الماتى الەمدىك بوكستىڭ ورتالىعى بولادى
2011 - جىلعى اقپاندا الماتىدا بۇكىل الەمدىك بوكس قاۋىمداستىعى (AIBA) مەن قازاقسان بوكس فەدەراتسياسىنىڭ اراسىندا وسى كەشەندى سالۋ جونىندە كەلىسىمگە قول قويىلعان بولاتىن.
بۇل تۋرالى الماتى قالاسى ماڭىندا وتكەن باسپا ءسوز تۋرىندا ق ر بوكس فەدەراتسياسىنىڭ ۆيتسە-پرەزيدەنتى يۋري تسحاي ايتتى.
«بۇكىل الەمدىك بوكس اكادەمياسى - حالىقارالىق ستاندارتتار بويىنشا سالىنعان بىرەگەي عيمارات. مۇندا جاتتىعۋلار مەن سپورت جارىستارىن وتكىزەتىن زالدار، سپورت باسسەينى، كاسىبي فۋتبول الاڭى، تەننيس كورتى، باسكەتبول جانە ۆولەيبول الاڭدارى، ترەناجەر زالى، سونداي-اق، 160 ادامعا ارنالعان قوناق ءۇي، كونفەرەنس-زالدار، ءدامحانا جانە اسحانا بار. مەديتسينالىق ورتالىق سالۋ جوسپارلانۋدا»- دەدى يۋ. تسحاي.
ونىڭ ايتۋىنشا، بيىلعى جىلى كۇزدە اكادەميا الەمنىڭ ءتۇرلى ەلدەرىنەن قوناقتاردى بەلسەندى قابىلداي باستايدى. سوندا ول سپورتشىلار ءۇشىن عانا ەمەس، جاتتىقتىرۋشىلار، تورەشىلەر، دارىگەرلەر مەن مەنەدجەرلەر ءۇشىن دە دامۋ ورتالىعىنا اينالادى.
«بىزدە بارلىق جاعداي بار، ەندى ءبىزدىڭ جەڭە ءبىلۋىمىز قاجەت. بۇل شىن مانىسىندە، ەڭ ۇزدىك كەشەن. ءتىپتى مەنىڭ لوندونعا سوڭعى جارىستارعا بارعان كەزىمدە، ءدال وسىنداي قولايلى جاعداي جاسالعان جەردى كورگەن جوقپىن. سونىمەن بىرگە تاماشا تازا اۋا دا بويعا سەرگەكتىك بەرەدى، ويتكەنى، كەشەن الماتى ماڭىنداعى ىلە الاتاۋىنىڭ بوكتەرىندە ورنالاسقان»، - دەيدى بوكستان وليمپيادا چەمپيونى سەرىك ساپيەۆ. ونىڭ ايتۋىنشا، 2016 - جىلى قازاقستان ايەلدەر بوكسى بويىنشا الەم چەميوناتىن وتكىزەدى. ال بۇگىندە مۇندا قىزدار اراسىنداعى بوكستان قازاقستان، قىرعىز رەسپۋبليكاسى، موڭعوليا جانە رەسەي سپورتشىلارىنىڭ حالىقارالىق كەزدەسۋى وتۋدە.
