سوڭعى ۇرلىعىم
ءبىرىنشى ۇرلىق جاساعاندا قاتتى قىسىلىپ، ارينە بالا كۇنىڭدە، ءبىر-ەكى اپتا ۇمىتا الماي، وزىڭمەن ءوزىڭ قىسىلىپ، ىشىڭدە ءبىر وزگەرىستەر بولىپ، اشىق كەڭ جۇرە الماي قىمتارىلا بەرەسىڭ.
سول سەكىلدى مەنىڭ ءبىرىنشى ۇرلىعىم بالا كەزىمنەن باستالادى. ءبىر بالانىڭ ۇرلىعى ويىنشىقتان باستالادى.
ءبىر بالانىڭ ۇرلىعى تاتتىدەن باستالادى. ءدال قازىر وسى شىعارمامدى وقىپ وتىرىپ ءسىزدىڭ ۇرلىعىڭىز نەدەن باستالعانىن ەسىڭىزگە تۇسىرۋگە كىشكەنە ۋاقىت بەرەمىن.
ءبىراق جوق ونداي مەندە بولماعان دەپ اقتالماي-اق قويىڭىز. دوستارىممەن اڭگىمەلەسە جانە ءوز بالالارىما قاراپ وتىرىپ 6-11 جاس ارالىعى قوزاتىن اۋرۋ بولىپ تۇر. مىسالعا ۇلكەن ۇلىم كيندەر شوكولادىنىڭ ويىنشىعىن دوسىمىزدىڭ ۇيىنەن ۇرلاپ كەلىپتى.
ال قىزىمىز توققا تولەيتىن اقشامىزدى تەرەزەنىڭ الدىنان الىپ سومكەسىنە سالىپ قويعان. دوسىممەن وسى ماسەلەدە سويلەسسەم ونىڭ قولىن وسى جاستا مايشاممەن(سۆەچا) كۇيدىرگەن ەكەن. ال مەنىڭ ۇرلىعىم اقشادان باستالعان. ءيا اقشادان جانە سەگىز جاسىمنان باستالادى. كوپ ءسوزدى مىجا بەرمەي ءسىز ارى قاراپ وقي وتىرساڭىز مەن جازىپ باستايىن.
انام 25 جىل گاسترونوم دۇكەنىندە جۇمىس ىستەدى. سوۆەت ۇكىمەتى كەزىندە دۇكەننىڭ زامانى ءجۇرىپ تۇرعان كەز. جەگەنىمىز الدىمىزدا، جەمەگەنىمىز ارتىمىزدا قالىپ جاتتى. سول كەزدە قولدىڭ مايىنان دۇكەننىڭ مايى سۇرانىسقا يە بولاتىن. ماي، قانت، ءشاي. كەرەك دەسەڭىز اكەسى بار ۇيلەردە ونداي تاعامدار بولا بەرمەيتىن.
ايتا كەتەيىن 3 جاسىمنان جول اپاتى كەسىرىنەن اكەمنەن ايىرىلعان بولاتىنمىن. سودان نە كەرەك كۇنى بويى اعامىزدىڭ تاربيەسىندەمىز. انامىز كەشتە جۇمىستان شارشاپ كەلەدى. ءبىر كۇنى انام قالتاسىنان ساعاتتى الىپ جىبەرۋدى ءوتىندى. قالتاسىنا قولىمدى سالسام قاعاز جانە تيىن اقشالارعا قولىم جابىسىپ شىققىسى كەلمەي قالدى. سول ساتتەن باستاپ انامنىڭ قالتاسىن تىمىسكىلەۋدى باستادىم. قالتاسىندا 3-4 تەڭگە بولسا سونىڭ 20-30 تيىنىن عانا الىپ ءجۇردىم بايقاماسىن دەپ. اراسىندا سومكەسىندە اقتارىپ سىپىرىپ كەتەتىن كەزدەر بولدى. سولاي ايلار، جىلدار ءوتىپ جاتتى. كەيدە انام بايقاپ «مەنىڭ قالتامنان كىم اقشا الدى» دەپ سۇرايدى، ءبىراق ۇندەمەي وتىرىپ قۇتىلام...
مەن جۇرەم التى بالانىڭ قايسىسىنان بايقايدى دەپ. بىردە وتىرىپ نەگە قوناقتاردىڭ دا قالتاسىن كورمەسكە دەپ جايمەن قوناقتاردىڭ قالتاسىنا كوشتىم. ءبىراق نە كەرەك ۇيدە دە مەكتەپتە دە ەشكىمگە بايقاتپادىم.
سولاي 11-12 جاسقا دا جەتىپ قالدىم. قويايىن دەسەم ەش قولىمنان كەلمەدى. بىردە اقىرى سول كۇنگە دە جەتتىم. ۇيگە كىرسەم انامنىڭ سومكەسى شكافتا تۇر ەكەن. انامنىڭ ءوزى دالادا كىر جۋىپ وتىر. ول كەزدە سەنبى كۇنى اپكەم ەكەۋى ءتۇس كەزىنەن كۇن باتقانشا كىر جۋاتىن. قازىرگى ءوزى جۋىپ، ءوزى شايىپ، ءوزى سىعاتىن كىرجۋعىش ماشينەسى ول كەزدە تەك ەلەس بولاتىن.
جاقىن ارادا بىتپەيتىنىنە كوزىم جەتىپ سومكەنى اقتارۋدى دا باستاپ كەتتىم. اقشاسىن الىپ وزىمە كەرەگىن اسىقپاي ءبولىپ جاتقانىمدا اناشىم ءبىر كيىمدەردى الماقشى بولىپ ەسىكتەن كىرىپ قالدى. كىرگەن بويدا مەنى سومكەسىن اقتارىپ جىلدار بويى تاپپاي كەلگەن ۇرى بالاسىن ەندى عانا ۇستاپ ءوز كوزىمەن كوز جەتكىزدى.
ەتنوپەداگوگيكا: سوڭعى ۇرلىعىما انام دا كىرگەن بەتتە تۇسىنبەي ءوز ورنىندا تاپجىلماي تۇرىپ قالدى. سەنەيىن دەسە سەنە الماي، سەنبەيىن دەسە كوزى كورسەتىپ سەندىرىپ تۇر. مەن مۇندا نە ىستەرىمدى بىلمەي، قولىمادا اقشا باقىرايىپ كورىنىپ تۇر. ەكەۋمىز ءبىر-بىرىمىزگە ءالى قاراپ تۇرمىز. اياق قولىم ىستەمەي دىرىلدەپ بارادى. ءىشىم جىبىرلاپ جامان بولىپ بارادى. اۋزىم اشىلماي ءبىر ءسوز ايتۋعا ءتىلىم جۇرمەيدى. ىشىمنەن ەندى نە بولادى، قالاي ۇرادى، وزىمدە ءولىپ تاياق جەيتىن بولدىم-اۋ دەپ كوندىرىپ جاتىرمىن. ال انامنىڭ كوزىنە قاراسام ماعان ايانىشتى، مەنىڭ سونداي دارەجەگە ءتۇسىپ تاربيەمنىڭ دۇرىس جولعا تۇسپەگەندىگىن قاراپ جىلاعىسى كەلىپ تۇرعانىن انىق بايقادىم. ۇرادى ما ەكەن دەپ قولىنا قاراسام، قولى قالتىراپ ءوز كوزىمەن كورگەنىنە شوشىپ ۇرماق تۇگىلى نە ىستەپ، نەگە كەلگەنىندە ۇمىتىپ قالدى. سونىمەن انام جايمەن قوزعالىپ، ارتقا قادام باسىپ، كىرگەن ەسىگىن جايمەن اشىپ ءبىراق قاراعان بويدا كوزىن مەنەن الماي جاساۋراعان كۇيدە شىعىپ كەتتى. انامنىڭ سول كۇنى كىرى دە قالدى، باسقا جۇمىسى دا قالدى باردى دا بىردەن جاتىپ قالدى. مەن اقشانى ۇستاعان بويدا قادالىپ قالىپ كەتتىم.
قازىر ويلاپ وتىرسام سول كۇننىڭ بولعانىنا شۇكىر. ەگەر ول كۇن بولماسا ۇرلىقتىڭ جاقسى مامانى بولار ەدىم. جانە انام مەنى ۇرعان بولسا ول كەزدە مەن قوياتىنىم ەكى تالاي ەدى. ۇرار بولسا ودان ارمەن قىرسىعىپ ۇرلىقتى دامىتار ەدىم. «تاياق ەتتەن، ءسوز سۇيەكتەن وتەدى» - دەمەكشى انامنىڭ كوزى سول كەزدە سۇيەكتەن ءوتتى. سول كەزدەن باستاپ قۇدايعا شۇكىر قولىمنىڭ سۇعاناقتىعىنان ايىرىلدىم. قۇرمەتتى وقىرمان ەگەردە سىزدە بالالارىڭىزدىڭ وسىنداي جامان قىلىعىن بايقايتىن بولساڭىدار، بىردەن تاياق الىپ جۇگىرمەي بارىنشا جەڭىل تۇردە تۇسىندىرمەلەرگە سۇيەنۋىڭىزدى سۇرايمىن.
شىنايى ومىردەن الىنعان!
blogtime
