازاق كومپوزيتورى مۇقان تولەبايەۆتىڭ «ءبىرجان- سارا» وپەراسىن ۇسىنباق.

 ەسكە سالا كەتەيىك، 2013 -جىلى بۇل تۋىندى العاش رەت تۇرىك كورەرمەندەرىنىڭ نازارىنا ۇسىنىلعان. قازاق كومپوزيتورىنىڭ وپەراسى ەرەكشە اسەر ەتكەنى سونشالىق، بىرنەشە تۇرىك فەستيۆالدارى ونى ءوز باعدارلامالارىنا ەنگىزدى. 5- ستامبۋل وپەرا جانە بالەت فەستيۆالى «ءبىرجان- سارا» قويىلىمىمەن اشىلماق.

 حالىقارالىق جوبانىڭ بۇل جولعى قويىلىم توبى - التى تۇركى ەلدەرىنىڭ وكىلدەرى. قىرعىزستاننىڭ ەڭبەك سىڭىرگەن ءارتىسى سادىربەك جۇماشيەۆ - ءبىرجان سالدى، ال سارانىڭ ءرولىن ەكى وپەرالىق سۇلۋ قىزدار: «استانا- وپەرا» تەاترىنىڭ قازاقستاندىق جەتەكشى ورىنداۋشىسى جۇپار عابدۋلينا مەن تاتارستاننىڭ جاس وپەرا ءانشىسى رەگينا ۆاليەۆا سومدايدى.

 ايار ايەل التىنايدىڭ ءرولىن قىرعىزستاندىق وپەرالىق ورىنداۋشى اسەل بەكبايەۆا مەن وزبەكستاننىڭ فەريۋزا يۋسۋپوۆا سومدايدى. جانبوتانىڭ ءرولىن قازاقستان رەسپۋبليكاسىنىڭ ەڭبەك سىڭىرگەن ءارتىسى، اكادەميك، پروفەسسور شاحيماردان ءابىلوۆ الىپ شىعادى. سونداي- اق، ءبىرجاننىڭ اناسىنىڭ رولىندە باشقۇرتستان رەسپۋبليكاسىنىڭ حالىق ءارتىسى، وپەرالىق ءانشى سۆەتلانا ارعىنبايەۆا سومدايدى.

 جالپى تۇرىكتىك جوبانىڭ رەجيسسەرى - بۇدان بۇرىن «كورۇعلى» ، «الپامىس» سپەكتاكلىنىڭ قويىلىمىن جۇرتشىلىققا پاش ەتكەن ازەربايجاندىق رەجيسسەر ەفلاتۋن نيمەتزادە. قازاقستاننىڭ ەڭ تانىمال كومپوزيتورىنىڭ ءبىرى م. تولەبايەۆتىڭ «ءبىرجان- سارا» وپەراسى تاماشا ونەر تۋىندىلارىنىڭ ءبىرى، بۇل اتالعان جوباعا قاتىساتىن ءار ەلدەردىڭ كاسىبي مۋزىكانتتارىنىڭ بىرلەسكەن جۇمىسىنىڭ جەمىسى. «ءبىرجان- سارا» وپەراسىنىڭ ليبرەتتو مازمۇنى شىنايى تاريحي وقيعالارعا نەگىزدەلگەن.

 كورنەكتى اقىن، كومپوزيتور ءبىرجان سال قوجاعۇلوۆ پەن سارا تاستانبەكوۆا اراسىنداعى كۇردەلى دە تەرەڭ ماحابباتقا نەگىزدەلگەن ەتيكالىق ستيلدە ورىندالاتىن، كورەرمەن نازارىنا ۇسىنىلاتىن «ايتىس» ونەرى اسەرلى اۋەنمەن تىڭدارماندارىن ەلىتەرى ءسوزسىز.